| e-texts navigator |
| Wylie |
237b1 རིན་ཆེན་སྒྲོན་མ་འབར་བའི་མེ། །མུན་སྣང་དམིགས་བུར་མ་བསྲེལ་བར། །དེ་ཉིད་གསེར་མཐོང་ག་ལ་རིགས། །གྲོགས་པོ་དག་དེ་དག་ནི་སྒྲོན་མ་དམ་པ་བསྲེལ་བར་བྱའོ་ཞེས་དགོངས་པ་དམ་པ་ལགས་པ་བགྲོས་པ་ཤེས་པར་བྱའོ། །
237b2 སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་རྣལ་འབྱོར་མིག་གི་སྒྲོན་མ་བསྟན་པའི་ལེའུ་སྟེ་དྲུག་བཅུ་པའོ།། །། དེ་ནས་ཡང་ལང་ཀའི་མངའ་བདག་ལ་སོགས་པ་དམན་པ་དམ་པའི་སེམས་དཔའ་ཆེན་པོ་རྣམས་ཀྱིས་དྲི་བ
237b3 ཡོངས་སུ་དྲིས་པ། ཀྱེ་གསང་བ་པའི་བདག་པོ་ཁྱད་པར་དུ་བླ་མར་འགྲོ་བར་བྱའོ་ཞེས་དམ་བཅའ་བར་དགོངས་པ་དེ་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་གསོལ་པ་ལས། གསང་བ་པའི་བདག་པོས་སྨྲས་པ། ཀྱེ་གྲོགས་པོ་དག
237b4 ཁྱད་པར་དུ་འགྲོ་བར་བྱ་བ་དེ་ནི་ལེགས་སོ། །ཤིན་ཏུ་རབ་ཏུ་ལེགས་སོ། །ས་དེ་ནི་འདི་ལྟར་ས་མཁན་དམ་པ་རྣམས་ཀྱི་རྣལ་འབྱོར་གྱིས་ཡོངས་སུ་སྣང་བ་ཞེས་བྱ་བའི་སྒྲོན་མ་ལེགས་པར་བཀོད་པ་ནི་འདི་ལྟ་སྟེ། ས་དང་སའི་ཁྱད་པར་ནི། །གང
237b5 འདིར་ཡོངས་ཀྱིས་མེད་པ་ལ། །ཤེས་བྱ་གཅོད་པའི་ཁྱད་པར་གྱིས། །རང་རིག་མཐོ་དམན་རིམ་པར་ཟད། །དཔེར་ན་རྒྱལ་པོའི་དཀོར་མཛོད་ནས། །ཆེ་ཆུང་ཐབས་འདོད་གང་སུ་དག་།དཀའ་ཐུབ་ཕྱི་ནང་ཁྱད་པར་གྱིས། །སྤྱོད་སྒོ་འཇུག
237b6 པའི་ལས་ཐབས་ལས། །མཐོ་དམན་རྩལ་གྱིས་གང་ལེན་པ། །རྒྱལ་པོ་གཅིག་ལ་སྤྱོད་ན་ཡང་། །རིན་ཆེན་སྣ་འགའ་ཁྱད་པར་དག་།ཐབས་ཆེན་སྒོ་དགུ་སོ་སོར་སྤྱོད། །རྒྱལ་པོར་གྱུར་ན་དེ་ནོར་ཀུན། །དབང་སྐུར་བྱེད་པའི
237b7 བདག་པོ་ཡིན། །མི་གནས་མ་བཅོས་དེ་བཞིན་ཉིད། །ཤེས་བྱ་དེ་ལས་མེད་པ་ལ། །གང་འདི་རྩལ་གྱི་ཁྱད་པར་གྱིས། །སོ་སོའི་འཇུག་སྒོ་ཀུན་ནས་སྤྱོད། །དེ་ཡི་དེ་ཉིད་དེ་གཅིག་ལ། །རྩལ་འཕང་མཐོ་དམན་ཁྱད་པར་གྱིས། །
237b8 ས་ཡི་གོ་འཕང་ཁྱད་པར་དུ། །རིག་པ་དེ་ལྟར་སྣང་བ་ཡིན། །གང་འདིར་ཐམས་ཅད་གཅིག་པ་ལ། །དེ་མཐོང་མི་མཐུན་དེ་དབང་གིས། །དཔེར་ན་འབྱུང་གནས་སྒོ་མངས་བཞིན། །ས་དང་རྣམ་ཐར་སོ་སོའི་སྒོ། །གཅིག་ལ
iiif viewer powered by OpenSeadragon
