| e-texts navigator |
| Wylie |
102a1 པ་ནི་ཐམས་ཅད་ཀྱི་ཡེ་ཇི་བཞིན་པ་དེ་ཁོ་ན་ཉིད་ལ་གཞག་པར་བྱའོ། །ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ་སེམས་ཅན་ཀུན་གྱི་སེམས་ཀྱི་ཆོས་ཉིད་དེ་གང་ལགས། གང་ཞིག་མཐོང་ན་དེ་མཐོང་བ་ལགས། དེ་སྐད
102a2 ཅེས་དྲིས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ་སེམས་ཅན་ཀུན་གྱི་ཇི་ལྟ་བ་དེ་མཐོང་ན་མཐོང་བ་ཡིན་ནོ། །སེམས་ཅན་ཀུན་གྱི་ཇི་ལྟ་བ་དེ་ནི་བླ་ན་མེད་པའི་བྱང་ཆུབ་ཡིན་ནོ། །དེ་ལ་ནི་ཆོས་རྡུལ་ཙམ་ཡང
102a3 མི་དམིགས་སོ། །དེ་ནི་ནམ་མཁའི་མཚན་ཉིད་དོ། །དེ་ལ་ནི་བྱང་ཆུབ་པ་ཡང་མེད་ལ་བྱང་ཆུབ་པར་བྱ་བ་འང་མེད་དོ། །དེ་ལ་ནི་སེམས་ཅན་ཡང་མེད་ལ་སེམས་ཅན་དུ་གདགས་པ་ཡང་མེད་དོ། །ཆོས་ཅན་ཡང་མེད་ལ་ཆོས་ཅན་དུ་གདགས་པ
102a4 ཡང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་བྱང་ཆུབ་ཀྱི་མཚན་ཉིད་ཡིན་ལ་བྱང་ཆུབ་ནི་ནམ་མཁའི་མཚན་ཉིད་དེ། ནམ་མཁའ་ནི་མཚན་ཉིད་ཐམས་ཅད་དང་བྲལ་བའོ། །དེའི་ཕྱིར་བྱང་ཆུབ་ནི་སེམས་ལས་བཙལ་བར་བྱའོ། །སེམས
102a5 དེ་ནི་རང་བཞིན་གྱིས་ཡོངས་སུ་དག་པའི་ཕྱིར་ནང་ན་ཡང་མེད། ཕྱི་རོལ་ན་ཡང་མེད་གཉིས་ཀར་ཡང་མི་དམིགས་སོ། །སེམས་དེ་ནི་སངས་རྒྱས་ཀྱིས་ཀྱང་མ་གཟིགས། མི་གཟིགས། གཟིགས་པར་མི་འགྱུར་རོ། །དེ་ཇི་ལྟར
102a6 མ་གཟིགས་ན་ཁ་དོག་ཏུ་མ་གཟིགས་སོ། །དབྱིབས་སུ་མ་གཟིགས་སོ། །མུན་པར་མ་གཟིགས་སོ། །སྣང་བར་མ་གཟིགས་སོ། །ཕོ་མོར་མ་གཟིགས་སོ། །མ་ནིང་དུ་མ་གཟིགས་སོ། །ཁམས་གསུམ་གྱི་རང་བཞིན་དུ་མ་གཟིགས་སོ། །
102a7 ལྷའི་སེམས་སུ་མ་གཟིགས་སོ། །ཀླུའི་སེམས་སུ་མ་གཟིགས་སོ། །དེ་བཞིན་དུ་གནོད་སྦྱིན་གྱི་སེམས་དང་། དྲི་ཟའི་སེམས་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། བྱོལ་སོང་དང་། ཡི
102a8 དགས་དང་། དམྱལ་བ་ལ་སོགས་པ་འགྲོ་བ་རིས་ཐ་དད་པའི་སེམས་སུ་མ་གཟིགས་སོ། །རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་བའོ་དེ་ཅིའི་ཕྱིར་ཞེ་ན། སེམས་ཀྱི་རང་བཞིན་གང་ཡིན་པ་དེ་ནི་རྡོ་རྗེ་སེམས་དཔའི་རང་འབྱུང་གི
iiif viewer powered by OpenSeadragon
