| e-texts navigator |
| Wylie |
158b1 བདུད་རྩི་ལྔ་རྣམས་བལྟ། །དེ་ཉིད་གསུམ་གྱིས་བྱིན་གྱིས་བརླབ། །དཀྱིལ་འཁོར་བདག་པོ་རྣམས་ལ་མཆོད། །ལྕེ་ལ་རྣམ་དག་རྡོ་རྗེ་ཉིད། །ཧཱུ~ཾ་ཡིག་ལས་བྱུང་དེ་ལ་བལྟ། །དེ་ཡི་འོད་ཟེར་སྦུབས་རྣམས་ལས། །
158b2 མཚུངས་པར་དགུག་ཅིང་དེ་ཡིས་ནི། །ཁམས་གསུམ་བཞུགས་པའི་རྫོགས་སངས་ཀུན། །དེ་བཞིན་དཀྱིལ་འཁོར་མཆོག་འདི་ལ། །སྙིང་གའི་ཡེ་ཤེས་དགུག་གཞུག་བྱ། །རྣམ་པར་རྟོག་པ་ཐམས་ཅད་སྤངས། །ཐོག
158b3 མཐའ་དབུས་མའི་དབྱེ་བ་ཡིས། །དཔག་མེད་གཟུགས་བྱེ་དེ་ལ་ཡང་། །འཁྲུལ་པའི་གཟུགས་ལ་དེ་ཉིད་མེད། །གང་ལས་འཁྲུལ་པ་གཉིས་ལ་གནས། །འཁྲུལ་མེད་ཐམས་ཅད་སེམས་ལ་སྦྱིན། །འཕྲོ་དང་བསྡུ་བ་རྣམ་པར
158b4 གཟུང་། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་དམར་པོའི་རྒྱུད་ལས་མངོན་རྟོགས་ཀྱི་རིམ་པར་ཕྱེ་བ་སྟེ་དང་པོའོ།། །། དེ་ནས་བཅོམ་ལྡན་འདས་དེ་བཞིན
158b5 གཤེགས་པ་ཐམས་ཅད་ཀྱིས་བཅོམ་ལྡན་འདས་རྡོ་རྗེ་སེམས་དཔའ་ཆེན་པོ་ལ་བསྟོད་པའི་རྒྱལ་པོ་འདིས་གསོལ་བ་བཏབ་པ་དང་། ཇི་ལྟར་སེམས་ཅན་རབ་འཇུག་ལ། །ལས་ཀྱི་དབྱེ་བའི་རབ་དབྱེ་ལས། །ཡེ་ཤེས་ཀྱི་ནི་རྒྱ་མཚོ
158b6 རྣམས། །རྡོ་རྗེ་ཆེན་པོ་བཤད་ཀྱིས་ཉོན། །དེ་ནས་རྡོ་རྗེ་འཛིན་རྒྱལ་པོས། །ལས་ཀུན་ཐམས་ཅད་རབ་བསྒྲུབ་པ། །ཉེས་ཀུན་གསོ་བའི་བདག་ཉིད་ཀྱིས། །ཚིགས་འདི་ཉིད་ནི་བཀའ་སྩལ་ཏོ། །དེ་ནས
158b7 བཅོམ་ལྡན་འདས་དེ་བཞིན་གཤེགས་པ་རྣམས་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་རབ་ཏུ་གསལ་བར་མཛད་པ་ལ། བཅོམ་ལྡན་འདས་མཆོད་ཅིང་ཕྱག་འཚལ་ཏེ། གཡས་ཕྱོགས་སུ་ལན་གསུམ་བསྐོར་བ
158b8 བྱས་ནས། ཡང་དང་ཡང་དུ་ཕྱག་འཚལ་ཏེ་བཅོམ་ལྡན་འདས་ཀྱི་བཀའ་ཉན་པར་མཛད་དོ། །དེ་ནས་རྡོ་རྗེ་འཛིན་རྒྱལ་པོས། །དབང་དུ་བྱ་བའི་འཁྲུལ་འཁོར་གསུངས། །འཁྲུལ་འཁོར་མཐར་ཐུག་གཤིན་རྗེ་གཤེད། །
iiif viewer powered by OpenSeadragon
