| e-texts navigator |
| Wylie |
162b1 རྣལ་འབྱོར་གྱིས། །རིགས་དང་འཐུན་པའི་ས་གཞི་ལ། །ཐབ་ཁུང་སོ་སོའི་མཚན་མ་ཅན། །ཕྲིན་ལས་དཀྱིལ་འཁོར་ཉིད་དུ་བཤད། །སློབ་དཔོན་ནུས་པ་སྟོབས་ལྡན་པས། །རྡོ་རྗེ་ལུས་སུ་བརྟན་བྱའི་ཕྱིར། །རྒྱང་གྲགས་དཔག་ཚད་ལ་སོགས
162b2 པ། །སྐུ་གསུང་ཐུགས་སུ་མངོན་གསལ་བ། །རྣལ་འབྱོར་སྐལ་ལྡན་སྤྱོད་ཡུལ་ཏེ། །ཚོགས་ཀྱི་དཀྱིལ་འཁོར་ཉིད་དུ་བཤད། །དེ་ནས་གཞན་ཡང་བཤད་བྱ་བ། །མཚན་མ་རྟོག་པའི་རང་བཞིན་གྱིས། །མཐོང་བྱ་དོན་ལ་སྒྲིབ་པས་ན། །
162b3 དེ་དག་སྦྱང་བའི་ཆོ་ག་བཤད། །ཐ་མལ་ཞེན་པས་བརྟགས་པའི་དོན། །ལྷག་པའི་བདེན་གཉིས་རྟོགས་བསྒོམས་པས། །ཕྱི་ནང་སྣོད་བཅུད་མ་ལུས་པ། །སྐུ་གསུང་ཐུགས་ཀྱི་ངང་དུ་བསྲེག་།དཀྱིལ་འཁོར་ལྷའི་མཚན་མ་དག་།རྣམ་པ་ཇི་སྙེད
162b4 གནས་པ་དག་། རང་རིག་རྣམ་པར་འཕྲུལ་པ་ཉིད། །མཚན་མ་ཐིག་ལེའི་ངང་དུ་སྦྱངས། །ཐིག་ལེ་རིམ་པའི་སྣང་ཚུལ་ཏེ། །ཕྱི་ནང་མེད་པའི་བྱང་ཆུབ་སེམས། །དངོས་དང་དངོས་མེད་ཀུན་སྦྱངས་ཏེ། །རང་རིག་བྱང་ཆུབ་སེམས་ཀྱི་མེ། །ཕྱོགས
162b5 བཅུར་འབར་ཞིང་དབྱིངས་ལ་སྡུད། །རྣལ་འབྱོར་ལས་རུང་གོམས་པ་ཡིས། །གཞན་དོན་རྩོམ་པའི་དོན་བྱེད་ན། །དང་པོར་ཉེས་བྱས་གསུམ་སྦྱང་ཕྱིར། །རྣམ་གསུམ་ཁྲུས་ཀྱི་རིམ་པ་བརྩམ། གདུག་པ་འདུལ་བའི་དཀྱིལ་འཁོར་གྱིས། །བར་ཆད
162b6 བགེགས་དང་དབྲལ་བྱས་ལ། །བཀུག་བཅིངས་བསྟིམས་ལ་རྣལ་དུ་གཞག་།བསྲུང་དང་བྱུག་བདུག་རྒྱན་གྱིས་བརྒྱན། །འཁོར་བའི་ས་བོན་ཀུན་བཀོད་དེ། །ལས་ཀྱི་ཆོ་ག་ཐིམ་པ་དང་། །དཀྱིལ་འཁོར་འཕྲོ་འདུ་རིམ་པ་ཡིས། །འཁོར་བའི་ས་བོན
162b7 སྦྱང་བར་བྱ། །དེ་ཚེ་སྡོང་བུ་གནས་བཀོད་དེ། །སྡོང་བུ་རེ་ལ་ལྷ་རྣམས་ཀྱི། །སྙིང་པོ་ཚང་པར་གདགས་པ་དང་། །གསོལ་གདབ་གནང་བྱིན་སྲས་སུ་བསྐྱེད། །འཇུག་དང་དབང་བསྐུར་ལས་རྫོགས་ནས། །ཁྲོ་བོའི་དཀྱིལ་འཁོར་དེ་བཞིན་ཏེ། །
162b8 ལས་བཞི་མེའི་ལས་བྱས་ནས། །རྟོག་ཚོགས་ལྷ་གསུམ་དབྱེར་མེད་པའི། །རང་རང་གནས་སུ་དག་པ་ལ། །སྦྱིན་སྲེག་གླུ་བྲོ་གར་གྱིས་མཆོད། །ལས་ཀྱི་བྱ་བ་ཀུན་ཟིན་ནས། །ཐིག་ལེ་ཆེན་པོའི་ངང་ལ་བསྡུ། །དེ་ནས་གཞན་ཡང་བཤད་བྱ་བ། །
iiif viewer powered by OpenSeadragon
