| e-texts navigator |
| Wylie |
70a1 ཀྱང་དོན་དང་མི་ཕྲད་ཀྱི། །རང་བཞིན་རྟོགས་པས་དུས་གཅིག་རྫོགས་པར་བྱེད། །ཀྱེ་ཐེག་གཅིག་ཀུན་བྱེད་བྱང་ཆུབ་སེམས་ཀྱི་ས། །སྐྱེ་མེད་ཁྱབ་པས་རྟོགས་པའི་རང་བཞིན་ནི། །གང་ལྟར་བགྲོད་པ་ནམ་མཁའི་མཐའ་ཚོལ
70a2 འདྲ། །མ་བགྲོད་རང་བཞིན་བཞག་པས་གྲོལ་བར་སྟོན། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ང་། །ས་ཡི་ངོ་བོ་ང་ཉིད་ཤར་བའི་ཕྱིར། །ང་ཡི་ས་ལ་མཐོ་དམན་རིམ་པ་མེད། །ཀུན་བྱེད་ང་ཡི་ས་འདི་རྟོགས་པར་གྱིས། །ང་ཉིད་ཀུན་གྱི
70a3 མདུན་དུ་མངོན་ཕྱུང་ཡང་། །སྐུ་གསུམ་འཁོར་གྱིས་རྣམ་རྟོག་གྲངས་སུ་རྟོགས། །ཀུན་བྱེད་རྒྱལ་པོའི་དགོངས་པ་ཟབ་མོ་ཡང་། །གང་ལྟར་བལྟས་པས་འཐུན་པར་ལུང་མི་སྟོན། །ཀྱེ་ང་ཡི་འཁོར་གྱི་དང་པོ་སྐུ་གསུམ་གྱིས། །རང་རང
70a4 མོས་པའི་འཁོར་ལ་ཆོས་བསྟན་པ། །སྐུ་གསུང་ཐུགས་ཀྱི་ཐེག་པ་རེ་རེ་དང་། །ས་རེ་ལམ་རེ་འབྲས་བུ་རེ་རེ་བསྟན། །ཀུན་བྱེད་ང་ཡི་ས་ལམ་མ་རྟོགས་པ། །རྣམ་གྲངས་ས་དེས་ངེས་པའི་ལམ་མི་རྙེད། །དེས་ན་སེམས་ཉིད་ཀུན་ཐེག་སེམས་ཀྱི
70a5 ས། །རྩ་བའི་ས་ལ་བརྟན་པར་རྟོགས་པར་གྱིས། །ས་ཡི་རང་བཞིན་སྣང་མེད་འདི་རྟོགས་ན། །ཀུན་བྱེད་བྱང་ཆུབ་སེམས་ཀྱི་ས་ལ་གནས། །ཤེས་གསུངས་སོ། །བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལས་ས་ལ་སྦྱང་དུ་མེད་པར་རྟོགས་པའི་ལེའུ་སྟེ
70a6 དྲུག་བཅུ་ལྔ་པའོ། ། །། དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས་སྤྱོད་པ་བླང་དོར་མེད་པར་རྟོགས་པ་འདི་གསུངས་སོ། །ཀྱེ་ང་ནི་སྟོན་པ་ཀུན་བྱེད་རྒྱལ་པོ་སྟེ། །ང་ལས་བྱུང་བའི་སྟོན་པ་སྐུ་གསུམ་གྱིས། །ལ་ལས་དགེ་སྤྱད་སྡིག་པ་དོར་བར
70a7 རྟོགས། །ལ་ལས་གཙང་སྨེ་བླང་དོར་གཉིས་སུ་རྟོགས། །ལ་ལས་གཙང་སྨེ་གཉིས་ཀ་སྤྱད་པར་རྟོགས། །སྤྱད་དང་མ་སྤྱད་མེད་པའི་དོན་མ་རྟོགས། །གང་དག་སྤྱོད་པ་འདི་ལ་གནས་པ་ནི། །རང་རང་གཉེན་པོའི་རྟོགས་པ་བྱང་བ་ཡིས། །
70a8 དམིགས་པ་ཡིད་ལ་སྦྱངས་པ་རྟོགས་པར་འགྱུར། །བླང་དོར་མེད་པའི་སྤྱོད་པ་རྟོགས་མི་འགྱུར། །ཀྱེ་ཀུན་བྱེད་རྒྱལ་པོའི་སྤྱོད་པ་བསྟན་པ་ནི། །དགེ་སྡིག་བླང་དོར་གཙང་སྨེ་ཆེ་ཆུང་ཀུན། །སྐྱེ་མེད་བྱང་ཆུབ་སེམས་སུ་ཀུན་གཅིག་པས། །བླང
iiif viewer powered by OpenSeadragon
