| e-texts navigator |
| Wylie |
169b1 དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་གསང་ཆེན་པོ། །སྒྱུ་འཕྲུལ་དྲ་བའི་ལམ་ཆེན་པོ། །མ་ལུས་ཆོ་ག་རྒྱ་ཆེན་པོ། །དཔལ་ལྡན་རྡོ་རྗེ་མེ་ལོང་གི། འཇུག་པའི་རིམ་པ་ཇི་བཞིན་དུ། །གསང་བ་ཀུན་ལ
169b2 ཤེས་པར་བྱ། ། །།རྡོ་རྗེ་བླ་མ་དེ་ཉིད་ཀྱིས། །ཆ་བྱད་གུས་ལྡན་མཛེས་པ་ཡིས། །མེ་ཏོག་ལྡན་པས་འཁོར་ལོ་ཉིད། །མངོན་བྱས་སྐུ་གསུང་བསྐུལ་པ་ཡིས། །དམ་ཚིག་དྲན་ཏེ་དགོངས་པར་འགྱུར། །
169b3 རྡོ་རྗེ་སེམས་དཔའི་དཀྱིལ་འཁོར་དུ། །གསལ་དང་རིག་པའི་སྟོབས་ཀྱིས་ནི། །རྡོ་རྗེ་སློབ་མ་བྱིན་བརླབ་ཕྱིར། །སློབ་དཔོན་དག་ཀྱང་འཇུག་པར་བྱ། །དེ་ནས་སློབ་མ་འཇུག་བྱ་སྟེ། །ཁྲུས་བྱས་དྲི་ཞིམ་གོས་བཟང་གྱོན། །དད
169b4 དང་གུས་ལྡན་རིན་ཆེན་བཅས། །གུས་བཅས་སྙན་པའི་ཚིག་གིས་ནི། །ལུས་དབུལ་དག་པའི་སེམས་ཀྱིས་གནས། །བདུད་རྩི་འཁྱིལ་བའི་སྦྱོར་བ་ཡིས། །བར་ཆད་སྦྱོར་བསལ་བསྲུང་བ་བྱ། །ཆོ་ག་གང་ཡིན་ལྷར་བསྐྱེད་ལ། །
169b5 མཚན་མ་རྫོགས་པར་ནན་ཏན་བྱ། །རྒྱལ་བ་ཀུན་གྱི་དམ་ཚིག་ལྔ། །འབྲུ་གསུམ་སྐུ་གསུང་ཐུགས་ལྡན་སྦྱིན། །སྙིང་ཀར་རྡོ་རྗེ་བརྟན་བྱས་ལ། །དམ་ཚིག་ལེགས་པར་དབོག་པར་བྱ། །ཙན་དན་དཀར་དམར་བྱིན་བརླབས
169b6 ཆུ། །ལན་གསུམ་བླུད་ལ་སྣོད་དོར་རོ། །དེ་ནས་རང་གིས་དམ་བསྒྲགས་ཏེ། །གསང་བའི་དོན་ལ་ངེས་པར་བྱ། །རང་རང་འབྲེལ་པའི་ལྷ་ཉིད་ལ། །རིན་ཆེན་དོར་དེ་བརྟག་པར་བྱ། །སྔགས་དང་ཕྱག་རྒྱས་དེ་བཀུག་ལ། །
169b7 བསྟིམ་ལ་དབྱེར་མེད་གནས་པ་ལ། །རྟག་ཏུ་བྱིན་བརླབས་གནས་པའི་ཕྱིར། །ལེགས་པར་བརྟན་པའི་ཆོ་ག་བྱ། །མི་ཤེས་རབ་རིབ་བསལ་བྱས་ལ། །འཁོར་ལོ་མངོན་པའི་ང་རྒྱལ་བྱ། །དེ་ནས་ལྷ་དང་དཀྱིལ་འཁོར་གྱི། །
169b8 དག་པ་རིམས་ཀྱིས་བསྟན་པར་བྱ། །དེ་ནས་བླ་མ་སངས་རྒྱས་ལ། །མ་ལུས་ཅི་ཡོད་དབུལ་བར་བྱ། །བྱིན་བརླབས་ཆོ་ག་དག་པ་ཡི། །དཀྱིལ་འཁོར་མཆོད་དང་བསྒོམས་པ་དང་། །ཞུགས་པའི་ཡོན་ཏན་བསམ་མི་ཁྱབ། །
iiif viewer powered by OpenSeadragon
