| e-texts navigator |
| Wylie |
281b1 སླར་གསོལ་བ་ནི་མཐོང་ལགས་སོ། །ཡེ་ཤེས་སྤྱོད་པ་རྡོ་རྗེ་ཆེ། །བདེ་བར་གཤེགས་པ་མཐོང་ཞེས་གསོལ། །དེ་ལྟར་ཡང་དག་གྱུར་པའོ། །དེ་ལྟར་སངས་རྒྱས་ཐམས་ཅད་ཀུན། །རྡོ་རྗེ་བཙུན་མོའི་བྷ་ག་ལས། །མངོན་པར
281b2 བྱུང་ནས་འདི་སྐད་གསོལ། །གང་དུ་འདོད་ཆགས་ཆེན་པོ་ཡི། །ཡི་གེའི་ཚོགས་ཀྱིས་སངས་རྒྱས་ཀྱི། །བྱང་ཆུབ་རྗེས་སུ་རྟོགས་གྱུར་གང་། །དེ་ནས་བཅོམ་ལྡན་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །དེ
281b3 ནས་རིགས་ཀྱི་བདག་པོ་ཡིས། །གསང་བ་མཆོག་ཏུ་བཀའ་སྩལ་པ། །སངས་རྒྱས་བྱང་ཆུབ་སེམས་དཔའ་ཀུན། །དེ་སྐད་ཅེས་ནི་མ་ཟེར་ཅིག་།དེ་ཉིད་ཅི་ཡི་ཕྱིར་ཞེ་ན། །ཆོས་རྣམས་ནམ་མཁའི་རྡོ་རྗེའི་གནས། །
281b4 དེ་ཉིད་མཚུངས་ཕྱིར་སྟོང་པ་ཉིད། །རབ་ཏུ་མི་གནས་བདག་ཉིད་ལས། །ཆོས་རྣམས་འོད་གསལ་དབྱིངས་གྱུར་པ། །དེ་ཉིད་ཡེ་ཤེས་འབྱུང་གནས་གྱུར། །དེ་ནས་བྱང་ཆུབ་སེམས་དཔའ་དེ་དག་དང་། དེ་བཞིན
281b5 གཤེགས་པ་དེ་དག་ཐམས་ཅད་ཅང་མི་གསུང་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་རྣམ་པར་དག
281b6 པའི་མཉམ་པ་ཉིད་སྤྱོད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་ཀྱང་སངས་རྒྱས་དང་བྱང་ཆུབ་སེམས་དཔའ་དང་། རིག་མ་དང་ལྷ་མོ་དང་། ཁྲོ་བོའི་རྒྱལ་པོ
281b7 དུ་མ་དང་བཅས་པའི་དཀྱིལ་འཁོར་གྱི་འཁོར་ལོ་ལ་བཞུགས་ནས་ཅང་མི་གསུང་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་འཛིན་པས་དེ་བཞིན་གཤེགས་པ་ཐམས་ཅད་དང་། བྱང་ཆུབ
281b8 སེམས་དཔའ་སེམས་དཔའ་ཆེན་པོ་ཐམས་ཅད་ལ་བཀའ་སྩལ་པ། ཁྱེད་རྣམས་ཀྱིས་ཕྱོགས་བཅུ་མཐའ་ཡས་པའི་འཇིག་རྟེན་གྱི་ཁམས་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་སྐུ་དང
iiif viewer powered by OpenSeadragon
