| e-texts navigator |
| Wylie |
26a1 ཚེ་ཐུང་སྟེ་ལོ་བརྒྱད་ཅུར་གྱུར་སྙམ་མོ། །གཞན་ཡང་འདི་སྙམ་དུ་བཅོམ་ལྡན་འདས་ཀྱིས་ཇི་སྐད་གསུངས་པ་ལྟར་ན་རྒྱུ་དང་རྐྱེན་རྣམ་པ་གཉིས་ཀྱིས་ཚེ་རིང་པོར་འགྱུར་རོ། །ཞེས་གསུངས་ཏེ། གཉིས་གང་ཞེ་ན
26a2 སེམས་ཅན་གྱི་སྲོག་མི་གཅོད་པ་དང་། གཞན་དག་ལ་ཡང་བཟའ་བ་དང་བཏུང་བ་ཡོངས་སུ་བཏང་བའོ། །དེ་བཞིན་གཤེགས་པ་ཤཱཀྱ་ཐུབ་པ་ནི་འདས་པའི་བསྐལ་པ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་སྙེད་དུ་སེམས་ཅན་གྱི་སྲོག་མ་བཅད
26a3 ཅིང་དགེ་བ་བཅུའི་ལས་ཀྱིས་ལམ་སྤྱོད་པ་དང་། རྟག་པར་བཟའ་བ་དང་། བཏུང་བ་དག་བཀྲེས་པའི་སེམས་ཅན་ཐམས་ཅད་ལ་སྦྱིན་པ་བཏང་སྟེ། ཉིད་ཀྱི་ཤ་དང་ཁྲག་དང་། རུས་པ་དང་། རྐང་ལ་སོགས་པ་ཡང་ཡོངས་སུ་བཏང་ནས་རབ་ཏུ
26a4 ཚིམ་པར་མཛད་ན། བཟའ་བ་དང་། བཏུང་བ་གཞན་ལྟ་སྨོས་ཀྱང་ཅི་དགོས་སྙམ་མོ། །བྱང་ཆུབ་སེམས་དཔའ་དེས་བཅོམ་ལྡན་འདས་ལ་དེ་སྙམ་དུ་བསམས་པའི་ཚེ། བཅོམ་ལྡན་འདས་ཀྱིས་བྱིན་གྱི་བརླབས་ཀྱི་མཐུས་དེའི་ཁང་ཁྱིམ་དེ
26a5 མ་ཐག་ཏུ་ཡངས་ཤིང་རྒྱ་ཆེ་བ་དང་། བཀོད་པ་དང་ལྡན་ཞིང་ཡོངས་སུ་གཙང་བ་དང་། བཻ་དཱུ་རྱ་སྔོན་པོ་དང་། རིན་པོ་ཆེ་རྣམ་པ་སྣ་ཚོགས་ཀྱིས་རབ་ཏུ་བརྒྱན་པས་སངས་རྒྱས་ཀྱི་ཞིང་ཇི་ལྟ་བ་བཞིན་དུ་སྤོས་མཆོག་དམ་པའི་དྲི་ལྷའི
26a6 སྤོས་ལས་འདས་པ་དག་འཐུལ་ཞིང་གང་བ་དང་། ཕྱོགས་བཞིན་སེང་གེའི་གདན་ཁྲི་མཆོག་དམ་པ་རིན་པོ་ཆེ་སྣ་བཞི་ལས་མངོན་པར་གྲུབ་པ། ལྷའི་རིན་པོ་ཆེའི་གོས་ཀྱིས་གཡོག་པ་དང་། གཞན་ཡང་གདན་དེ་ལ་པད་མ
26a7 དམ་པ་རིན་པོ་ཆེ་སྣ་ཚོགས་ཀྱིས་བརྒྱན་པ་ཚད་དེ་བཞིན་གཤེགས་པ་དང་མཉམ་པ་དག་རང་རང་གི་ངང་གིས་སྣང་བར་གྱུར་ཏེ། པད་མ་དེ་དག་གི་སྟེང་ན་དེ་བཞིན་གཤེགས་པ་བཞི་པོ་ཤར་ཕྱོགས་ཀྱི་མི་འཁྲུགས་པ་དང་། ལྷོ་ཕྱོགས
26a8 ཀྱི་རིན་ཆེན་མཚན་དང་། ནུབ་ཕྱོགས་ཀྱི་ཚེ་དཔག་མེད་དང་། བྱང་ཕྱོགས་ཀྱི་ལྷའི་རྔ་སྒྲ་དབྱངས་བཞུགས་པར་གྱུར་ཏོ། །དེ་བཞིན་གཤེགས་པ་བཞི་པོ་དེ་དག་སོ་སོ་ནས་གདན་དེ་དག་ལ་སྐྱིལ་མོ་དཀྲུང་བཅས་ཏེ་བཞུགས་ནས
iiif viewer powered by OpenSeadragon
