| e-texts navigator |
| Wylie |
200b1 ངན་ལས་རྒྱུད་གཅད་པའི་ཕྱིར། །རང་བཞིན་ཆོ་འཕྲུལ་མངོན་འབྱུང་བ། །ཁྲོས་ན་ཟ་བྱེད་ལྔ་ཁྲོས་པས། །མ་ལུས་བསྒྲལ་ནས་སྟོངས་མཛད་ཕྱིར། །ནམ་མཁའ་ཁྲོ་བོ་ཟ་བྱེད་ཆེ། །ཐམས་ཅད་ཐིམ་པས་སྟོངས་པར
200b2 མཛད། །དེ་བཞིན་ཉིད་དུ་བསྒྲལ་བའི་མཆོག་།སྲིད་ཞི་འཚོ་བྲལ་བསྐལ་པ་ཡིས། །ཞེན་པས་ཆགས་པའི་ལས་རྒྱུད་གཅོད། །བཟོད་ལྡན་རྨོངས་པའི་བསྐལ་པ་ཡིས། །སེམས་དང་ཡིད་ཀྱི་ལས་རྒྱུད་གཅོད། །ཐབས
200b3 འཛིན་མཚོན་ཆའི་བསྐལ་པ་ཡིས། །དངོས་པོ་དངོས་པོ་ཐམས་ཅད་གཅོད། །ལྷག་མཐོང་མེ་ཡི་བསྐལ་པ་ཡིས། །ཉོན་མོངས་དངོས་པོ་ཐམས་ཅད་སྲེག་།ཞི་གནས་ཆུ་ཡི་བསྐལ་པ་ཡིས། །ཉོན་མོངས་དྲི་མ་ཐམས་ཅད
200b4 འཁྲུ། །ཐོགས་མེད་རླུང་གི་བསྐལ་པ་ཡིས། །ཤེས་བྱ་ཐམས་ཅད་ཀུན་དུ་བསྐྱོད། །ཤེས་རབ་ནམ་མཁའི་བསྐལ་པ་ཡིས། །མཚན་མའི་རྒས་རྒུད་ཐམས་ཅད་སྟོངས། །ལས་ངན་མྱུར་དུ་རྒྱུན་བཅད་ན། །གནས་ངན་དག་ལས
200b5 མྱུར་དུ་སྒྲོལ། །ཐབས་དང་ཐེག་པ་གང་དག་ལས། །ཐ་མའི་ཐ་མ་ཡིན་པར་བཤད། །སྙིགས་མར་གྱུར་པའི་སྐབས་རྣམས་སུ། །འདུལ་བ་རྣམས་གཉིས་ནུབ་པས་ན། །ཉོན་མོངས་རྣམས་ནི་དངོས་པོར་སྣང་། །འདས་ནས་ནུབ་པོ
200b6 ཞེས་པ་ལ། །མ་འདས་མ་ནུབ་དེ་ཉིད་ནི། །དུས་དེར་ཤུགས་ཀྱིས་འདུལ་བ་ཡིན། །ལང་ཀའི་བདག་པོ་དེ་ལྟར་ན། །འདི་ཀུན་གསང་བ་དམ་པ་ཡི། །དབྱིངས་ལས་གར་ཡང་མ་གཡོས་ཤིང་། །སྟོང་པ་ཁོ་ནའི་དབྱིངས་ཉིད
200b7 ལས། །སྟོང་པའི་ཆོས་རྣམས་བྱུང་བར་ཟད། །སྟོང་ཉིད་གསང་བ་དེ་ཁོ་ན། །ཐེག་ཆེན་གསང་བ་དེ་ཉིད་དོ། །གསང་བའི་བདག་པོས་དེ་སྐད་ཅེས་བརྗོད་པས་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས
200b8 པ་རྣམས་ཐམས་ཅད་གསང་བ་དམ་པ་ཉིད་དུ་ངེས་པའི་སོམ་ཉི་མེད་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་ཆོ་འཕྲུལ་སྔོན་བྱུང་གི་ལེའུ་ཞེས་བྱ་སྟེ་བཞི་བཅུ་རྩ་བཞི་པའོ།། །།
iiif viewer powered by OpenSeadragon
