| e-texts navigator |
| Wylie |
105a1 སྒོ་མོར་ཐམས་ཅད་གསལ། །དོན་ལ་ངེས་པའི་གཏན་ཚིགས་ནི། །ཚིག་ཏུ་མཚོན་ཏེ་འཛིན་པར་ནུས། །ཆོས་རྒྱུན་ཏིང་འཛིན་ཐོབ་པ་ཡིན། །ཀྱེ་ལང་ཀའི་བདག་པོ་དེ་ལྟར་ན་སེམས་ཀྱི་དེ་ཁོ་ན་ཉིད་ནི་བྱང་ཆུབ་ཆེན་པོ་ཡིན་ལ
105a2 བྱང་ཆུབ་ཆེན་པོ་ནི་རྡོ་རྗེ་སེམས་དཔའི་སྟེ། དེ་ཡང་སངས་རྒྱས་ཀུན་གྱི་བདུད་རྩིར་གྱུར་པ་འདི་ལྟ་སྟེ། བྱང་ཆུབ་སེམས་ཀྱི་ཆུ་མེད་ན། །རྒྱལ་བ་རྣམས་ཀྱང་སྐམས་པར་འགྱུར། །བྱང་ཆུབ་སེམས་ཀྱི་ཆུ་བོ་འདིས། །སྔོན་ཞེན
105a3 མཐའ་དང་རྡོས་སྐམས་རླན། །སེམས་ཀྱི་རང་བཞིན་སྟོང་ཉིད་པས། །དེ་ལས་བྱུང་བ་ཐམས་ཅད་སྟོང་། །དེ་སྟོང་པས་ན་བྱང་ཆུབ་ཀྱང་། །སྟོང་ཉིད་སྙིང་པོ་དེ་ཁོ་ན། །རང་འབྱུང་ཡེ་ཤེས་ཆུ་ཆེན་པོ། །རྨད་བྱུང་རྒྱ་མཚོའི
105a4 ཀློང་དཀྱིལ་ནས། །བྱང་ཆུབ་བདུད་རྩིའི་ཆུ་བྱུང་བས། །རྒྱལ་བ་ཐམས་ཅད་བསིལ་བར་མཛད། །འདི་ནི་གསང་བའི་སྙིང་པོ་སྟེ། །རྡོ་རྗེ་སེམས་དཔའི་དེ་ཁོ་ན། །ཉིད་ཏུ་ངེས་པའི་ངོ་བོ་ཡིན། །རྒྱལ་བ་ཀུན་གྱིས་དམ
105a5 པར་བསྔགས། །དེ་བས་དེའི་ཕྱིར་ལང་ཀའི་བདག་པོ་སེམས་ཀྱི་དེ་ཁོ་ན་ཉིད་ངོ་ཤེས་པར་བྱ་བ་ནི་ཡུན་གྱི་དོན་སྲིད་ཆེན་པོའོ་ཞེས་གསང་བ་པའི་བདག་པོ་དེས་དེ་སྐད་སྨྲས་པས་ཐམས་ཅད་རྡོ་རྗེ་སེམས་དཔའི
105a6 དེ་ཁོ་ན་ཉིད་དུ་རྣམ་པར་གྲོལ་བའི་ལམ་དུ་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་རྡོ་རྗེ་སེམས་དཔའི་དེ་ཁོ་ན་ཉིད་སྟོན་པའི་ལེའུ་སྟེ་དགུ་པའོ།། །། དེ་ནས་ཡང་ལང་ཀའི
105a7 བདག་པོས་གསང་བ་པའི་བདག་པོ་ལ་དྲིས་པ། གསང་བ་པའི་བདག་པོ་གསང་སྔགས་ཀྱི་ངོ་བོ་དེ་སེམས་ཀྱི་དེ་ཁོ་ན་ཉིད་དེ་གང་གི་སྤྱོད་ཡུལ་དུ་གྱུར། སྨྲས་པ། ལང་ཀའི་བདག་པོ་དེ་ནི་སངས་རྒྱས་བཅོམ
105a8 ལྡན་འདས་རྣམས་ཀྱི་སྤྱོད་ཡུལ་དུ་གྱུར་གྱི་ས་དང་ས་ལ་གནས་པ་རྣམས་ཀྱི་ནི་མ་ཡིན་ནོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་བརྟག་པར་དཀའ་ཞིང་བསྟན་པར་དཀའ་ལ་བརྗོད་པའི་ཐ་སྙད་རྣམས་དང་བྲལ་བའི་ཕྱིར་རོ། །
iiif viewer powered by OpenSeadragon
