| e-texts navigator |
| Wylie |
78b1 པ་སྙིང་པོའི་དོན་དུ་བསྟན། །གང་ཡང་བསམ་པ་ཀུན་ལས་འདས་བྱེད་པ། །བླང་དོར་མེད་པར་རྟོགས་པར་ལུང་བསྟན་ཏོ། །ཀྱེ་སེམས་དཔའ་རྡོ་རྗེ་སྙིང་པོའི་དོན་ལ་བསྒོམ། །ང་ནི་མ་ནོར་དོན་གྱི་སྙིང་པོ་ལ། །བླང་དོར་རྣམ་རྟོག་བཅོས་པའི
78b2 ཡུལ་མེད་དེ། །རང་བཞིན་བདེ་བ་མཆོག་གིས་གོམས་པར་བྱེད། །ཀུན་བྱེད་རྟོགས་ན་སྙིང་པོར་ཀུན་གནས་པས། །སྙིང་པོའི་དོན་ལ་བླང་དོར་ལུང་མ་བསྟན། །སྐྱེ་ཞིང་འཇིག་པའི་ཆོས་སུ་འང་ལུང་མ་བསྟན། །བཟང་ངན་གཙང་སྨེའི
78b3 ཆོས་སུ་འང་ལུང་མ་བསྟན། །རྟོག་དཔྱོད་བསམ་པའི་ཡུལ་ལས་འདས་པར་བསྟན། །ཀྱེ་སེམས་དཔའ་རྡོ་རྗེ་ངེས་པར་ད་བསྒོམས་ཤིག་།བསྒོམ་དང་བསྒོམ་པར་བྱ་བའི་ཡུལ་ཉིད་ནི། །མ་བཅོས་ཀུན་བྱེད་སེམས་ཀྱི་རང་བཞིན
78b4 ལ། །བསྒོམ་དང་མི་བསྒོམ་བློ་ཡི་ཡུལ་ལས་འདས། །ཀྱེ་ཀུན་བྱེད་རྒྱལ་པོ་བྱང་ཆུབ་སེམས་ང་ནི། །ང་ཡི་འཁོར་དུ་འདུས་པའི་ཚོགས་རྣམས་ལ། །བླང་དང་དོར་བའི་ཆོས་ཉིད་ང་མི་སྟོན། །གཅིག་ལ་གཉིས་སུ་དབྱེ་བའི་ཆོས་མི
78b5 སྟོན། །རྟོག་དང་དཔྱོད་འདས་རྟོག་དཔྱོད་བསམ་མི་བྱེད། །མ་བཅོས་ཇི་བཞིན་པ་ལ་འཆོས་མ་བྱེད། །བྱ་བ་གང་བཏང་ཅི་སྣང་ཆོས་ཉིད་ལ། །མ་བསམས་རང་བཞིན་བཞག་པས་གྲོལ་བར་སྟོན། །ཀྱེ་སེམས་དཔའ་རྡོ་རྗེ
78b6 ཆེན་པོ་ད་བསྒོམས་ཤིག་། བླང་དོར་མེད་པའི་ཆོས་ཉིད་བྱང་ཆུབ་ལ། །མཁའ་ལྟར་གནས་པས་ལུས་སེམས་བཅོས་སུ་མེད། །འདུ་ཤེས་ཞེན་འཛིན་མེད་པས་བསྒོམ་དུ་མེད། །མཁའ་ལྟར་རབ་ཞི་རྙོག་པ་ཀུན་བྲལ་ལ། །
78b7 ཡུལ་ལ་མི་འཇུག་དགོངས་པའི་དམིགས་འཇུག་བྲལ། །ཀྱེ་སེམས་དཔའ་རྡོ་རྗེ་ལེགས་པར་ད་བསྒོམས་ཤིག་།དབང་པོ་ཡུལ་ལ་མི་རྟོག་སེམས་མི་སྡུད། །གཉེན་པོ་མ་བརྟེན་ལུས་སེམས་རྒྱུད་མ་སྦྱོངས། །ལུས་སེམས་མ
78b8 བཅོས་སྙིང་པོའི་དོན་དུ་རྟོགས། །ཀྱེ་ཀུན་བྱེད་རྒྱལ་པོ་ང་ཡི་སྤྱོད་པ་ནི། །མ་བཙལ་ལྷུག་པར་གནས་པས་དོན་ཀུན་རྫོགས། །སྙིང་པོའི་དོན་དུ་འདུས་པས་བླང་དོར་མེད། །རེ་དོགས་རྣམ་པར་ཆད་པས་མྱ་ངན་འདས་མི་བསྒོམ། །
iiif viewer powered by OpenSeadragon
