| e-texts navigator |
| Wylie |
293b1 མི་ཉག་རྒྱལ་པོའི་བཀའ་ལུང་གིས། རྒྱ་གར་གྱི་མཁན་པོ་ཨུ་ལ་ཤ་མ་རཀྵི་ཏའི་ཞལ་སྔ་ནས་ལོ་ཙྪ་བ་གླན་དགེ་སློང་དར་མ་བློ་གྲོས་ཀྱིས་བསྒྱུར་ཅིང་ཞུས་ཏེ། དགེ་སློང་ཡོན་ཏན་རྡོ་རྗེས་གསོལ
293b2 བ་བཏབ་པའོ། ། །། རྒྱ་གར་སྐད་དུ། བྷ་ག་བཱན་ནཱི་ལཱམ་བ་ར་དྷ་ར་བཛྲ་པཱ་ཎི་ཏན་ཏྲ་ནཱ་མ། བོད་སྐད་དུ། བཅོམ་ལྡན་འདས་ཕྱག་ན་རྡོ་རྗེ་གོས་སྔོན་པོ་ཅན་གྱི་རྒྱུད་ཅེས་བྱ་བ། བཅོམ
293b3 ལྡན་འདས་དཔལ་ཕྱག་ན་རྡོ་རྗེ་གོས་སྔོན་པོ་ཅན་ལ་ཕྱག་འཚལ་ལོ། །སངས་རྒྱས་དང་བྱང་ཆུབ་སེམས་དཔའ་དུས་གསུམ་དུ་བཞུགས་པ་རྣམས་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས
293b4 གཅིག་ན། བཅོམ་ལྡན་འདས་མི་བསྐྱོད་པ་རྡོ་རྗེའི་རིགས་ཀྱི་སངས་རྒྱས་ལྕང་ལོ་ཅན་གྱི་ཕོ་བྲང་ན་བྱང་ཆུབ་སེམས་དཔའ་ཕྱག་ན་རྡོ་རྗེ་དང་། རྡོ་རྗེ་སྡེ་དང་རྡོ་རྗེ་ཀུན་ཏུ་འཛིན་པ་དང་རྡོ་རྗེ་རབ་ཏུ་འདུལ་བྱེད་དང་རྡོ་རྗེ་མི
293b5 བཟད་འཇོམས་དང་། རྡོ་རྗེ་གདུག་པ་ཀུན་འདུལ་དང་། རྡོ་རྗེ་དབྱིངས་ལས་རྒྱལ་བ་དང་། རྡོ་རྗེ་དགྱེས་གནས་སྐྱོབ་ལ་སོགས་པའི་འཁོར་བྱེ་བ་ཕྲག་སྙེད་རྣམས་དང་ཐབས་ཅིག་ཏུ་བཞུགས་སོ། །དེ་ནས་བྱང
293b6 ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་ཉིད་ཀྱིས་རྡོ་རྗེ་ཐུགས་ཀར་ལན་གསུམ་གསོར་ཏེ། བཅོམ་ལྡན་འདས་ལ་བསྐོར་བ་ལན་གསུམ་བྱས་ནས་ཕྱག་འཚལ་ཏེ་པུས་མོ་གཡས་པའི་ལྷ་ང་ས་ལ་བཙུགས་ཏེ་འདི་སྐད་ཅེས
293b7 གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྡོ་རྗེ་འཛིན་པ་ཆེན་པོ་འབྱུང་པོ་ཀུན་འདུལ་བར་བྱེད་ཅིང་། ས་འོག་གི་གདུག་པ་ཅན་འདུལ་བར་བྱེད་པའི་རྡོ་རྗེ་ཀུན་འདུལ་ཞེས་བྱ་བའི་རྒྱུད་ཆེན་པོ་བཤད་དུ་གསོལ།
293b8 རྡོ་རྗེ་འཛིན་པ་ཆེན་པོ་བཤད་དུ་གསོལ་ཁྱབ་བདག་ཆེན་པོ་བཤད་དུ་གསོལ། གདུག་པ་ཀུན་འདུལ་བར་བྱེད་པ་ཆེན་པོས་བཤད་དུ་གསོལ། མུན་པ་ཀུན་འཇོམས་པ་ཆེན་པོ་བཤད་དུ་གསོལ་ཞེས་ཕྱག་ན་རྡོ་རྗེས་གསོལ
iiif viewer powered by OpenSeadragon
