| e-texts navigator |
| Wylie |
228b1 བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། གསང་བ་པའི་བདག་པོ་ལ་ཡང་ཡོངས་སུ་དྲི་བ་དྲིས་པ། ཀྱེ་གསང་བ་བའི་བདག་པོ་རྩ་བ་གང་ལ་གང་གི་སྣང་བ་ཡོངས་སུ་དག་པའི་སྤྱོད་ཡུལ་གང་ལགས། །དེ་སྐད་ཅེས་གསོལ
228b2 བ་ལས། །གསང་བ་པའི་བདག་པོས་སྨྲས་པ། །ལང་ཀའི་བདག་པོ་གང་ཡོངས་སུ་དག་པའི་དྲི་བ་དེ་ནི་ལེགས་སོ། །ཤིན་ཏུ་རབ་ཏུ་ལེགས་སོ། །ལང་ཀའི་བདག་པོ་དེ་ཡང་འདི་ལྟར་བཅོམ་ལྡན་འདས་ངོ་བོ་ཉིད་དག་པ་སྟེ། ཡོངས་སུ་དག་པ་ཞེས་བྱ་བའི
228b3 ཞིང་ཁམས་ན་ངང་གིས་བཞུགས་པ་དེའི་ཚེ་དེའི་དུས་ན་གང་དཔག་ཏུ་མེད་པའི་རྒྱལ་བ་དགོངས་པ་ཀུན་ནས་འདུས་པ་དག་ལ་གང་སྣང་བ་ཡོངས་སུ་དག་པའི་སྤྱོད་ཡུལ་དུ་དགོངས་ཏེ། དེ་ཁོ་ན་ཉིད་སྣང་བ་དེ་ཁོ་བོས་ཕྱིན་ཅི་མ་ལོག་པར
228b4 ཡོངས་སུ་བགྲོ་བར་བྱའོ། །ལང་ཀའི་བདག་པོ་འདི་ལྟ་སྟེ། མུན་ཁུང་གསེར་སྟོར་སྒྲོན་མས་རང་སྣང་ལྟར། །མ་རིག་མུན་པར་སེམས་སྟོར་རང་སྣང་བ། །དགོངས་པ་ཀུན་ནས་འདུས་པའི་རྩ་བ་འདི། །སྔ་རབས་འདས་པའི་དགོངས་པར་འདུས་ནས་གསུངས། །
228b5 ཆོས་ཀུན་རྩ་བ་སེམས་འདི་ཉིད་ལ་འདུས། །སེམས་ཉིད་གནས་འགྱུར་ཡེ་ཤེས་ལྔར་སྣང་བ། །དེ་ཉིད་དོན་ལ་ངེས་པར་བཞག་པས་ན། །སེམས་ཉིད་གནས་འགྱུར་བ་ཡང་དེ་ཉིད་ཡིན། །ཡེ་ཤེས་ལྔ་ཉིད་དེ་ལ་རྫོགས་པས་ན། །ཡེ་ཤེས་ལྔ་ཡང་གཅིག
228b6 ཏུ་འདུས་པ་ཡིན། །སེམས་ཀྱི་ཆོས་ཉིད་ཇི་བཞིན་དེ་རྟོགས་ན། །ཡེ་ནས་སངས་རྒྱས་མ་ནོར་མ་བཅོས་པར། །བདལ་ཁྱབ་ས་ཉིད་ནོན་པས་འདུས་པར་གསུངས། །གནས་སྐབས་དེ་ན་ཡོད་མེད་ལྟ་མཐར་ཐུག་།སེམས་ཀྱི་དེ་བཞིན་ཇི་ལྟར་ཡིན
228b7 པ་དང་། །དེང་རྒྱུན་ཡོད་མེད་ཤེས་པར་བྱ། །དེ་བཞིན་ཉིད་ལ་གང་འདིར་ཇི་ལྟར་བལྟ། །དེ་ཉིད་སྣང་བ་ཡིན་ནམ་མི་སྣང་བ། །འོ་ན་སངས་རྒྱས་ཡིན་ནམ་སངས་རྒྱས་མིན། །དེ་ལས་གཞན་ན་སངས་རྒྱས་ཡོད་དམ་མེད། འདི་ལྟར་ཅིར་བཞག
228b8 གྲོས་ཀྱིས་ཆོད་པར་བྱ། །འདི་ལྟར་ངེས་ནས་དེ་ལྟར་གྱུར་ན་ཡང་། །གློ་བུར་ལས་ལམ་མི་དགག་དེ་བཞིན་སྤྱད། །དེས་ན་ཀུན་གྱི་རང་བཞིན་དེ་ཉིད་འདུས། །དེ་ལ་བསམ་མེད་དམིགས་མེད་དེར་བཞག་ན། །ཅིར་སྣང་ཅིར་སྲིད་མཚན་མེད་དེ
iiif viewer powered by OpenSeadragon
