| e-texts navigator |
| Wylie |
58b1 ཅེས་གསོལ་ཏོ། །བཅོམ་ལྡན་འདས་མི་ཕྱེད་པ་བསྟན་པ། འཇིག་རྟེན་གསུམ་གྱི་ལྷ་རྣམས་ཀྱིས་འདའ་བར་བྱ་བ་མ་ཡིན་པ་བསྒྲུབ་པའི་ཐབས་ཀྱི་ཆོ་ག་རྒྱས་པའི་ལེའུ་དང་ཕྱག་རྒྱ་དང་སྔགས་ཀྱི་རིམ་པར་ཕྱེ་བ་བཤད
58b2 དུ་གསོལ། དེ་ནས་འཁོར་གྱི་དཀྱིལ་འཁོར་དེ་ན་གནས་པ་རྣམས་ཀྱིས་ལྷ་ཆེན་པོ་ལེགས་སོ་ཞེས་བྱ་བ་བྱིན་ཏེ། ཤིན་ཏུ་གདུལ་དཀའ་བ་རྣམས་འདུལ་བར་བྱེད་པ་གསོལ་བ་བཏབ་པ་ནི་ལེགས་སོ་ལེགས་སོ། །
58b3 དེ་ནས་རྡོ་རྗེ་འཆང་ཁྲོ་བོའི་བདག་པོ་ཆེན་པོས་འདི་སྐད་ཅེས་གསུངས་སོ། །ཁྲོ་བོའི་དཀྱིལ་འཁོར་དམ་པ་ནི། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །ཆ་རྣམས་བཅུ་དྲུག་དག་དང་ལྡན། །
58b4 རྡོ་རྗེ་ར་བས་མཛེས་པའོ། །དེ་ཡི་དབུས་སུ་དྲག་པོ་ཆེ། །རྡོ་རྗེ་ཁྲོ་བོ་རྒོད་བྱ་བ། །འབར་བའི་ཕྲེང་བ་འཁྲུག་ཅིང་གསལ། །བསྐལ་པ་ཐ་མའི་མེ་འོད་འདྲ། །ལྷ་ཆེན་མིག་སྨན་སྦྱར་འདྲ་ཞིང་། །ཐོད་པའི་ཕྲེང་བས
58b5 རྒྱན་དུ་བྱས། །དྲག་ཤུལ་བཞད་ཅིང་ཆེར་འཇིགས་པ། །འཇིག་རྟེན་གསུམ་པོ་འཇིགས་མཛད་པའོ། །བཅོམ་ལྡན་འདས་ཀྱི་གཡས་ལོགས་སུ། །ལྷ་ཆེན་པོ་ནི་བྲི་བྱ་སྟེ། །བ་ཞོ་མུ་ཏིག་ལྟར་དཀར་ཞིང་། །
58b6 དེ་བཞིན་དཀར་པོ་དུང་འདྲ་ཞིང་། །མིག་གསུམ་ལག་པ་བཞི་པ་སྟེ། །ཞི་ཞིང་ལག་པ་གཡོན་པ་ན། །མདུང་རྩེ་གསུམ་པ་ཐོགས་པའོ། །གཡོན་པའི་ཕྱོགས་ཀྱི་ཆ་རུ་ནི། །སྲེད་མེད་བུ་ནི་བྲི་བྱ་སྟེ། །གཡས
58b7 པ་ན་ནི་རྔ་ཡབ་དུང་། །གཡོན་ན་འཁོར་ལོ་གསལ་ཤིང་ངོ་། །རྒྱབ་ཏུ་བརྒྱ་བྱིན་རྒྱལ་པོ་སྟེ། །དེ་བཞིན་སྨིན་དྲུག་མདུན་དུའོ། །ཚངས་པ་ལག་ན་གདུགས་འཛིན་པ། །ཁ་བ་མེ་ཏོག་ཀུན་དྷ་དང་། །ཟླ་འདྲ་བརྒྱ་བྱིན
58b8 མདུན་བྲི་སྟེ། །རང་གི་སྟན་ལ་འཁོད་པར་རོ། །ཡང་ན་སྔགས་པས་མུ་ཏིག་དང་། །བ་ཡི་ཞོ་འདྲ་དཀར་པོ་ནི། །རྔ་ཡབ་ཐོགས་པར་སྨིན་དྲུག་བྲི། །ཚངས་པ་ཁ་དོག་དམར་པོ་བྲི། །བརྒྱ་བྱིན་ཁ་དོག་སེར་པོ་བྲི། །
iiif viewer powered by OpenSeadragon
