| e-texts navigator |
| Wylie |
70b1 དང་དོར་བ་མེད་པའི་དོན་དུ་རྟོགས། །གཙང་དང་མི་གཙང་མེད་པ་ཉིད་དུ་རྟོགས། །སྤྱད་དང་མ་སྤྱད་གཉིས་སུ་མེད་པར་རྟོགས། །མཐའ་དང་དབུས་སུ་འབྱེད་པ་མེད་པར་རྟོགས། །གཞི་རྩ་སྐྱེ་མེད་བྱང་ཆུབ་སེམས་སུ་རྟོགས། །ཀྱེ་ཀུན་བྱེད་རྒྱལ་པོའི་སྤྱོད་པ་བསྟན་པ་ནི། །
70b2 གང་ལྟར་སྤྱད་པ་དེ་ལྟར་མི་འགལ་ཏེ། །བྱས་དང་མ་བྱས་གཉིས་ཀ་སྐྱེ་མེད་པས། །ཤེས་པས་གང་ལྟར་སྤྱད་པ་སྐྱེ་མེད་དོན། །ཀྱེ་ཀུན་བྱེད་རྒྱལ་པོ་ང་ཡི་སྤྱོད་པ་ལ། །མཁའ་ལྟར་གནས་པས་གྲངས་དང་ཚད་གཟུང་མེད། །གཉིས་སུ་མེད་པས་ཡིན་མིན་ཕྱོགས་ལས
70b3 འདས། །ཀུན་བྱེད་བྱང་ཆུབ་སེམས་ཀྱི་སྤྱོད་པར་རྟོགས། །འདོད་པ་ལྔ་ཡང་སེམས་ཀྱི་སྤྱོད་པར་རྟོགས། །ཆགས་སྡང་ལྔ་ཡང་སེམས་ཀྱི་སྤྱོད་པར་རྟོགས། །རྒྱན་གྱི་རྒྱུ་ལྔ་སེམས་ཀྱི་སྤྱོད་པར་རྟོགས། །ཁམས་གསུམ་སྲིད་གསུམ་སེམས་ཀྱི་སྤྱོད་པར་རྟོགས། །
70b4 སྐྱེ་མེད་མ་རྟོགས་པ་ཡི་སྤྱོད་པ་ནི། །རྒྱལ་བ་ཀུན་གྱི་མེས་པོ་ངས་མ་བཤད། །ཀྱེ་དེ་ཕྱིར་སེམས་དཔའ་རྡོ་རྗེ་ཁྱོད་ཀྱིས་ནི། །ཀུན་བྱེད་ང་ཡི་སྤྱོད་པ་འདི་རྟོགས་ལ། །བླང་དོར་མེད་པར་ཀུན་གྱིས་རྟོགས་པའི་ཕྱིར། །ང་ཡི་འཁོར་གྱི་ནང་དུ་ལུང་སྟོན་ཅིག་།ཀུན
70b5 བྱེད་ང་ཡི་སྤྱོད་པ་མ་རྟོགས་པར། །སྐུ་གསུམ་སྟོན་པའི་འཁོར་ལ་གང་ཞེན་པས། །འཇིག་རྟེན་ལོག་པའི་ལྟ་སྤྱོད་ལ་འཆོལ་ནས། །བླང་དོར་མེད་པའི་སྤྱོད་པ་རྟོགས་མི་བྱེད། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །འཁོར་གྱི་ནང་དུ་སྤྱོད་པའི་ལུང
70b6 བསྟན་པ། །མ་ཆགས་བླང་དོར་མེད་པའི་སྤྱོད་པ་ཡིས། །ཐམས་ཅད་སྐྱེ་མེད་མཉམ་པར་རྟོགས་ལུང་བསྟན། །སེམས་དཔའ་རྡོ་རྗེས་འཁོར་ལ་ལུང་བསྟན་པས། །འཁོར་ཀྱང་བླང་དོར་མེད་པར་རྟོགས་པར་འགྱུར། །འཁོར་དང་མྱ་ངན་འདས་པའི་ཆོས་རྣམས
70b7 ནི། །སྐྱེ་བ་མེད་པ་ནམ་མཁའི་རང་བཞིན་ལྟར། །ང་དང་ཁྱོད་ཀྱིས་རྟོགས་པ་ཇི་ལྟ་བར། །ཁྱོད་ཀྱིས་འཁོར་གྱི་ནང་དུ་ལུང་སྟོན་ཅིག་།སྔ་བར་ལུང་བསྟན་ཐོས་པ་ལ་བརྟེན་ནས། །རྟོགས་པ་ཀུན་བྱེད་ཉིད་ལ་གནས་པར་འགྱུར། །ཞེས་གསུངས་སོ། །བྱང
70b8 ཆུབ་ཀྱི་སེམས་ཀུན་བྱེད་རྒྱལ་པོ་ལས་སྤྱོད་པ་བླང་དོར་མེད་པར་རྟོགས་པའི་ལེའུ་སྟེ་དྲུག་བཅུ་དྲུག་པའོ། ། །། དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་ཡེ་ཤེས་རང་ལ་སྒྲིབ་པ་མེད་པར་རྟོགས་པ་འདི་གསུངས་སོ། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ངས། །
iiif viewer powered by OpenSeadragon
