| e-texts navigator |
| Wylie |
137a1 ཏིང་འཛིན་གཟུགས་བརྙན་དུ། །གཟུངས་མ་རིགས་ལ་རྟེན་བཅས་པའི། །སེམས་ལྔ་ཡུན་རིང་ཐུང་བཅས་པས། །བདག་གཞན་ཆོས་རྣམས་མ་ལུས་པ། །ལྷན་ཅིག་སྐྱེས་པའི་ཡེ་ཤེས་ཏེ། །དངོས་པོ་མ་ཡིན་དངོས་མེད་མིན། །བདག
137a2 གཞན་གཉིས་ཀ་གཉིས་མེད་མིན། །རང་བྱུང་བདེ་ཆེན་སྒྱུ་མ་ཉིད། །རྡོ་རྗེ་བརྟན་པོ་རང་སྣང་བ། །ཡེ་ཤེས་སྒྱུ་མ་ལྷུན་གྱིས་གྲུབ། །རྡོ་རྗེ་སེམས་དཔའ་སྒྱུ་འཕྲུལ་དྲ་བ་གསང་བ་མེ་ལོང་གི་རྒྱུད་ཆེན་པོ་ལས་གླེང་བསླང་བ་བཤད་པའི་ལེའུ་སྟེ
137a3 གསུམ་པའོ། ། །། དེ་ནས་གཞན་ཡང་བཤད་བྱ་བ། །ཀུན་གྱི་ཤེས་བྱ་ཡུལ་བཤད་པ། །ཆོས་རྣམས་མ་ལུས་ཐམས་ཅད་ཀུན། །གཅིག་དང་ཐ་དད་ཀུན་བྲལ་བའི། །མཐའ་དང་དབུས་མེད་དེ་བཞིན་ཉིད། །སྒྲོ་སྐུར་ཀུན་བྲལ་མཉམ་པ་ལས། །
137a4 རྟོགས་དང་མ་རྟོགས་ཁྱད་པར་ལས། །སྣ་ཚོགས་ཆོས་ནི་རྣམ་པར་འཕྲུལ། །གཞི་དང་རྩ་བ་ལས་འདས་པའི། །རང་བཞིན་དབྱེར་མེད་དེ་བཞིན་ཉིད། །དངོས་མེད་དངོས་པོ་ཡུལ་འདས་ལ། །འཁོར་དང་མྱ་ངན་འདས་པ་ཡི། །ངོ་བོ་སྣ་ཚོགས
137a5 རང་སྣང་བ། །གཉིས་མེད་ཐབས་ཆེན་རྡོ་རྗེ་ཉིད། །ེ་མའོ་གཉིས་མེད་བདེ་ཆེན་ལས། །སྣ་ཚོགས་གནས་དང་ལོངས་སྤྱོད་དང་། །རིགས་དང་ཁ་དོག་ཚེ་ཚད་དང་། །བདེ་སྡུག་དབང་པོ་བྱེ་བྲག་དག་།རང་བཞིན་སྣ་ཚོགས་རྣམ་པར་འཕྲུལ། །
137a6 སྒྱུ་མ་ཆུ་ཟླ་འཇའ་ཚོན་ལྟར། །བྱང་ཆུབ་སེམས་ཀྱི་ངོ་བོར་གནས། །ལས་དང་རྐྱེན་གྱིས་གང་སྣང་བ། །རང་རང་ཞེན་པའི་ཐ་དད་གྱིས། །དབང་པོ་ཁྱད་པར་སྣ་ཚོགས་པའི། །རྟོག་པའི་ནུས་པ་སྣ་ཚོགས་མཐོང་། །རང་བཞིན་གཞི་རྩ
137a7 མེད་པའི་དབྱིངས། །ལྷན་ཅིག་སྐྱེས་དང་ཀུན་བརྟགས་པའི། །མ་མཐོང་ལོག་ཞེན་རྟས་པ་ཡིས། །འཁྲུལ་འཁོར་ལོག་པའི་སྟོབས་སུ་སྣང་། །འཁོར་བ་མ་གསལ་དག་པ་ཡི། །ཞིང་དང་སྤྱོད་ཡུལ་ལོངས་སྤྱོད་དང་། །ཏིང་འཛིན
137a8 དབང་སྟོབས་རྫུ་འཕྲུལ་དང་། །མངོན་ཤེས་ཡེ་ཤེས་དཔག་མེད་པའི། །སྣ་ཚོགས་སྐུ་དང་གསུང་ཐུགས་དང་། །ཡོན་ཏན་འཕྲིན་ལས་རང་སྣང་བ། །བདག་གཞན་ལྷུན་གྱིས་གྲུབ་པའི་དོན། །སྣ་ཚོགས་ཡིད་བཞིན་ནོར་བུ་ལྟར། །
iiif viewer powered by OpenSeadragon
