| e-texts navigator |
| Wylie |
80a1 ཀྱེ་ལྷུན་གྲུབ་བྱ་རྩོལ་འདས་པའི་སྙིང་པོ་ལ། །གང་གི་ཕྱོགས་ལྡོག་མེད་པའི་ཞེན་པ་ནི། །ཇི་ལྟར་བུས་པ་མཁའ་ལ་རྩོད་པ་ལྟར། །ཀུན་བྱེད་ང་ཡི་རང་བཞིན་མཐོང་མི་འགྱུར། །གང་གིས་གང་སྤངས་ལྡོག་པར་འདོད་པ་ནི། །རེ་དོགས
80a2 འཇིགས་པའི་སེམས་དང་མ་བྲལ་བས། །མཐའ་བྲལ་མཐའ་ལ་ཞེན་པའི་གང་ཟག་གིས། །ལྷུན་གྲུབ་སྙིང་པོའི་དོན་ལ་ཇི་ལྟར་རེག་།ཀྱེ་སེམས་དཔའ་རྡོ་རྗེ་ལེགས་པར་ད་བསྒོམས་ཤིག་།མ་སྐྱེས་རྣམ་པར་དག་པའི་དོན་སྣང་བས། །
80a3 སྣང་བ་དངོས་པོར་མི་ལྟ་འཇིག་མི་བྱེད། །སྣང་བ་སྐྱེ་བ་མེད་པར་རང་གྲོལ་བས། །སྟོང་པ་མི་བསྒོམ་ཇི་བཞིན་རྟོགས་པས་གྲོལ། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ངས། །ཇི་ལྟར་སྣང་བའི་ཆོས་ནི་ཐམས་ཅད་ཀུན། །མ་སྐྱེས་རྣམ
80a4 པར་དག་པར་ལུང་བསྟན་པས། །ཇི་ལྟར་སྐྱེ་བ་མེད་པ་ཉིད་དུ་རྟོགས། །ཀྱེ་ང་ལས་བྱུང་བ་སྟོན་པ་སྐུ་གསུམ་ལ། །སེམས་ཉིད་སྐྱེ་བ་མེད་པར་ཀུན་སྨྲ་ཞིང་། །རང་བཞིན་མེད་པའི་དོན་ལ་ཀུན་རྩོད་ཀྱང་། །སྐྱེ་མེད་མངོན་སུམ་དུས་ཀྱིས་རྟོགས
80a5 པ་མེད། །དེ་ཕྱིར་ཀུན་བྱེད་རྒྱལ་པོའི་ལུང་འདི་ལ། །ཤེས་ནས་མ་ཡེངས་དོན་ལ་གནས་པ་ལས། །རྩོལ་བས་མི་འཇུག་གཉེན་པོས་སེམས་མི་སྦྱོངས། །ཡུལ་ལ་མི་འཇོག་དྲན་པའི་སེམས་མི་སྡུད། །གང་ལྟར་འབྱུང་བ་དེ་ཉིད་དོན་ཡིན་པས། །ཀུན
80a6 བྱེད་ང་ཡི་དོན་ལ་འཇུག་པར་གྱིས། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །མ་བཅོས་སེམས་ཀྱི་འཁོར་ལ་ལུང་ཕོག་པ། །མ་ལུས་སྐྱེ་མེད་རྟོགས་པའི་རྣལ་འབྱོར་པ། །རང་བཞིན་བཅུ་ལས་རྩོལ་བར་མ་བྱེད་ཅིག་།ཀུན་བྱེད
80a7 བྱང་ཆུབ་སེམས་ཀྱི་རང་བཞིན་ལ། །ཤེས་པས་གཟུང་འཛིན་མི་ཤེས་སྤང་མེད་པས། །རྟོགས་པ་དབང་སྒྱུར་དོན་ལ་གནས་པ་ཡིས། །ཀུན་བྱེད་རྒྱལ་པོའི་དགོངས་པ་ལྷུན་གྱིས་གྲུབ། ཅེས་གསུངས་སོ། །བྱང་ཆུབ་ཀྱི་སེམས་ཀུན་བྱེད
80a8 རྒྱལ་པོ་ལས་ལྷུན་གྲུབ་རེ་དོགས་བཅད་པའི་ལེའུ་སྟེ་བརྒྱད་བཅུ་པའོ། ། །། དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལ་སེམས་དཔའ་རྡོ་རྗེས་འདི་སྐད་ཅེས་ཞུས་སོ། །ཀྱེ་སྟོན་པ་ཀུན་བྱེད་རྒྱལ་པོ་ལགས། ཇི་ལྟར་སྣང་བའི་ཆོས
iiif viewer powered by OpenSeadragon
