| e-texts navigator |
| Wylie |
26b1 འོད་ཟེར་ཆེན་པོ་བཀྱེ་བས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དང་། ཕྱོགས་བཅུའི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་དང་། མཉམ་པ་སྙེད་ཀྱི་བར་དུ་ཡང་སྣང་བས
26b2 ཀུན་ཏུ་ཁྱབ་པར་མཛད་དེ། ལྷའི་མེ་ཏོག་གི་ཆར་ཡང་མངོན་པར་ཕབ་ལྷའི་རོལ་མོའི་སིལ་སྙེན་རྣམས་ཀྱང་དཀྲོལ་བར་གྱུར་ཏེ། དེའི་ཚེ་འཛམ་བུའི་གླིང་འདི་དང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན། སེམས་ཅན་ཇི་སྙེད
26b3 ཡོད་པ་དག་བཅོམ་ལྡན་འདས་ཀྱི་བྱིན་གྱི་བརླབས་ཀྱིས་མཐུས་བདེ་བ་མཆོག་དམ་པ་མྱོང་བར་གྱུར་པས་ཕོངས་པ་ཅི་ཡང་མེད་པར་གྱུར་ཏོ། །ལུས་ཀྱི་ཡན་ལག་མ་ཚང་བ་དག་ནི་ཚང་བར་གྱུར། ལོང་བ་དག་ནི་མཐོང་བར་གྱུར། འོན་པ་རྣམས་ནི
26b4 ཐོས་པར་གྱུར། ལྐུགས་པ་དག་ནི་སྨྲ་བར་གྱུར། གླེན་པ་དག་ནི་ཤེས་རབ་དང་ལྡན་པར་གྱུར། སེམས་འཁྲུགས་པ་དག་ནི་སེམས་ཉིད་ཐོབ་པར་གྱུར། བགོ་བ་མེད་པ་དག་ནི་གོས་དང་ལྡན་པར་གྱུར། རབ་ཏུ་སྨད་ཅིང་བཤུངས་པ་དག་ནི
26b5 གཞན་གྱིས་བཀུར་བར་གྱུར། དྲི་མ་དང་བཅས་པ་དག་ནི་ལུས་གཙང་བར་གྱུར་ཏེ། འཇིག་རྟེན་གྱི་ཁམས་འདིར་ཕན་འདོགས་པའི་དངོས་པོ་ངོ་མཚར་རྨད་དུ་ཆེ་བ་སྔོན་མ་བྱུང་བ་རྣམས་ཀྱང་མངོན་དུ་བྱུང་བར་གྱུར་ཏོ། །
26b6 དེ་ནས་བྱང་ཆུབ་སེམས་དཔའ་མཛེས་པའི་ཏོག་དེ་བཞིན་གཤེགས་པ་བཞི་དང་། ངོ་མཚར་རྨད་དུ་བྱུང་བའི་དངོས་པོ་དེ་དག་མཐོང་བས་དགའ་མགུ་རངས་པར་གྱུར་ནས་ཐལ་མོ་སྦྱར་ཏེ། སེམས་རྩེ་གཅིག་ཏུ་དེ་བཞིན་གཤེགས་པ
26b7 རྣམས་ཀྱི་མཚན་ཁྱད་པར་དུ་འཕགས་པ་དག་ལ་རྣམ་པར་བལྟས་ནས། གཞན་ཡང་འདི་སྙམ་དུ་དེ་བཞིན་གཤེགས་པ་ཤཱཀྱ་ཐུབ་པ་ཡོན་ཏན་ཚད་མེད་པ་དང་ལྡན་ཡང་། སྐུ་ཚེའི་ཚད་འབའ་ཞིག་ལ་ཐེ་རྩོམ་གྱི
26b8 སེམས་སྐྱེས་པར་གྱུར་ནས། ཅིའི་ཕྱིར་དེ་བཞིན་གཤེགས་པ་ཡོན་ཏན་ཚད་མེད་པ་མངའ་ཡང་སྐུ་ཚེ་ཐུང་སྟེ་ལོ་བརྒྱད་བཅུ་ཁོ་ན་བཞུགས་པར་གྱུར་སྙམ་མོ། །དེ་ནས་བཅོམ་ལྡན་འདས་བཞི་པོ་དེ་དག་གིས་བྱང་ཆུབ་སེམས
iiif viewer powered by OpenSeadragon
