| e-texts navigator |
| Wylie |
184b1 ཐབས་ཀྱི་སྤྲིན་ཆེན་པོས་སྤྱད་པ་སྤྱོད་པ་ལ་མཁས་པར་གྱིས་ཤིག་། དེ་སྐད་ཅེས་བཀའ་སྩལ་པ་དང་། འདུས་པའི་ཚོགས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དུ་གསང་སྔགས་ལོག་པའི་ལམ་པ་ནི་གང
184b2 ལགས། གང་མ་ནོར་བའི་ལམ་པ་ནི་གང་ལགས། བདག་ཅག་རྣམས་ལ་རྒྱ་ཆེར་བཤད་དུ་གསོལ། དེ་སྐད་ཅེས་གསོལ་པ་དང་། ལང་ཀའི་བདག་པོ་བཅོམ་ལྡན་འདས་དེས་འདུས་པ་ཆེན་པོའི་ཚོགས་ལ་བཀའ་སྩལ་པ།
184b3 འདུས་པ་ཆེན་པོའི་ཚོགས་འདི་ལྟ་སྟེ། བརྒྱུད་དེ་གྲགས་པས་གང་སྤྱོད་པ། གསང་སྔགས་གསང་བའི་སྙིང་པོ་འདི། །ཇི་ལྟ་དེ་ལྟར་གཏན་ལ་དབབ། །འདི་ནི་ཡང་དག་གསང་བའི་ལམ། །གང་དུ་ལོག་པའི་ཆོས་རྣམས་དང་། །གསང
184b4 སྔགས་གསང་བའི་སྙིང་པོ་གཉིས། །བཏགས་པ་མིང་གི་སྒྲ་གཅིག་ཕྱིར། །ངེས་པའི་རྟགས་དེ་ཟིན་པར་བྱ། །ཐེག་པ་ཆེན་པོའི་གསང་སྔགས་འདི། །འཐུན་འཇུག་ཐབས་ཀྱི་སྒྲར་བསྟན་པས། །ཕྱི་རོལ་གཞན་དུ་འགྱུར་སྲིད་ཕྱིར། །
184b5 ཚིག་དང་སྒྲ་ལ་དོན་མི་བཞག་།དམ་པ་རྣམས་ཀྱི་དགོངས་པ་འདི། །དཔེ་འམ་ཚད་མ་འམ་གཏན་ཚིགས་སམ། །རྗེས་སུ་དཔག་པའི་ཤེས་རབ་ཀྱིས། །རྟོགས་པར་ནུས་པ་མ་ཡིན་ནོ། །དགོངས་དོན་གསང་བའི་སྙིང་པོ་ལ། །གང་གི་བློ་ནི
184b6 མ་འབྱོར་པར། །སུ་ཞིག་སྨྲ་བར་བརྩོན་པ་དེ། །མ་སྨྲས་ན་ནི་མི་འཚོ་འམ་ཅི། །དེ་བཞིན་སྤྱོད་དང་ལྡན་པ་དང་། །སྒྲུབ་དང་རྟོག་དཔྱོད་བྱེད་པ་རྣམས། །དོན་ལ་ངེས་བློ་མ་རྙེད་པར། །མ་སྤྱད་ན་ནི་ཅི་ཞིག་ཉེས། །ཅི་ཕྱིར་གསང་སྔགས་རྒྱ
184b7 མཚོ་འདི། །དཔེར་ན་གང་གི་སྦྲིད་བསངས་བཞིན། །དམ་པའི་བཀའ་ཚིག་རེ་རེ་ལ་འང་། །དོན་ནི་ཐ་དད་དུ་མར་འབྱུང་། །དེས་ན་གསང་སྔགས་དམ་པའི་དོན། །མ་རྟོགས་བཞིན་དུ་གང་སྨྲ་བ། །གང་གིས་མཚམས་མེད་ལྔ་བྱས
184b8 པས། །ལོག་སྨྲའི་སྡིག་དེ་དེ་བས་ལྕི། །གསང་བ་ཉིད་ལ་གོལ་བ་ཡི། །གསང་བར་སྨྲ་བའི་ལོག་སྲེད་ཅན། །གསང་སྔགས་ཆོ་གས་ཟིན་གྱུར་ན། །གང་གིས་འཚོ་བ་སྲོག་བཅད་ཀྱང་། །དེ་ནི་ཉེས་པས་མི་འགྱུར་ཞེས། །
iiif viewer powered by OpenSeadragon
