| e-texts navigator |
| Wylie |
143b1 གདུང་དང་སྡེའི་ཚོགས་ཀྱིས་མགྲིན་གཅིག་ཏུ་འཐུན་པར་བགྲོས་པ། །གང་འདས་པའི་དུས་ན་སྔོན་བྱུང་བ། །ལས་ཀྱི་འཁོར་ལོས་འཕངས་པ་ཡི། །བློ་གྲོས་ལོག་པའི་རུ་ཏྲ་དེ། །སྙིང་པོ་དབྱིངས་ནས་བྱུང་བ་ནི། །སྐྱེས
143b2 བུ་དམ་པའི་སྦྱོར་བ་ཡིས། །བདུད་ཀྱིས་བདུད་བཏུལ་གཉེར་བཀོད་ལྟར། །ད་ལྟར་འདི་ཚེ་བྱུང་བ་ནི། །དུག་འགྱུར་བརྩེགས་པའི་རི་བོ་འདི། །རྡོ་རྗེ་ཁྲོས་པའི་ཐོ་ཆེན་གྱིས། །བརླག་ཅིང་གཞོམ་པའི་དུས་ལ་བབ་ཅེས
143b3 བགྲོས་སོ། །སངས་རྒྱས་གཞོན་ནུའི་གདུང་དང་སྡེའི་ཚོགས་ཀྱིས་མགྲིན་གཅིག་ཏུ་འཐུན་པར་བགྲོས་པ། །ཁོང་ནས་འཁྱིལ་བའི་དུག་ཆེན་པོ། །ཐར་མེད་མི་བཟད་ནད་ཀྱིས་ཟིན། །རྟག་ཆད་ཁམས་སུ་ཤི་བའི་རོ། །
143b4 ལམ་ལོག་ལམ་སྟོར་དམུས་ལོང་འདི། །ཡེ་ཤེས་ཁྲོས་པའི་ཆོ་འཕྲུལ་ལས། །འབར་འཕྲོ་འཁྲུག་པའི་གཟེར་ཆེན་གྱིས། །སྨག་ཆེན་མུན་ནག་གཞོམ་པའི་ཕྱིར། །ཡེ་ཤེས་ཅན་གྱི་སྤྱོད་ཡུལ་ནས། །རྒྱལ་བ་རྒྱ
143b5 མཚོ་ཀུན་འདུས་ཏེ། །ཡེ་ཤེས་རྡོ་རྗེ་ཁྲོས་པ་ཡི། །ཆོ་འཕྲུལ་སྤྲིན་ཕུང་གཏིབས་པའི་ས། །འཐུན་འཇུག་བྱིས་པའི་ཆ་བྱད་ཀྱིས། །རྣམ་པར་རོལ་པའི་མངོན་སྤྱོད་ཀྱིས། །དུག་ཆེན་རྒྱ་མཚོ་མ་བསྐམས་ན། །འདིར
143b6 ནི་སྙིང་རྗེ་རྐྱེན་འཚམ་མམ། །ཆོས་ཉིད་སྙིང་རྗེ་ཆེན་པོ་ཡི། །གང་འདིར་དམ་ཚིག་དམ་པའི་ཕྱིར། །དངོས་པོ་བཞི་ཡི་བསྟན་པ་མཛོད་ཅེས་བགྲོས་སོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས
143b7 འདུས་པ་ཆེན་པོས་རྣམ་པར་བགྲོས་པའི་ལེའུ་སྟེ་ཉི་ཤུ་བཞི་པའོ། ། །། དེ་ལྟར་འདུས་པ་ཆེན་པོའི་བཀའ་བགྲོས་ཡོངས་སུ་ཆད་ནས་ལས་རྣམ་བཞི་གང་གི་གདུལ་བའི་སྐབས་ལ་བབ་པར་དགོངས་པ་ཡིས་གང་དེ
143b8 རྣམ་པར་བརྟག་པའི་ཕྱིར་ཐུབ་དཀའ་གཞོན་ནུ་རྡོ་རྗེ་སྙིང་པོར་གནས་གྱུར་པའི་འོད་ཟེར་ལས་སྤྲུལ་པ་ཐུབ་པའི་དབང་པོར་བྱུང་ནས་དེ་བཞིན་གཤེགས་པ་ཀུན་གྱིས་སྤྲུལ་པ་དེ་ལ་བསྒོ་བ། ཐུབ་པའི་དབང་པོ་དུས་འདི་ལགས། །
iiif viewer powered by OpenSeadragon
