| e-texts navigator |
| Wylie |
101a1 སྙིང་རྗེ་དག་གིས་སྟོང་གསུམ་གྱི་སྟོང་ཆེན་པོའི་སེམས་ཅན་སྲོག་བཏོན་པ་དང་གང་ཐར་པར་བཏོན་པ་དེ་ནི་སྙིང་རྗེ་ཆུང་ངུར་རིག་པར་བྱའོ། །ལང་ཀའི་བདག་པོ་དེ་བས་ན་སྙིང་རྗེ་ཆེན་པོ་ལ་རྒྱུན་དུ་གནས་པས་གནས་པར་བྱའོ། །ལང་ཀའི
101a2 བདག་པོ་གང་སྙིང་རྗེ་ཆེན་པོ་ལ་གནས་པ་དག་ནི་སེམས་ཅན་འགའ་ཡང་གྲོལ་བར་མི་བྱེད་འཆིང་བར་ཡང་མི་བྱེད་དེ། རྡོ་རྗེ་མཚོན་གྱིས་དངོས་སུ་བསད་པ་མེད་པར་བསད་པ་ཁོ་ནའོ། །དེ་ཅིའི་ཕྱིར་ཞེ་ན། སེམས་ཅན་མེད་པ་ལས
101a3 སེམས་ཅན་དུ་བཏགས་པའི་ཕྱིར་རོ། །སྙིང་རྗེ་ཆེན་པོ་དེ་ནི་དེ་བཞིན་ཉིད་དང་གློ་བུར་གཉིས་ཀྱི་ཁྱད་པར་གྱི་ཚིག་བླ་དགས་སུ་རིག་པར་བྱའོ། །ལང་ཀའི་བདག་པོ་དེ་ལྟ་བས་ན་འདི་ལྟ་སྟེ། མཐའ་ཡས་མིང་དུ་བཏགས་པ་ཡི། །ཡོད
101a4 མཐོང་སྣང་གྲགས་ཆོས་རྣམས་ཀུན། །བླ་དགས་ཙམ་དུ་བཏགས་པར་ཟད། །དེ་ལ་དངོས་གཞི་ག་ལ་ཡོད། །གང་ལ་མིང་དུ་བཏགས་པའི་གཞི། །མེད་རྒྱུ་བཏགས་ཆགས་བསྒྲུབས་འགྲུབ་ཅིང་། །གང་དུ་བལྟས་པར་སྣང་བ་ཡིན། །དེས་ན་བྱ་མེད་བྱས་པ
101a5 ཟིན། །མི་སྣང་བ་ལས་ཀུན་སྣང་བ། །ཐམས་ཅད་ཐམས་ཅད་གློ་བུར་སྣང་། །སྣང་ཉིད་མེད་པའི་སྙིང་པོ་སྟེ། །ཡོད་མེད་གཉིས་སུ་འང་དམིགས་པ་མེད། །སངས་རྒྱས་མེད་ལས་སངས་རྒྱས་དང་། །བྱང་ཆུབ་ཆོས་ཉིད་ལ་སོགས་པའི། །ཐ་དད་མིང
101a6 གི་བླ་དགས་རྣམས། །མི་ཤེས་རྨོངས་ལ་བསྟན་ཕྱིར་བཏགས། །དེ་ཉིད་ལ་ནི་སངས་རྒྱས་དང་། །བྱང་ཆུབ་ཆོས་ཉིད་ལ་སོགས་པའི། །ཐ་སྙད་མིང་གི་བླ་དགས་རྣམས། །མིང་མེད་ཚིག་ཏུ་བརྗོད་པ་མེད། །ཆོས་ཉིད་ནམ་མཁའི་དཀྱིལ་ཡངས
101a7 ནས། །ཡེ་ཤེས་ཉི་མའི་སྐུ་གསལ་བས། །ཐུགས་རྗེ་སྒྲོན་མའི་འོད་ཟེར་གྱིས། །གཏི་མུག་ཀུན་བསལ་རྣམ་པར་སྣང་ཞེས་སྨྲས་པས། ལང་ཀའི་བདག་པོ་ལ་སོགས་པ་འགྲོ་བ་ལུས་ཀྱི་སེམས་དཔའ་རྣམས་གཞན་ལ་རེ་རྩོལ་མེད་པར་དབུགས
101a8 ཕྱིན་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་གསང་སྔགས་རང་གི་ངོ་བོ་བསྟན་པའི་ལེའུ་སྟེ་བརྒྱད་པའོ།། །།ཐེག་པ་ཆེན་པོ་ངེས་པར་འབྱུང་བའི་ཚུལ་ལས་སྒྲོན་མ་ཡོངས་སུ་བཀོད་པའི
iiif viewer powered by OpenSeadragon
