| e-texts navigator |
| Wylie |
139b1 དངོས་པོ་སྣང་གྲགས་ཆོས་རྣམས་ཀུན། །མ་བཅོས་དེ་བཞིན་ཉིད་དུ་གནས། །མ་ལུས་སྙིང་པོ་ཐིག་ལེ་དང་། །ལྔ་བདག་བརྒྱད་ཅུ་རྩ་གཉིས་རྒྱུ། །ས་ཡ་བཅུ་གསུམ་རྩ་ཡན་ལག་།རོ་དང་གནས་སྐབས་ཀུན་ལས་གྲོལ། །དང་པོ་གནས་དང་གཉིས་པ་གཉིས། །
139b2 གསུམ་པ་མ་ལུས་ཁྱབ་བྱེད་པ། །ཉམས་སུ་མྱོང་བྱེད་གཏན་ཚིགས་སོ། །ཐིག་ལེ་གནས་དང་ཡིག་འབྲུ་དང་། །དེ་ཡི་བྱིན་བརླབས་འདྲེས་པ་ཡིས། །བདེ་བ་ཆེན་པོ་མངོན་དུ་སྣང་། །ཆུ་ལས་ཆུ་བོ་ཐ་དད་དེ། །རྒྱ་མཚོ་ལས་ནི་ཆུ་ཐིགས་དང་། །ལམ་དང
139b3 ཞིང་སའི་འབྲས་བུ་ལྟར། །ཐབས་ཀྱི་ཁྱད་པར་སྣང་བ་ཡིན། །དངས་མ་ལྔ་ལས་གང་བྱུང་བ། །ཇི་སྙེད་ལུས་སེམས་རྩ་ཐིག་ལེ། ཁམས་ལྔའི་རོ་དང་བཅུད་སྣང་བ། །ཡེ་ཤེས་ཆེན་པོར་གཏོགས་པ་ཡིན། །གསུམ་དངོས་བརྒྱད་སོགས་ཁ་དོག་གྲངས། །
139b4 གནས་པ་གང་ཡིན་དེ་སྣོད་དེ། །སོ་སོའི་བཅུད་ཀྱི་ཁྱད་པར་ལས། །བྱང་ཆུབ་སེམས་ཉིད་གསལ་བར་སྣང་། །དོན་དམ་ཀུན་རྫོབ་དབྱེར་མེད་པའི། །བདེན་བཞི་དབྱེར་མེད་དངས་མ་ཉིད། །མ་ལུས་ཁྱབ་པའི་ཚུལ་གྱིས་སྣང་། །ཐབས་དང་ཤེས་རབ་གཉིས་མེད
139b5 པའི། །ཐིག་ལེ་གཅིག་དང་དུ་མ་ཉིད། །བྲལ་བའི་ཡེ་ཤེས་ཆེན་པོ་ཉིད། །གཅིག་དང་དུ་མ་ལས་གྲོལ་བའོ། །བཅུད་འདུས་ཐིག་ལེ་གཉིས་རོ་རྒྱུ། །རླུང་དང་གདམས་ངག་རྐྱེན་ལྡན་པས། །འབྲས་བུ་ལྷན་ཅིག་སྐྱེས་པར་སྣང་། །རང་ལ་གནས་པ་ཐབས་ཀྱིས
139b6 གསལ། །ཐབས་དང་ཤེས་རབ་འབྲེལ་པའི་རོ། །རྩ་ཡིག་བཅས་པ་བཅུད་འདུས་པས། །ཐབས་དང་རླུང་གི་གདམས་པ་ཡིས། །མ་ལུས་ལྷན་སྐྱེས་མངོན་སུམ་གསལ། །བདེ་དང་སྟོང་ཉིད་མི་ཕྱེད་པ། །རང་རིག་བདེ་ཆེན་མ་སྐྱེས་གཟུགས། །མ་ལུས
139b7 འོད་དང་རྣམ་པ་ལྟར། །དབྱེར་མེད་ཚུལ་དང་རང་སྣང་བའོ། །བདེ་བས་བསྐྱེད་པའི་རྟོག་པ་ལྔ། །རྩ་བ་ཡན་ལག་བཅས་པ་ཉིད། །མ་ལུས་ཡེ་ཤེས་ཆེན་པོ་ཉིད། །ཡེ་ཤེས་ལྔ་ཡིས་རྒྱས་བཏབ་པའོ། །དབང་པོ་སྣོད་བཅུད་བཅས་པ་ཡིས། །ཡབ་ཡུམ
139b8 འབྲེལ་བར་བཅས་པའི་བཅུད། །སེམས་ལྔའི་རྒྱུད་དུ་རང་སྣང་བ། །མཉམ་པ་བཞི་ཡི་ཚུལ་དུ་གསལ། །དེ་ལ་སོགས་པ་མཐའ་ཡས་པའི། །ཕྱི་ནང་གསང་བ་མཐར་ཐུག་པའི། །གཏན་ཚིགས་མཐའ་ཡས་བཤད་པ་སྟེ། །རྡོ་རྗེ་མེ་ལོང་བཤད་པའི
iiif viewer powered by OpenSeadragon
