| e-texts navigator |
| Wylie |
254b1 ཀུན་དུ་འཐུན་པར་བཟང་བརྗོད་པའི། །སྐྱེས་བུ་གང་ཡིན་དེ་ལྟར་བྱ། །ཀུན་གྱིས་འཐུན་པར་མ་སྔགས་པའི། །ཐ་ཤལ་གང་ཡིན་དེ་སྤྱོད་སྤང་། །དཀྱིལ་འཁོར་ལ་སོགས་སྦྱིན་སྲེག་དང་། །སློབ་མ་གཟུང་དང་ཆོས་སྨྲ་བ། །ལུང་མ་བྱུང་བར་མི་བརྩམ་སྟེ། །
254b2 དམ་པའི་ཡུལ་ནས་དེ་མི་རིགས། །གལ་ཏེ་གཞན་གྱི་དོན་བྱས་ན། །དེ་ཡི་ཡོ་བྱད་མི་སྤྱད་དེ། །དེ་ཀུན་དམ་པ་དེ་ལ་དབུལ། །དམ་པས་ཅི་བླངས་ལྷག་མ་བླང་། །དམ་པའི་སློབ་མ་སློབ་མར་ཡང་། །དམ་པའི་མདུན་དུ་མི་རིགས་སོ། །བཀུར་སྟི་སྲི་ཞུ་ལ
254b3 སོགས་མིན། །གང་ཡིན་དམ་པ་དེ་ཉིད་མངའ། །སྙིང་རྗེས་དམ་པས་ཅི་གནང་བ། །སྲི་ཞུ་མདུན་བསུ་ལག་གཉིས་ཀྱིས། །བློ་དང་ལྡན་པས་བླང་བར་བྱ། །རྨུགས་མེད་དྲན་གསལ་རབ་བསྒྲིབས་ནས། །རང་གི་སྤྱོད་ལམ་འདའ་མི་བྱ། །
254b4 བློ་གྲོས་ལྡན་པའི་ཉི་མ་དེས། །དམ་པ་ལྷ་ལྟར་མཆོད་བྱའི་ཕྱིར། །མཉེས་པར་བྱ་བའི་ཡོ་བྱད་བརྒྱད། །དམ་པ་དེ་ལ་རྫོགས་པར་དབུལ། །སྐྱོ་དུབ་མེད་པའི་དད་པ་དང་། །གྱོང་ཁེངས་མེད་པའི་མཉེན་ལྕུག་དང་། །སེར་སྣ་མེད་པའི
254b5 ཟང་ཟིང་དང་། །སོམ་ཉི་མེད་པའི་སྲི་ཞུ་དང་། །གཡོ་སྒྱུ་མེད་པའི་དྲང་རྐན་དང་། །ཁ་གསག་མེད་པའི་རང་རྒྱུད་དང་། །རྨོངས་པ་མེད་པའི་ཤེས་རབ་དང་། །དྲི་མ་མེད་པའི་ལྷག་སེམས་བརྒྱད། །དམ་པ་དེ་ལ་རྫོགས་པར་དབུལ། །དམ་པས་བསྒོ་བ
254b6 བསླབ་པའི་མཐའ། །ཆུབ་པར་རྫོགས་པས་རྒྱུད་དགྲོལ་ཏེ། །ཤེས་བྱ་ཀུན་ལ་ཐོགས་མེད་འགྲོ། རང་རྒྱུད་མདུད་པ་དགྲོལ་བ་ཡི། །ཤེས་རབ་མཁའ་ལ་བྱ་བཞིན་རྒྱུ། །མཐར་ཆིབ་རྒྱུད་དགྲོལ་ཡུལ་སྤངས་ཏེ། །རྒྱལ་སྲིད་དང་ནི་རང་གི་ལུས། །
254b7 བུ་དང་ཆུང་མ་ནོར་གྱི་དབྱིག་།རབ་ཏུ་གཅེས་དང་ཡིད་འཐད་པའི། །ནོར་མཆོག་དམ་པ་དེ་ལ་དབུལ། །རང་གི་ལུས་ཀྱང་ཅི་རིགས་པར། །རིན་ཐང་གང་ཡིན་ནོར་གྱིས་བླུ། །དེ་ནས་ཇི་བཞིན་གར་བདེ་བར། །རྣལ་འབྱོར་ཡང་དག་འཇོག་ལ་ཞུགས། །
254b8 སྔོན་གྱི་དམ་པ་དམ་པ་རྣམས། །བདེ་བར་གཤེགས་པའི་རྗེས་སུ་འགྲོ། །སྔོན་གྱི་དམ་པ་བདེ་གཤེགས་རྣམས། །དེད་དཔོན་དམ་པ་མཉེས་བྱས་ནས། །ཀུན་སྤངས་དགོན་པའི་མཐར་གཤེགས་པས། །ཉིད་ལས་དམ་པ་མཉེས་པར་འགྱུར། །
iiif viewer powered by OpenSeadragon
