| e-texts navigator |
| Wylie |
73b1 པར་བསྟན། །བསྟན་པ་བརྗོད་བྲལ་རིག་པ་མཚོན་འདས་ལ། །བསྟན་པ་གསུམ་ཡང་དེ་ལ་འདུས་ཏེ་གནས། །མ་བཅོས་རིག་པའི་གཞལ་ཡས་འོག་མིན་ན། །གཞལ་ཡས་གསུམ་ཡང་དེ་ལ་འདུས་པར་བཤད། །ཇི་ལྟར་སྣང་བའི་ཆོས་རྣམས
73b2 ཐམས་ཅད་ཀུན། །སྙིང་པོ་བྱང་ཆུབ་སེམས་ལ་ཀུན་འདུས་པས། །འཁོར་གསུམ་དུས་གསུམ་ཀུན་དུ་འདུས་པར་བཤད། །མ་བསྡུས་རང་བཞིན་འདུ་བའི་ཡེ་ཤེས་ནི། །སྡུད་པ་དེ་ལས་གཞན་པ་ཡོད་མ་ཡིན། །མ་བསྒོམ་རང་བཞིན་བཞག་པའི་ལུང་འདི
73b3 ལ། །བསྒོམ་དུ་ཡོད་དང་མེད་པའི་ལུང་མི་སྟོན། །རེ་དོགས་སྒྲོ་སྐུར་འཛིན་པའི་སེམས་མི་འཇོག་།ཅེས་གསུངས་སོ། །བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་བསྒོམ་དུ་ཡོད་མེད་བསྟན་པའི་ལེའུ་སྟེ་བདུན་ཅུ་པའོ།། །། དེ་ནས་བྱང་ཆུབ་ཀྱི་སེམས་ཀུན
73b4 བྱེད་རྒྱལ་པོས་ལྟ་བ་སྒོམ་མེད་ཀྱི་དགོངས་པ་འདི་གསུངས་སོ། །ཀྱེ་ང་ནི་སྟོན་པ་ཀུན་བྱེད་རྒྱལ་པོ་སྟེ། །ང་ལས་བྱུང་བའི་སྟོན་པ་སྐུ་གསུམ་གྱིས། །མཚན་མ་རྟོག་པས་འདུལ་བའི་གང་ཟག་ལ། །མཚན་མ་རྟོག་པའི་ཏིང་འཛིན་གྲངས་སུ་བསྟན། །ལ
73b5 ལས་ཞི་བའི་ཏིང་འཛིན་བསྒོམ་པར་བྱེད། །ལ་ལས་ཟབ་མོའི་ཏིང་འཛིན་བསྒོམ་པར་བྱེད། །ལ་ལས་ཞི་གནས་ལྷག་མཐོང་འབྲེལ་པ་ཡི། །བདག་མེད་ཏིང་ངེ་འཛིན་ལ་གནས་པར་བྱེད། །ལ་ལ་མཚན་མ་དག་པ་ལ་བརྟེན་ནས། །མཚན་མ་རྗེ་དང་འབངས་སུ
73b6 དམིགས་པར་བྱེད། །ལ་ལ་ལྟ་སྤྱོད་འབྲེལ་མེད་ལ་བརྟེན་ནས། །འབྲེལ་བའི་ཏིང་ངེ་འཛིན་ལ་གནས་པར་བྱེད། །ལ་ལ་མཚན་མེད་དོན་ལ་བརྟེན་བྱས་ཤིང་། །མཚན་མའི་ཏིང་ངེ་འཛིན་ལ་གནས་པར་བྱེད། །ལ་ལས་རང་རྒྱུད་དག་པ་ལ་བརྟེན་ནས། །
73b7 རྣམ་གསུམ་འཕྲོ་འདུའི་དོན་ལ་གནས་པར་བྱེད། །ལ་ལ་རྒྱུ་འབྲས་དག་པ་གཙོར་བྱས་ནས། །འོད་ཀྱི་ཏིང་ངེ་འཛིན་ལ་གནས་པར་བྱེད། །འདི་དག་མཚན་མ་གྲངས་ཀྱི་ཏིང་འཛིན་ཏེ། །སྟོན་པ་ཀུན་བྱེད་རྒྱལ་པོས་ལུང་མ་བསྟན། །ཀྱེ་སྟོན་པ་ཀུན་བྱེད
73b8 ང་ཡིས་ལུང་བསྟན་པ། །མ་ལུས་སྐྱེ་མེད་རྣམ་དག་ཏིང་འཛིན་ཏེ། །བསྒོམ་དང་མི་སྒོམ་རྐྱེན་ལ་རག་མ་ལུས། །བསྒོམ་བྱ་ཇི་ལྟར་སྣང་བའི་ཆོས་རྣམས་ཀུན། །གང་དུ་ཇི་ལྟར་བཞག་པའི་ཚུལ་མེད་པར། །མ་བཙལ་རང་སར་བཞག་པས་བསྒོམས
iiif viewer powered by OpenSeadragon
