| e-texts navigator |
| Wylie |
80b1 ལམ་ནི་གང་ལགས། །བཅོམ་ལྡན་འདས་ཀྱིས་བཀའ་སྩལ་པ། །བུམ་པ་གསང་བ་ཤེས་རབ་དང་། །བཞི་པའི་རང་བཞིན་ངོ་བོ་སྟེ། །དེ་ཡི་རྣམ་པ་དེ་ལ་གནས། །རྡོ་རྗེ་སྙིང་པོས་གསོལ་པ། བཅོམ་ལྡན་འདས་གྲོལ་བའི་ལམ་གང་ལགས། །
80b2 བཅོམ་ལྡན་འདས་ཀྱིས་བཀའ་སྩལ་པ། །སྙིང་རྗེ་ཆེན་པོ་ལས་སྐྱེས་པ། །དགའ་བའི་ཤུགས་ལས་རྣམ་པར་གྲུབ། །ཐབས་དང་ཤེས་རབ་གཉིས་མེད་མཆོག་།བདེ་བ་ཆེན་པོ་ལམ་ཡིན་ནོ། །རྡོ་རྗེ་སྙིང་པོས་གསོལ་པ། བཅོམ
80b3 ལྡན་འདས་སྙིང་རྗེ་ཆེན་པོ་ནི་གང་། དགའ་བ་ནི་གང་། ཐབས་ནི་གང་། ཤེས་རབ་ནི་གང་། གཉིས་སུ་མེད་པ་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། །དམིགས་པ་མེད་པ་སྙིང་རྗེའི་མཆོག་།དགའ་བ་གཉིས་མེད
80b4 བདེ་བ་ཆེ། །ཐབས་ནི་ཧེ་རུ་ཀ་དཔལ་ཉིད། །ཤེས་རབ་རྡོ་རྗེ་རྣལ་འབྱོར་མ། །གཉིས་སུ་མེད་པ་ཟུང་འཇུག་མཆོག་།རྡོ་རྗེ་སྙིང་པོས་གསོལ་པ། བཅོམ་ལྡན་འདས་ཧེ་རུ་ཀ་ནི་གང་ལགས། རྣལ་འབྱོར་མ་ནི་གང་ལགས། བཅོམ
80b5 ལྡན་འདས་ཀྱིས་བཀའ་སྩལ་པ། །ཧེ་རུ་ཀ་ནི་ཕུང་པོ་ཉིད། །ཕུང་པོ་ཡང་ནི་ཧེ་རུ་ཀ་།ཁམས་ནི་རྡོ་རྗེ་མ་དཔལ་ཏེ། །རྡོ་རྗེ་མ་དཔལ་ཁམས་ཉིད་དོ། །སྐྱེ་མཆེད་དེ་ཡང་དེ་བཞིན་དུ། །ལྷ་ཡི་ངོ་བོར་ཤེས་པར་བྱ། །རྡོ་རྗེ་སྙིང་པོས
80b6 གསོལ་པ། བཅོམ་ལྡན་འདས་ཕུང་པོའི་ཧེ་རུ་ཀ་གང་ལགས། ཁམས་ཀྱི་རྡོ་རྗེ་རྣལ་འབྱོར་མ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། །ཧེ་རུ་ཀ་དཔལ་བདག་ཉིད་དངོས། །དྲི་མ་མེད་པའི་ཁ་དོག་ཅན། །རྡོ་རྗེ་དྲིལ
80b7 བུ་འཛིན་པ་སྟེ། །དྲུག་གིས་བརྒྱན་ཅིང་དགུ་དང་ལྡན། །ཟླ་ཚེས་སྣ་ཚོགས་རྡོ་རྗེ་དང་། །རིགས་ཀྱི་བདག་པོས་རྣམ་པར་བརྒྱན། །སྤྱན་གསུམ་དག་གིས་མཛེས་པ་སྟེ། །ཆགས་པ་མེད་པའི་ཤམ་ཐབས་ཅན། །ཤེས་རབ་རང་བཞིན
80b8 རྣལ་འབྱོར་མ། །བནྡུ་དམར་པོའི་ཁ་དོག་ཅན། །གཅེར་བུ་ཕྱག་རྒྱ་ལྔས་བརྒྱན་ཅིང་། །དག་པ་ལྔ་བཅུ་ཡི་ཕྲེང་བས་མཛེས། །རྡོ་རྗེ་པད་མའི་སྣོད་སྣམས་པ། །ཡབ་ལ་འཁྱུད་ཅིང་བརྐྱང་བསྐུམ་བཞུགས། །གཉིས་མེད
iiif viewer powered by OpenSeadragon
