| e-texts navigator |
| Wylie |
170a1 བདག་པོ་དེ་དག་ཀྱང་སོ་སོར་བལྟ་བར་ནི་མི་བྱའོ། །དེ་ཅིའི་ཕྱིར་ཞེ་ན། གང་ངོ་བོ་ཉིད་མེད་པ་ལས་དེ་ལྟར་སྣང་བར་ཟད་དེ། དེ་ནི་དེ་ཁོ་ན་ཉིད་གསང་བ་དམ་པའི་བྱིན་གྱི་བརླབས་འབའ་ཞིག་སྣང་བའོ། །ལང་ཀའི
170a2 བདག་པོ་དེ་བས་ན་གསང་བ་དམ་པ་ངོ་བོ་ཉིད་མེད་པ་དེ་ནི་ཉི་མའི་སྙིང་པོ་ལྟ་བུའོ། །བྱིན་གྱི་བརླབས་ལས་སྣང་བ་ནི་ཟེར་དང་འོད་ལྟ་བུར་རིག་པར་བྱའོ་ཞེས་སྨྲས་པས། ལང་ཀའི་བདག་པོ་ལ་སོགས་པ་དམན་པའི
170a3 ལུས་ཀྱི་སེམས་དཔའ་རྣམས་སྐུ་ཡོངས་སུ་རྟོག་པའི་ཐེ་ཚོམ་ཆད་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་སྐུ་ཡོངས་སུ་སྣང་བ་དམ་པའི་རྒྱན་བཀོད་པའི་ལེའུ་སྟེ་སུམ་བཅུ་གསུམ
170a4 པའོ། ། །། དེ་ནས་ཡང་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། དེ་བཞིན་གཤེགས་པའི་གསུང་གི་བྱིན་གྱི་བརླབས་ཇི་ལྟར་སྣང་བ་དཔག་པར་བྱ་བའི་ཕྱིར་དྲི་བ་ཡོངས་སུ་དྲིས་པ།
170a5 ཀྱེ་གསང་བ་པའི་བདག་པོ་གང་གི་ཐུགས་དང་སྐུའི་བྱིན་གྱི་བརླབས་ལས་སྣང་བ་ཡོངས་སུ་བཀོད་པ་དེ་དག་གི་གསུང་གི་བྱིན་གྱི་བརླབས་ལས་སྣང་བ་ཇི་ལྟར་དཔག་པར་བགྱི། དེ་སྐད་ཅེས་དྲིས་པ་ལས། གསང་བ་པའི
170a6 བདག་པོས་སྨྲས་པ། ལང་ཀའི་བདག་པོ་ཇི་སྐད་དུ་དྲི་བ་དེ་ནི་འདི་ལྟ་སྟེ། ངོ་བོ་ཉིད་མེད་པ་གསང་བ་དམ་པ་གསང་བ་དེ་ལ་ནི་ཚིག་དང་སྒྲའི་ཐ་སྙད་མེད་དེ་ཐམས་ཅད་ནས་ཐམས་ཅད་དུ་གསུང་བ་མེད་པ་ཁོ་ནའོ། །གལ་ཏེ
170a7 གསང་བ་དེ་དག་དཔག་པར་ནི་གང་ཡོངས་སུ་དག་པའི་སྐྱེས་བུ་དམ་པས་ཀྱང་མི་དཔོགས་ཏེ། གང་གི་ཕྱིར་དེ་དཔོགས་པ་ཉིད་ན་ངོ་བོ་ཉིད་མེད་པ་གསང་བ་དམ་པ་ཉིད་དུ་ངེས་པའི་ཕྱིར་དཔག་པར་རབ་ཏུ་དཀའོ། །ལང་ཀའི
170a8 བདག་པོ་འོན་ཀྱང་འདི་ལྟར་རིག་པར་བྱ་སྟེ། གང་ངོ་བོ་ཉིད་མེད་པའི་གསུང་ནི་ནམ་མཁའ་ལྟ་བུའོ། །རྣམ་པར་དག་པའི་གསུང་ནི་ཉི་མའི་སྙིང་པོ་ལྟ་བུའོ། །ཡོངས་སུ་སྨིན་པའི་གསུང་ནི་མེ་ལོང་ལྟ་བུའོ། །གསང་བ་དམ
iiif viewer powered by OpenSeadragon
