| e-texts navigator |
| Wylie |
244a1 འཐུན་འཇུག་སྤྱོད། །འདོད་ལ་ཆགས་པས་ཁྲོ་འགྱུར་ལ། །ཁྲོ་བར་འདོད་ལས་ཁྲོ་བར་སྣང་བ་གང་ཡིན་ལ། །ཁྲོ་བ་མེད་ལས་ཁྲོ་བར་སྣང་བ་འཐུན་འཇུག་སྤྱོད། །འདོད་ལ་ཆགས་པས་མུན་སྣང་ལ། །མུན་པར་འདོད་ལས་མུན་པར་གྱུར་པ་གང་ཡིན
244a2 ལ། །མུན་པ་མེད་ལས་མུན་པར་སྣང་བ་འཐུན་འཇུག་སྤྱོད། །ཇི་ལྟར་གང་ལྟར་དེ་བཞིན་དུ། །དེ་ལ་སོགས་པ་མཐའ་ཡས་པར། །ཐམས་ཅད་ཐམས་ཅད་དེར་སྣང་བ། །འཐུན་འཇུག་སྤྱོད་པས་དོན་བྱེད་ཡིན། །ལང་ཀའི་བདག་པོ་དེ་དག་ནི་འཐུན་པར
244a3 འཇུག་པར་བྱའོ་ཞེས་དེ་སྐད་ཅེས་སྨྲས་པས། ལང་ཀའི་བདག་པོ་ལ་སོགས་པ་དམན་པ་དམ་པ་རྣམས་མཐའ་ཐུག་པ་མེད་པའི་ལྟ་སྤྱོད་ལ་ཡོངས་སུ་རྟོག་པ་མེད་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་སྒྱུ་མ་རོལ
244a4 པས་རྣམ་པར་རོལ་པས་རྣམ་པར་གྲོལ་བའི་ལེའུ་ཞེས་བྱ་སྟེ་དྲུག་བཅུ་བཞི་པའོ། ། །། དེ་ནས་ཡང་ལང་ཀའི་བདག་པོས་གསང་བ་པའི་བདག་པོ་ལ་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ནད་གསོ་བར་བྱའོ་ཞེས་དམ་བཅའ་དགོངས
244a5 པ་དེ་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་ཡོངས་སུ་དྲིས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ་འདི་ལྟར་གྲོང་ཁྱེར་གསུམ་གྱི་ནད་པ་གསོ་བར་བྱའོ། །ནད་ཀྱི་གཞི་རྩ་ལ་མཁས་པར་བྱའོ། །ནད་སྦྱང་བའི་ཐབས་ལ
244a6 བརྩོན་པར་བྱའོ། །སྨན་པ་དམ་པ་རྣམས་བསྟེན་པར་བྱའོ། །གཉེན་པོ་དམ་པའི་སྨན་བསྲེལ་ཞིང་སྤེལ་བར་བྱའོ། །སྨན་སྦྱར་བ་ལ་མཁས་པར་བྱའོ། །སྨན་གྱི་ལམ་བསྲུང་བར་བྱའོ། །ནད་པའི་ཚོགས་དང་མི་འབྲལ་བར་བྱའོ། །ནད་ཀྱི་རྒྱུན་གཅད
244a7 པར་བྱའོ། །ནད་ཀྱི་གཉེན་པོར་འགྱུར་བར་བྱའོ། །ལང་ཀའི་བདག་པོ་དེ་ལ་གྲོང་ཁྱེར་གསུམ་ནི་མི་སྣང་བའི་གྲོང་ཁྱེར་དང་། ཀུན་སྣང་བའི་གྲོང་ཁྱེར་དང་། །ཕྱེད་སྣང་བའི་གྲོང་ཁྱེར་རོ། །ནད་ཀྱི་གཞི་རྩ་ནི་མུན་པ་ཆེན་པོ་ལས་བྱུང་བའི་ཟུག་རྔུའོ། །ནད་སྦྱང་བའི
244a8 ཐབས་ནི་སྨན་དང་སྨན་པར་སྦྱོར་བའོ། །སྨན་དམ་པ་ནི་བཤེས་གཉེན་དམ་པའོ། །གཉེན་པོ་དམ་པའི་སྨན་ནི་ཞི་གནས་ལྷག་མཐོང་ངོ་། །སྨན་སྦྱར་བ་ནི་དེ་དག་དེ་ཉིད་དུ་སྦྱོར་བའོ། །སྨན་གྱི་ལམ་གསུང་བ་ནི་དེ་བཞིན་ཉིད་ལས་མི་འདའ་བའོ། །ནད་པའི་ཚོགས
iiif viewer powered by OpenSeadragon
