| e-texts navigator |
| Wylie |
27a1 དཔའ་མཛེས་པའི་ཏོག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ངེད་ཀྱིས་ནི་བླ་ན་མེད་པའི་ཐམས་ཅད་མཁྱེན་པ་མ་གཏོགས་པར་ལྷ་དང་བཅས་པའི་འཇིག་རྟེན་དང་། ཚངས་པ་དང་། བདུད་དང་། དགེ་སྦྱོང་དང་། བྲམ་ཟེ་དང་།
27a2 མི་དང་མི་མ་ཡིན་པ་གང་གིས་ཀྱང་དེ་བཞིན་གཤེགས་པའི་སྐུ་ཚེའི་ཚད་ཀྱི་མཐའ་ཤེས་ཤིང་དཔག་པར་འགྱུར་བ་ཡང་དག་པར་མ་གཟིགས་སོ། །དེ་བཞིན་གཤེགས་པ་བཞི་པོ་དེ་དག་གིས་བཅོམ་ལྡན་འདས་ཤཱཀྱ་ཐུབ་པའི་སྐུ་ཚེའི་ཚད་བསྟན
27a3 པར་བཞེད་པ་ན། བཅོམ་ལྡན་འདས་ཀྱིས་བྱིན་གྱིས་བརླབས་ཀྱི་མཐུས་འདོད་པ་དང་གཟུགས་ཀྱི་ཁམས་ཀྱི་ལྷ་རྣམས་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་།
27a4 ལྟོ་འཕྱེ་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་སྙེད་འདུས་ཏེ་ལྷགས་ནས་བྱང་ཆུབ་སེམས་དཔའ་མཛེས་པའི་ཏོག་གི་ཁྱིམ་ཡོངས་སུ་དག་ཅིང་གྱ་ནོམ་པ་དེར་ཞུགས་པར་གྱུར
27a5 ཏོ། །དེ་ནས་བཅོམ་ལྡན་འདས་བཞི་པོ་དེ་དག་གིས་འཁོར་མང་པོའི་ནང་དུ་དེ་བཞིན་གཤེགས་པ་ཤཱཀྱ་ཐུབ་པའི་སྐུ་ཚེའི་ཚད་ཇི་སྙེད་པ་དག་བསྟན་པར་བཞེད་པའི་ཕྱིར་ཚིགས་སུ་བཅད་དེ་བཀའ་སྩལ་པ། །
27a6 རྒྱ་མཚོ་ཐམས་ཅད་ཀུན་གྱི་ཆུ། །ཐིགས་པའི་གྲངས་ནི་ཤེས་རུང་གི། ཤཱཀྱ་ཐུབ་པའི་སྐུ་ཚེའི་ཚད། །གང་གིས་ཀྱང་ནི་བགྲང་མི་ནུས། །རི་རབ་ཐམས་ཅད་རྡུལ་བརླགས་ཏེ། །ཡུངས་འབྲུ་བཞིན་དུ་བགྲང་ཤེས
27a7 ཀྱང་། །ཤཱཀྱ་ཐུབ་པའི་སྐུ་ཚེའི་ཚད། །གང་གིས་ཀྱང་ནི་བགྲང་མི་ནུས། །ས་ཆེན་རྡུལ་ནི་ཐམས་ཅད་ཀུན། །རྡུལ་གྲངས་ཅི་ཡོད་ཤེས་རུང་ཡང་། །ཤཱཀྱ་ཐུབ་པའི་སྐུ་ཚེའི་ཚད། །གང་གིས་ཀྱང་ནི་བགྲངས་མི
27a8 ནུས། །གལ་ཏེ་ནམ་མཁའི་ཚད་བཙལ་ཏེ། །མཐའ་ཀུན་དཔག་པར་རུང་སྲིད་ཀྱང་། །ཤཱཀྱ་ཐུབ་པའི་སྐུ་ཚེའི་ཚད། །གང་གིས་ཀྱང་ནི་དཔག་མི་ནུས། །མི་ཞིག་བསྐལ་པ་བྱེ་བར་གནས། །
iiif viewer powered by OpenSeadragon
