| e-texts navigator |
| Wylie |
298a1 བའི་དུས་ལ་བབ་པར་གཟིགས་ནས་མ་ཆགས་པའི་ཐུགས་རྗེས་རྣམ་པ་སྣ་ཚོགས་པའི་སྤྲུལ་པས་འགྲོ་བའི་དོན་མཛད་པའོ། །དེའི་ཚེ་ན་ལྷ་མ་སྲིན་ཤིན་དུ་དྲེགས་པ་དང་།
298a2 དྲེགས་པའི་རུ་དྲཿ་ཞེན་ཆགས་ཀྱི་འདམ་ན་གནས་པ། ང་རྒྱལ་གྱི་རི་རབ་ལ་གནས་པ་ཕྲག་དོག་གི་རླུང་སེམས་ལ་འཚུབ་པ། གཏི་མུག་མུན་པའི་གཡུང་དྲུང་ན་གནས་པ། དེ་ལྟ་བུ་དག་འདུལ་བའི་དུས་ལ་བབ་པར
298a3 གཟིགས་ནས་དེ་བཞིན་གཤེགས་པ་ཐམས་ཅད་ཐུགས་གཅིག་ཏུ་གྱུར་ཏེ། མི་གནས་པའི་ཡེ་ཤེས་ཆེན་པོ་ལས་རྡོ་རྗེའི་རིགས་དང་བུད་དྷའི་རིགས་དང་། རིན་པོ་ཆེའི་རིགས་དང་། པད་མའི་རིགས་དང་།
298a4 ལས་ཀྱི་རིགས་སུ་གྱུར་ཏེ། སོ་སོའི་ཡུམ་དང་ཆས་ནས་བཞུགས་ཏེ་ཐུགས་འདུས་པའི་བྱིན་གྱིས་བརླབས་ལས་ཐམས་ཅད་ཀྱི་རིགས་ཀྱི་སངས་རྒྱས་སྐུ་བཻ་དཱུརྱའི་རང་བཞིན་ལྟར་སྔོ་བ། སྔོན་པོར་སྣང
298a5 བ་སྔོ་བར་གྱུར་པ། རིན་པོ་ཆེ་ཨིནྡྲ་ནཱི་ལ་ལྗང་གུ་ལྟ་བུའི་ཁ་དོག་ཏུ་སྣང་བ། ལྕང་ལོ་ཅན་གྱི་ཆ་བྱད་ཕྱག་ན་རྡོ་རྗེ་བསྣམས་ནས་ཐུགས་ཀར་བརྟན་པ་བྱུང་ངོ་། །བྱུང་བར་གྱུར་ཏོ། །དེའི་མཐུ་དང་སྟོབས
298a6 ཀྱིས་འཇིག་རྟེན་ན་གནས་པའི་དྲེགས་པ་ཅན་བརྟུལ་ཏེ། དམ་ལ་བཏགས་ནས་བྱང་ཆུབ་མཆོག་ཏུ་སེམས་བསྐྱེད་དོ། །དཔལ་རྡོ་རྗེ་གཏུམ་པོ་ཐམས་ཅད་གསང་བའི་རྒྱུད་ལས་གླེང་གཞིའི་ལེའུ་སྟེ་དང་པོའོ།། །།
298a7 ཡང་དེའི་ཚེ་ན་ཉོན་མོངས་པ་ལ་གནས་པའི་སེམས་ཅན་ཞི་བས་མི་འདུལ་བར་གྱུར་པ་དག་གནས་པ་ལས་རིགས་ལྔའི་བཅོམ་ལྡན་འདས་རྣམས་ཀྱིས་གསང་བའི་བདག་པོ་ལ་བཀའ་བསྒོ་བ་སྟེ།
298a8 ཀྱེ་གསང་སྔགས་དང་རིག་སྔགས་དང་གཟུངས་སྔགས་ཀུན་གྱི་བདག་པོ་ཞི་བས་མི་འདུལ་བའི་སེམས་ཅན་ལ་ཐམས་ཅད་ཁྲོས་པའི་ཚུལ་གྱིས་གདུལ་བར་གྱིས་ཤིག་ཅེས་བཀའ་སྩལ་ཏོ། །
iiif viewer powered by OpenSeadragon
