| e-texts navigator |
| Wylie |
257b1 འདི་ལྟ་སྟེ། སྦྱོར་བ་དང་། མི་གནས་པ་དང་། བསྐྱོད་པ་དང་། བསྒྱུར་བ་དང་། རྩལ་དང་། འབྱུང་བ་དང་། འཇུག་པ་དང་། སྒོ་དང་། ཤེས་པ་དང་། གནས་དང་། རིག་པ་དང་། ལམ་དང་། འཇུག་པ་དང་། ཡེ་ཤེས་དང་། ཁྱབ་པའི་རྣམ་པ་དེ་དག་ཀྱང་དགོངས་པ་དམ་པ་དེ་ཁོ་ན་ཉིད་དུ
257b2 མཐར་ཕྱིན་ཅིང་ཕུལ་དུ་གྱུར་པ་ཡིན་པའོ། །གཞན་ཡང་མཐོང་བ་དང་། མ་ཡེངས་པ་དང་། དོན་དང་། ཚིག་དང་། སྔགས་དང་། ཡི་གེའི་སྒོ་རྣམ་པ་དེ་དག་ཀྱང་དགོངས་པ་དམ་པ་དེ་ཁོ་ན་ཉིད་དུ་མཐར་ཕྱིན་ཅིང་ཕུལ་དུ་གྱུར་པའོ། །གྲོགས་པོ་དག་དེ་དག་ནི་བྱ་བ་བྱེད་པའི
257b3 རྣལ་འབྱོར་དུ་ཤེས་པར་བྱའོ། །ཀྱེ་གྲོགས་པོ་དག་བྱ་བ་མེད་པའི་རྣལ་འབྱོར་གང་ཞེ་ན། འདི་ལྟ་སྟེ། ས་དང་། བསླབ་པ་དང་། སྦྱོར་བ་དང་། རྟོག་པ་དང་། ལྟུང་བ་དང་། མ་ནོར་བ་དང་། ངེས་པ་དང་། དགོངས་པ་དང་། ཡེ་ཤེས་དང་། ཚོགས་དང་། བསྒྲུབ་པ་དང་། དངོས་སྒྲུབ
257b4 དང་། ཏིང་ངེ་འཛིན་དང་། ཆེན་པོ་དང་། ཡེ་ཤེས་དང་། བྱུང་ཚུལ་དང་། ཆེ་བ་དང་། རོལ་པ་དང་། རྔོམ་པ་དང་། བརྗིད་པ་དང་། མཐུ་དང་། ཆོ་འཕྲུལ་དང་། ཡོངས་སུ་རྫོགས་པའི་རྣམ་པ་དག་དགོངས་པ་དམ་པ་དེ་ཁོ་ན་ཉིད་མཐར་ཕྱིན་ཅིང་ཕུལ་དུ་གྱུར་པར་བྱའོ། །དེ་ཡང
257b5 ཇི་ལྟ་ཞེ་ན། གྲོགས་པོ་དག་འདི་ལྟ་སྟེ། ཇི་ལྟར་མཐོན་རི་རྩེ་དག་ལ། །སྒྱིད་མི་ལུག་པར་བརྩོན་འཛེགས་ན། །མཐོན་སེར་སྣང་མཐོང་ཀུན་གསལ་བས། །ཐམས་ཅད་ཀུན་སྣང་ལམ་ལ་མཁས། །དེ་བཞིན་ཤེས་རབ་མཐོན་རི་ལ། །བརྩོན་པ་དམ་པས
257b6 ཀུན་བལྟས་ན། །ཀུན་གྱི་ཕུལ་དུ་ཤེས་རབ་ཕྱིན། །མཁས་པའི་ཡེ་ཤེས་ཚད་མེད་དོ། །དོན་ལ་མཁས་པར་བྱ་བ་དེ། །ཕུལ་དུ་བྱུང་བའི་བསླབ་པ་སྟེ། །དགོངས་པ་དམ་པ་དེ་ཉིད་ལ། །མཁས་པར་བྱ་བ་རབ་ཏུ་གཅེས། །གྲོགས་པོ་དག་དེ་དག་ནི་མཐར་ཕྱིན
257b7 པར་བྱ་བ་རབ་ཏུ་ཤེས་པར་བྱའོ། །དེ་སྐད་ཅེས་སྨྲས་པས། དམན་པའི་ལུས་ཀྱི་སེམས་དཔའ་རྣམས་ཀུན་གྱི་ཕུལ་དུ་གྱུར་པར་དགོངས་པ་དམ་པ་དེ་ཁོ་ན་ཉིད་ལ་བཟོད་པ་ཐོབ་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ
257b8 ལས་བསམ་གྱིས་མི་ཁྱབ་པ་བསྟན་པའི་ལེའུ་ཞེས་བྱ་སྟེ་དྲུག་བཅུ་དགུ་པའོ། ། །། དེ་ནས་ཡང་གསང་བ་པའི་བདག་པོས་དམ་པ་རྣམས་ལ་སྨྲས་པ། གྲོགས་པོ་དག་ཐམས་ཅད་དུ་འདུ་བར་བྱས་པ་ནི་འདི་ལྟ་སྟེ། བྱ་བ་དང་། རང་བཞིན་དང་། བསྒྱུར་བས་སོ། །
iiif viewer powered by OpenSeadragon
