| e-texts navigator |
| Wylie |
130b1 ཆོས་རྣམས་མ་ལུས་གཉིས་མེད་པའི། །རང་རིག་བྱང་ཆུབ་སེམས་ཉིད་དེ། །ཐ་དད་མེད་པའི་རང་བཞིན་ཉིད། །རྡོ་རྗེ་ཞེས་ནི་བཤད་པ་ཡིན། །རང་བཞིན་མཐའ་ཐུག་མེད་པའི་ཆོས། །ཐབས་དང་ཤེས་རབ་འབྲེལ་པ་ཡིས། །ཐུགས་སུ
130b2 ཆུད་ཅིང་མངོན་རྟོགས་པ། །ཕྱི་ནང་གསང་བའི་སེམས་དཔར་བཤད། །རང་བཞིན་ཐབས་དང་འབྲས་བུའི་དོན། །ནུས་པའི་རིམ་པ་སྩལ་སྣང་བ། །ཐབས་དང་ཤེས་རབ་འབྲེལ་པའི་དོན། །སྒྱུ་འཕྲུལ་ཞེས་ནི་བཞིར་བཤད་དོ། །ཐ་དད་མིན་ལས་ཐ
130b3 དད་པའི། །ངོ་བོ་ཐབས་དང་བདག་ཉིད་དང་། །བྱིན་བརླབས་ཤུགས་ཀྱིས་འབྲེལ་པ་ནི། །དྲ་བའི་དོན་ཞེས་བཤད་པ་ཡིན། །མ་བརྗོད་གྲགས་པའི་བསྟན་པ་ཉིད། །སྒྲོ་སྐུར་མེད་དང་ཞལ་ནས་གསུངས། །དྲི་མ་མེད་པའི་ལུང་ཉིད་དེ། །ལས་དང་ཡེ་ཤེས
130b4 སྤྱི་ཉིད་དང་། །རྫོགས་པས་རྫོགས་ཕྱིར་ལུང་ཉིད་དེ། །བསྟན་པ་སྤྱི་ཡི་བདག་ཉིད་ནི། །ཐམས་ཅད་ཀུན་གྱི་བདག་ཉིད་པས། །གཅིག་དང་དུ་མ་མི་གནས་ཀྱང་། །སོ་སོའི་བསྟན་པ་རྒྱ་མཚོའི་རྒྱུད། །འདི་སྟོན་འདིས་སྟོན་འདི་ཕྱིར་སྟོན། །དོན་ཀུན
130b5 འདི་ལ་ཡོངས་རྫོགས་པས། །ལུང་གི་སྤྱི་ཞེས་བཤད་པ་ཡིན། །གང་ཕྱིར་གསང་བ་ཞེས་བྱ་བ། །སྐུ་དང་གསུང་ཐུགས་བདག་ཉིད་དེ། །རང་བཞིན་ཡེ་ནས་ངོ་བོ་དང་། །ཐབས་དང་འབྲས་བུར་གྱུར་པ་ཉིད། །གསང་བའི་དོན་དུ་འདི་བརྗོད་དོ། །ངང་གིས
130b6 དམན་དང་མ་སྦྱངས་དང་། །དབང་དང་དམ་ཚིག་བྲལ་བ་དང་། །རང་བརྟགས་བསྒྲིབས་པས་སའི་ཁྱད་པར། །དེ་དང་དེ་ཡི་དབང་གིས་ན། །རོ་མྱོང་བྲལ་ཕྱིར་གསང་བར་བཤད། །རང་བཞིན་ཐབས་དང་འབྲས་བུ་ཡི། །ཆོས་རྣམས་ཐིག་ལེ་ཆེན་པོའི་དོན། །
130b7 འཇིག་རྟེན་འདས་དང་འཇིག་རྟེན་པ། །མ་ལུས་རོ་གཅིག་དབྱེར་མེད་པ། །ཇི་སྙེད་ཐེག་པའི་ཁྱད་པར་དང་། །བསྟན་པའི་བྱེ་བྲག་གནས་པ་རྣམས། །འདིར་འདུས་ཐབས་འདིས་མཚོན་པ་དང་། །རྩ་བར་གྱུར་པ་ཁོ་ན་ཡིན། །ཐབས་དང་ཤེས་རབ་གཉིས
130b8 མེད་པའི། །བྱང་ཆུབ་སེམས་ཉིད་བདེ་བ་ཆེ། །རང་བྱུང་ཡེ་ཤེས་ཐོག་མཐའ་མེད། །རྡོ་རྗེ་སེམས་དཔའི་བདག་ཉིད་དེ། །རྒྱལ་བའི་བྱིན་བརླབས་རབ་སྣང་བ། །བསམ་གྱིས་མི་ཁྱབ་ཆེ་བ་རྣམས། །འདི་ལས་སྟོན་པས་སྙིང་པོ་སྟེ། །སྙིང་པོ་དང་ནི་འོད་བཞིན
iiif viewer powered by OpenSeadragon
