| e-texts navigator |
| Wylie |
304b1 ཆོས་ཉིད་ཡིན། །ཆོས་དང་ལོངས་སྤྱོད་སྤྲུལ་པ་སྟེ། །སྐུ་གསུམ་དུ་མ་ཡང་དག་བཤད། །གསུམ་པོ་ཡང་དག་འཛིན་པས་ནི། །དེས་ན་ཨོཾ་ནི་སྡོམ་པ་ཡིན། །དང་པོ་གཅིག་པུ་མི་བསྐྱོད་དགོད། །དེ་ཉིད་སྡོམ་པར་གྱུར་པ་ཡིན། །
304b2 བརྡ་རུ་བརྗོད་པ་སྣ་ཚོགས་པ། །བསམས་ནས་སྡོམ་པ་ཀུན་དུ་བཤད། །མི་ཕྱེད་ནམ་མཁའི་སྦྱོར་བ་ཡིན། །བསམ་དང་གདོན་དང་རྣམ་པར་བྲལ། །རྟེན་འབྲེལ་རིག་ལས་ཡང་དག་འབྱུང་། །རྗེས་བཅས་ཞེས་བྱ་དེ་བསྒོམ་བྱ། །
304b3 རྟག་ཏུ་འབྱུང་བའི་ཡེ་ཤེས་ཞིག་།མིག་ལ་སོགས་པ་བདུན་བརྒྱ་ལ། །གཡས་དང་གཅིག་ཤོས་ཟླ་ཕྱེད་དེ། །ཤེས་རབ་ཐབས་ཀྱང་སྒྲུབ་པའོ། །འདི་དག་ཟུང་གྱུར་ཟླ་བ་སྟེ། །རྡོ་རྗེ་མིང་ཅན་ཕྱེད་དང་གཉིས། །དེ་ནི་སྦྱོར་བ་འདི་ཉིད
304b4 ཀྱིས། །དངོས་གྲུབ་མྱུར་དུ་འཐོབ་པར་འགྱུར། །ཞག་ནི་མི་ཐུབ་ཟླ་ཕྱེད་དང་། །ཟླ་གཅིག་ཟླ་བ་ཕྱེད་གཉིས་མིན། །འཇིག་རྟེན་པ་ཡི་ཞག་དབྱེ་བས། །རྒྱ་ཆེར་ངས་ནི་བཤད་པ་ཡིན། །གསང་བ་མཆོག་ལས་བྱུང་བ་ནི། །ཟླ་བ་ཕྱེད་ཀྱིས
304b5 སྒྲུབ་པར་གསུངས། །དེ་ཉིད་ཉེ་བར་འགྱུར་བཤད་པའི། །སྡོམ་པའི་ཡུལ་ནི་དམ་པ་ཡིན། །གང་ཚེ་ཤེས་རབ་ཐབས་ཡེ་ཤེས། །དེ་བཞིན་ཉིད་ཤེས་ལས་བྱུང་བ། །སངས་རྒྱས་སྐུ་འཛིན་དཔལ་དང་ལྡན། །རྡོ་རྗེ་མི་ཕྱེད་འོད་པོ
304b6 ཆེ། །བྱང་ཆུབ་སྐད་ཅིག་གིས་སྦྱོར་བ། །རྡོ་རྗེ་སྐུ་ནི་བྱེད་པར་འགྱུར། །སྲོག་ལ་སོགས་དང་གྲངས་མཉམ་པའི། །བདག་མེད་ཕྱོགས་བཞུགས་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །རྡོ་རྗེ་བྱིན་བརླབས་མཛད
304b7 པར་འགྱུར། །འདས་དང་མ་འོངས་སངས་རྒྱས་དང་། །གང་ཞིག་ཕྱོགས་བཅུར་བཞུགས་པ་རྣམས། །ཆོས་སྐུ་མཆོག་གི་རྣལ་འབྱོར་པ། །སངས་རྒྱས་དེ་རྣམས་བྱིན་གྱིས་རློབ། །འདས་པ་རྣམས་ནི་ཆོས་སྐུ་ཡིས། །བསམ་མི་ཁྱབ་པའི
304b8 ཕྱོགས་ན་བཞུགས། །སྔགས་མཆོག་བསམ་གྱིས་མི་ཁྱབ་པས། །མ་འོངས་རྣམས་ཀྱིས་བྱིན་གྱིས་རློབ། །སངས་རྒྱས་གསུམ་ལ་དབྱེ་བ་ནི། །ཅུང་ཟད་ཙམ་ཡང་ཡོད་མ་ཡིན། །འོན་ཀྱང་དངོས་མེད་ལས་བྱུང་བའི། །སྔགས་པ་རྣམས་ལ་བྱིན་གྱིས་རློབ། །
iiif viewer powered by OpenSeadragon
