| e-texts navigator |
| Wylie |
77b1 ཀྱིས་བཀའ་སྩལ་པ། །ལྷན་ཅིག་སྐྱེས་པའི་རང་བཞིན་ལ། །རྒྱུད་རྣམས་ཀུན་གྱི་ངོ་བོ་འདུས། །ཡོད་པ་རྒྱུ་ལ་བསྒྲུབ་པ་ལམ། །མངོན་འགྱུར་འབྲས་བུའི་ངོ་བོ་ཡིན། །ཐོག་མར་གསུངས་པ་རྩ་བའི་རྒྱུད། །ཕྱི་ནས་གསུངས་པ་བཤད་པའི་རྒྱུད། །དོན་རྣམས་སྟོན་པས་རྩ་བ་ལ། །གསལ
77b2 བར་བྱེད་པ་བཤད་པའི་རྒྱུད། །བསྐལ་པ་རྫོགས་ལྡན་སུམ་གཉིས་དང་། །རྩོད་ལྡན་དུས་བཞིའི་རིམ་པ་ཡིས། །རྒྱུད་ཀྱང་རྣམ་པ་བཞིར་གསུངས་ཏེ། །བྱ་སྤྱོད་རྣལ་འབྱོར་བླ་མད་དོ། །ལྷ་མོས་གསོལ་པ་བཅོམ་ལྡན་འདས། །ཟབ་མོའི་རྒྱུད་འདི་གང་ལ་སྦ། །ཇི་ལྟ་བུ་ལ་སྦྱིན
77b3 པར་བྱ། །སྟེར་ན་ལུང་ནོད་ཇི་ལྟར་བྱ། །བཀའ་འདི་རྒྱ་ཡིས་ཇི་ལྟར་གདབ། །བཅོམ་ལྡན་འདས་ཀྱིས་བཀའ་སྩལ་པ། །སྙིང་རྗེ་མེད་ཅིང་ཁྲོ་ལ་གདུག་།ཁེངས་ཤིང་ཆགས་པ་ཚུལ་ཁྲིམས་མེད། །དད་མེད་རིགས་ངན་བླ་མས་སྐྱོ། །ཐོས་ཆུང་སྙིང་རིང་རྣམས་ལ་སྦ། །
77b4 དཔའ་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ལ་གཡོ་སྒྱུ་མེད། །དད་ལྡན་རིགས་བཟང་གཏོང་ཕོད་ཆེ། །ཐོས་མང་དམ་ཚིག་ལྡན་ལ་སྦྱིན། །དབང་བཞི་བགྲོད་པའི་སྔགས་པ་ཡིས། །སྔོན་དུ་བླ་མ་མཉེས་བྱས་ལ། །ཡར་ངོ་མར་ངོའི་ཚེས
77b5 བཅུ་ལ། །དཔའ་བོ་རྣལ་འབྱོར་ཚོགས་ཀྱིས་མཆོད། །ཇི་ལྟར་རྡོ་རྗེ་འཛིན་པ་ཡིས། །ལྷ་མོ་རྣམས་ལ་རྒྱུད་གཏད་ལྟར། །དེ་བཞིན་གསང་བའི་རྒྱུད་སྡེ་རྣམས། །ཟུང་ལ་སྒྲུབ་པ་ཆེད་དུ་གྱིས། །ལན་གསུམ་བརྗོད
77b6 ལ་རྒྱུད་རྣམས་སྦྱིན། །ཕྱི་རབས་དུས་ཀྱི་སྙིགས་མ་ལ། །ཆགས་སེམས་གྱོང་བའི་སློབ་མ་ནི། །གུས་པས་མི་ཞུ་གཡོ་སྒྱུས་འདོད། །ཐོས་ནས་ཁུངས་སུབ་རང་ཆེ་འབྱིན། །དེ་ལ་བསྟན་ན་དམ་ཚིག་ཉམས། །ངེས་པར
77b7 དད་ནས་ཞུ་བ་ཡི། །གཅིག་ནས་གཉིས་ལ་མ་སྤེལ་ན། །རྡོ་རྗེ་འཛིན་པའི་རིགས་རྒྱུན་འཆད། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཡེ་ཤེས་མཁའ་འགྲོ་མ་ལ་སོགས་པའི་འཁོར་ཐམས
77b8 ཅད་ཀྱིས་རྒྱུད་ཀྱི་དོན་རྟོགས་ནས་རྗེས་སུ་ཡི་རང་ངོ་། །དཔལ་འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་རྫོགས་སྷོ།། །། པཎྜི་ཏ་གཱ་ཡ་དྷ་ར་དང་། ལོ་ཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།། །།དགེའོ།།
iiif viewer powered by OpenSeadragon
