| e-texts navigator |
| Wylie |
170a1 རྡོ་རྗེ་འཛིན་པ་ཉིད་དུ་འགྱུར། །དེས་ན་རིགས་སུ་ངེས་པ་ཡིས། །དང་པོར་འཇུག་པའི་རིམ་པ་བསྟན། །རྩ་བ་ཡན་ལག་ཀུན་ཐེབ་ནས། །རིམ་པ་བཞིན་དུ་དབང་བསྐུར་རོ། །དེ་ནས་བླ་མའི་བཀའ་མནོས་ལ། །
170a2 འདོད་པའི་དངོས་གྲུབ་བསྒྲུབ་པར་བྱ། །རྡོ་རྗེ་སེམས་དཔའི་སྒྱུ་འཕྲུལ་དྲ་བ་གསང་བའི་མེ་ལོང་གི་རྒྱུད་ལས་དབང་བསྐུར་བ་མ་ལུས་པ་བཤད་པའི་ལེའུ་སྟེ་བདུན་པའོ།། །། དེ་ནས་གཞན་ཡང་བཤད་བྱ་བ། །རྡོ་རྗེ་དམ་ཚིག་བླ་ན་མེད། །
170a3 སྡོམ་པ་བརྟན་པོ་དམ་བཅས་པ། །འདི་དག་ལེགས་པར་བཤད་པར་བྱ། །དུས་གསུམ་སངས་རྒྱས་ཐམས་ཅད་ཀྱིས། །འདས་དང་མ་བྱོན་དུས་གསུམ་དུ། །རྒྱལ་ཁྲིམས་ཐ་ཚིགས་བཀས་བཅད་ལྟར། །རིམ་པས་དམོད་བོར་བཀས
170a4 བཅད་པའི། །བྱིན་བརླབས་རང་བཞིན་འདའ་དཀའ་བ། །ཀུན་གྱིས་བསྲུང་བྱ་ཡིན་པར་བཤད། །གང་ཕྱིར་དམ་པས་བྱིན་བརླབས་པའི། །དམ་ཚིག་ཆེན་པོ་འདི་ཉིད་ལ། །འདས་དང་ད་ལྟར་མ་བྱོན་པའི། །རྒྱལ་བ་སྲས་དང
170a5 བཅས་པ་དང་། །རིག་འཛིན་རྣམས་དང་མཁའ་འགྲོ་དང་། །ལྷ་རྣམས་དང་ནི་མི་རྣམས་དང་། །ཀླུ་དང་མི་མིན་འབྱུང་པོའི་ཚོགས། །རྫུ་འཕྲུལ་ལྡན་པའི་ལྷ་ཆེན་ཀྱང་། །དམ་པ་འདས་པས་འཚིག་པར་འགྱུར། །
170a6 དམ་པ་ཉིད་ཀྱི་རང་བཞིན་འདི། །རྒྱལ་བ་ཀུན་གྱི་དགོངས་པ་ལ། །སྒྲ་བཞིན་སྤྱོད་པའི་གང་ཟག་རྣམས། །ལོག་པར་སྤྱད་པས་ཚིག་པར་འགྱུར། །དམ་པ་རྣམས་ཀྱིས་བཀས་བཅད་ཅིང་། །བྱིན་བརླབས་དམོད
170a7 པོར་རང་བཞིན་གྲུབ། །དམ་པ་འདི་ལས་གང་འདའ་བ། །རྡོ་རྗེ་ཅན་ཡང་ཚིག་པར་འགྱུར། །དམ་པ་རྣམས་ཀྱི་དགོངས་པ་ལ། །དབང་དང་བྱིན་བརླབས་ཐོབ་པ་ཡིས། །དམ་པའི་ཚུལ་བཞིན་ངེས་སྤྱད་ན། །
170a8 མི་མཐུན་ཕྱོགས་རྣམས་འཚིག་པར་འགྱུར། །དེ་ཕྱིར་དུས་གསུམ་སངས་རྒྱས་ཀྱིས། །དམ་ཚིག་ཅེས་ནི་རྣམ་པར་བསྒྲགས། །བླ་ན་མེད་པའི་དམ་ཚིག་ནི། །མ་ལུས་རང་རིག་བྱང་ཆུབ་སེམས། །
iiif viewer powered by OpenSeadragon
