| e-texts navigator |
| Wylie |
28a1 དེ་བཞིན་གཤེགས་པ་དེས་སེམས་ཅན་རྣམས་ཀྱི་ཡོངས་སུ་མྱ་ངན་ལས་འདའ་བ་མཐོང་བར་གྱུར་ན་ཤིན་ཏུ་མཐོང་བར་དཀའ་བའི་འདུ་ཤེས་དང་། མྱ་ངན་དང་། སྡུག་བསྔལ་བ་ལ་སོགས་པའི་འདུ་ཤེས་བསྐྱེད་ནས་སངས་རྒྱས
28a2 བཅོམ་ལྡན་འདས་ཀྱིས་གསུངས་པའི་མདོ་སྡེའི་བསྟན་པ་དག་མྱུར་དུ་ལེན་པ་དང་། འཛིན་པ་དང་། འཆང་བ་དང་། ཀློག་པ་དང་། ཁ་ཏོན་དུ་འདོན་པ་དང་། ཀུན་ཆུབ་པར་བྱས་ནས་གཞན་དག་ལ་ཡང་དག་པར་བསྟན་པ་དང་།
28a3 སྐུར་བ་འདེབས་པར་མི་འགྱུར་བར་མཛད་པར་བཞེད་པའི་ཕྱིར་དེ་ལྟ་བས་ན་དེ་བཞིན་གཤེགས་པས་དེ་ལྟ་བུའི་སྐུ་ཚེ་ཐུང་བ་བསྟན་པ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་དེ་དག་གིས་གལ་ཏེ་དེ་བཞིན་གཤེགས་པ་ཡོངས་སུ
28a4 མྱ་ངན་ལས་མི་འདའ་བ་མཐོང་བར་གྱུར་ན་གུས་པས་རིམ་གྲོ་ཡང་མི་བྱེད། ཤིན་ཏུ་ཕྲད་པར་དཀའ་བའི་འདུ་ཤེས་ཀྱང་མི་བསྐྱེད་ལ་དེ་བཞིན་གཤེགས་པས་གསུངས་པའི་མདོ་སྡེ་ཟབ་མོ་དག་ཀྱང་ལེན་པ་དང་འཛིན་པ་དང་།
28a5 ཀློག་པ་དང་། ཁ་ཏོན་དུ་འདོན་པ་དང་། ཀུན་ཆུབ་པར་བྱས་ནས་གཞན་དག་ལ་སྟོན་པར་ཡང་མི་བྱེད་པས་སོ། །དེ་ཅིའི་ཕྱིར་ཞེ་ན། འདི་ལྟར་རྟག་པར་སངས་རྒྱས་མཐོང་བས་གུས་པར་མི་བྱེད་པའི་ཕྱིར་རོ། །རིགས
28a6 ཀྱི་བུ་འདི་ལྟ་སྟེ། དཔེར་ན་མི་ཞིག་གིས་བདག་གིས་ཕ་ལ་ནོར་དང་། རིན་པོ་ཆེ་མང་ཞིང་འཕེལ་བ་དག་མཐོང་བར་གྱུར་ན། ནོར་རྫས་དག་ལ་ངོ་མཚར་དང་། མཐོང་བར་དཀའ་བའི་འདུ་ཤེས་སྐྱེ་བར་མི་འགྱུར་རོ། །
28a7 དེ་ཅིའི་ཕྱིར་ཞེ་ན། ཕའི་ནོར་རྫས་དག་ལ་རྟག་པའི་འདུ་ཤེས་སྐྱེད་པའི་ཕྱིར་རོ། །རིགས་ཀྱི་བུ་སེམས་ཅན་མང་པོ་དེ་དག་ཀྱང་དེ་བཞིན་དུ་གལ་ཏེ་དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའ་བ་མཐོང་བར་གྱུར་ན་ངོ་མཚར
28a8 དང་མཐོང་བར་དཀའ་བའི་འདུ་ཤེས་སྐྱེ་བར་མི་འགྱུར་རོ། །དེ་ཅིའི་ཕྱིར་ཞེ་ན། རྟག་པར་མཐོང་བའི་ཕྱིར་རོ། །རིགས་ཀྱི་བུ་འདི་ལྟ་སྟེ། དཔེར་ན་མི་ཞིག་ཕ་མ་དབུལ་ཞིང་ནོར་རྫས་ཀྱིས་ཕོངས་པར་གྱུར་པ་ལས་མི་དབུལ་པོ
iiif viewer powered by OpenSeadragon
