| e-texts navigator |
| Wylie |
64b1 ཀུན་བྱེད་ང་ཡི་མཚན་བཤད་བཞིན། །ཁྱོད་ཀྱིས་ང་ཡི་རང་བཞིན་ཟུང་། །ང་ནི་ཀུན་གྱི་རང་བཞིན་ཡིན། །སངས་རྒྱས་མེས་པོ་ང་ཡིན་གྱིས། །སངས་རྒྱས་ཀུན་གྱི་མེས་པོ་གྱིས། །ཀུན་བྱེད་རྒྱལ་པོ་ང་ཉིད་ནི། །སྐུ་གསུམ་སྟོན་པའི་ཕ་ཡིན་གྱིས། །
64b2 ཁྱོད་ཀྱིས་སྐུ་གསུམ་ཕ་མ་གྱིས། །དུས་གསུམ་སངས་རྒྱས་མེས་པོ་གྱིས། །སེམས་ཅན་ཀུན་གྱི་ཡང་མེས་པོ། །སྨྲ་བའི་སེང་གེ་སྨྲ་བའི་ཚེ། །ཇི་ལྟར་སྣང་བའི་ཆོས་རྣམས་ཀུན། །སེམས་དཔའ་ཆེན་པོ་ཉིད་དང་ནི། །ཀུན་བྱེད
64b3 རྒྱལ་པོ་ང་ལས་ནི། །གཞན་ཡིན་སྨྲ་བར་མ་བྱེད་ཅིག་།སྐུ་གསུམ་བསྟན་པའི་ནང་ནས་ནི། །རྒྱུ་དང་འབྲས་བུ་རྣམ་གཉིས་ལས། །རྒྱུ་ལ་བསྒྲུབས་ནས་འབྲས་བུར་འདོད། །སེམས་ཅན་སངས་རྒྱས་མིང་བཏགས་ནས། །སེམས་ཀྱིས
64b4 སངས་རྒྱས་འབྲས་བུར་སྒྲུབ། །འདི་ནི་ང་ཡི་བསྟན་པ་མིན། །ཀུན་བྱེད་ང་ཡི་རང་བཞིན་ནི། །རྒྱུ་དང་འབྲས་བུ་གཉིས་ལས་འདས། །སེམས་ཅན་སངས་རྒྱས་གཉིས་མེད་པས། །སངས་རྒྱས་སེམས་ཀྱིས་སྒྲུབ་མ་བྱེད། །ཀུན་བྱེད་རྒྱལ་པོ་ང་ཉིད་ནི། །
64b5 སེམས་ཉིད་རང་འབྱུང་ཡེ་ཤེས་སོ། །ཞེས་གསུངས་སོ། །བྱང་ཆུབ་ཀྱི་སེམས་ཀུན་བྱེད་རྒྱལ་པོའི་མདོ་ལས་བསྟན་པ་གཏད་པའི་ལེའུ་སྟེ་ལྔ་བཅུ་རྩ་བདུན་པའོ།། །།བྱང་ཆུབ་ཀྱི་སེམས་ཀུན་བྱེད་རྒྱལ་པོ་རྫོགས་སྷོ།། །།རྒྱ་གར་གྱི་མཁས་པ་ཤྲཱི་སིཾ
64b6 ཧ་པྲ་བྷཱ་དང་། བོད་ཀྱི་ལོ་ཙྪ་བ་པ་གོར་བཻ་རོ་ཙ་ནས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།ཡང་ཞུས་སྔགས། དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོ་རང་འབྱུང་ཡེ་ཤེས་སྐྱེ་བ་མེད་པར་རྟོགས་ནས་ཅང་མི་གསུང་བར་བཞུགས་སོ། །
64b7 དེ་ནས་སེམས་དཔའ་རྡོ་རྗེ་དམ་པ་དེས་འདི་སྐད་ཅེས་ཞུས་སོ། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ལགས། །ལེགས་པར་གསུང་བའི་མདོ་དག་མཐར་ཕྱིན་ནས། །སྟོན་པ་གསུམ་པོ་ཉིད་ཀྱིས་ཇི་ལྟར་རྟོགས། །བསྟན་པ་གསུམ་པོ
64b8 ཉིད་ཀྱིས་ཇི་ལྟར་རྟོགས། །འཁོར་གནས་དུས་ཀྱི་རང་བཞིན་ཇི་ལྟར་རྟོགས། །ཉིད་ཀྱིས་ཇི་ལྟར་རྟོགས་པའི་དགོངས་པའི་དོན། །བདག་ཅག་རྣམས་ལ་ལེགས་པར་བསྟན་དུ་གསོལ་ཞེས་ཞུས་སོ། །དེ་ནས་བྱང་ཆུབ་ཀྱི་སེམས་ཀུན་བྱེད
iiif viewer powered by OpenSeadragon
