| e-texts navigator |
| Wylie |
307b1 བ་ལས་འདོད་ཆགས་སོ། །འདོད་ཆགས་ལས་འདོད་ཆགས་དང་བྲལ་བ་དང་། བར་མའི་འདོད་ཆགས་རབ་ཏུ་ཤེས་པར་བྱ་སྟེ། དེའི་ཕྱིར་ལུས་ཏེ། ལུས་ལས་བྱུང་བའི་སྐྱིལ་དཀྲུང་བཅིང་བ་ལ་སོགས་པ་དང་། གསུང་གི
307b2 ཕྱག་རྒྱའི་ཐབས་སུ་གྱུར་པ། ཨཱ་ལི་ཀཱ་ལི་ལས་ཡང་དག་པར་བྱུང་བའི་སྔགས་དང་། སེམས་ཀྱི་ཕྱག་རྒྱའི་ཐབས་སུ་གྱུར་པ་ས་བོན་དང་མཚན་མ་ལས་ལྷར་དམིགས་པའོ། །གཟུགས་ལ་སོགས་པའི་ཡུལ
307b3 ནི་དབང་པོ་གཉིས་སྙོམས་པར་ཞུགས་པའི་ཐབས་སུ་གྱུར་པའོ། །རྡོ་རྗེ་དང་པདྨ་ཡང་དག་པར་སྦྱོར་བ་ནི་སེམས་དང་སེམས་ལས་བྱུང་བ་དག་གི་ཐབས་སུ་གྱུར་པའོ། །སེམས་དང་སེམས་ལས་བྱུང་བ་མཉམ
307b4 པར་སྦྱར་བ་ནི་བདེ་བ་ཆེན་པོའི་ཏིང་ངེ་འཛིན་གྱི་ཐབས་སུ་གྱུར་པའོ། །དེ་སྒྱུ་མའི་དཔེས་ཉེ་བར་མཚོན་པ་སྟེ། དེའི་ཕྱིར་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ་རྣམས་ནི་སྒྱུ་མ
307b5 ལྟ་བུ་དང་ཆུ་ཟླ་དང་མིག་ཡོར་དང་སྨིག་རྒྱུ་དང་རྨི་ལམ་དང་སྒྲ་བརྙན་དང་དྲི་ཟའི་གྲོང་ཁྱེར་དང་མིག་འཕྲུལ་དང་དབང་པོའི་གཞུ་དང་གློག་དང་ཆུ་བུར་དང་། མེ་ལོང་གི་གཟུགས་བརྙན་ལྟ་བུ་སྟེ། སྒྱུ་མའི་དཔེ་བཅུ་གཉིས
307b6 ཀྱིས་བདེ་བ་ཆེན་པོའི་ཏིང་ངེ་འཛིན་ཉེ་བར་མཚོན་པར་བྱེད་པ་ཡིན་ནོ། །ཇི་ལྟར་འོ་མ་བསྲུབས་པ་ལས་མར་དང་། ཇི་ལྟར་ཏིལ་ལས་ཏིལ་མར་ཏེ། དེ་བཞིན་དུ་རྡོ་རྗེས་ནི་ཐབས་ཀྱི་ཡེ་ཤེས་ཉེ་བར་མཚོན་པའི
307b7 ཕྱིར་དང་། པདྨས་ནི་ཤེས་རབ་ཀྱི་ཡེ་ཤེས་ཉེ་བར་མཚོན་པའི་ཕྱིར་རོ། །ཇི་ལྟར་འོ་མ་དང་ཏིལ་དག་ཡང་དག་པར་མངོན་པར་འདུས་བྱས་པ་མེད་པར་ཏིལ་མར་མི་འབྱུང་བ་དེ་བཞིན་དུ། སྔགས་དང་ཕྱག་རྒྱ་མངོན་པར
307b8 འདུས་བྱས་པའི་རྡོ་རྗེ་དང་པདྨ་མཉམ་པར་སྦྱར་བ་མེད་པར་རྣམ་པར་ཤེས་པ་གསུམ་ཉེ་བར་མཚོན་པར་མི་ནུས་སོ། །གང་གིས་བྷ་ག་དང་ལིང་ག་ཡང་དག་པར་སྦྱོར་བར་མི་ནུས་པ་དེས་ནི་བདེ་བ་ཆེན་པོའི་ཏིང་ངེ་འཛིན་མི་རྙེད་དོ། །
iiif viewer powered by OpenSeadragon
