| e-texts navigator |
| Wylie |
67b1 རྒྱལ་པོ་སྟེ། །དེ་རྣམས་ཀུན་ལ་དབང་བྱེད་པས། །ལོག་ལྟའི་རྒྱུད་སོགས་སྤོང་བར་བྱེད། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའི་འཁོར་དཔག་ཏུ་མེད་པ་རྣམས་དགའ་ཞིང་མགུ་ནས་རྗེས་སུ་ཡིད་རངས
67b2 ཏེ། གཡས་ཕྱོགས་ནས་ལན་གསུམ་བསྐོར་ནས་སོ་སོའི་རྫུ་འཕྲུལ་གྱིས་མི་སྣང་བར་གྱུར་ཏོ། །དཔལ་རྡོ་རྗེ་འཇིགས་བྱེད་རྣམ་པར་འཇོམས་པའི་རྒྱུད་ཀྱི་རྒྱལ་པོ་རྫོགས་སྷོ།། །། པཎ་ཌི་ཏ་གཱ་ཡ་དྷ་ར་དང་། ལོ་ཙྪ་བ་དགེ་སློང
67b3 ཤཱཀྱ་ཡེ་ཤེས་ཀྱིས་བསྒྱུར་བའོ། ། @#། །རྒྱ་གར་སྐད་དུ། ཤྲཱི་ཨགྣི་མཱ་ལེ་ཏནྟྲ་རཱ་ཛཱ། བོད་སྐད་དུ། དཔལ་མེའི་ཕྲེང་བའི་རྒྱུད་ཀྱི་རྒྱལ་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཧ་ཧ་ཧི་ཧི་ཧེ་ཧེ་ཀྱེ། །
67b4 བདག་ལ་ཁྱེད་ལ་ཞུ་བ་མཆིས། །ཤྲཱི་ནི་གང་ལགས་ཧེ་གང་ལགས། །རུ་ནི་གང་ལགས་ཀ་གང་ལགས། །དབང་བཞི་ཧེ་རུ་ཀ་གང་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་རྣམ
67b5 པར་སྤངས། །རུ་ནི་ཚོགས་དང་བྲལ་བ་ཉིད། །ཀ་ནི་གང་དུའང་མི་གནས་སོ། །དེ་ལྟའི་དཔལ་ལྡན་ཧེ་རུ་ཀ་། རྟག་ཏུ་ལུས་དང་སེམས་ལ་གནས། །དེ་ཉིད་ལ་ཡང་རྣམ་པ་བཞི། །དབང་བཞི་གྲངས་ཀྱིས་ངེས་པ་སྟེ། །དང་པོ་བུམ་དབང་ཧེ
67b6 རུ་ཀ་། སྐུ་དང་ཕྱག་མཚན་སྣང་བའི་ཚེ། །རང་སེམས་ལས་སུ་རུང་བ་སྟེ། །དེ་ཚེ་འཇིག་རྟེན་ཐ་མལ་པའི། །རྒྱུ་དྲུག་རྐྱེན་བཞི་འབྲས་བུ་བཞི། །སྤངས་པའི་ཕྱིར་ན་ཧེ་ཞེས་བརྗོད། །ལས་དང་ཉོན་མོངས་ཚོགས་དང་བྲལ། །དེ་ཡི་ཕྱིར་ན་རུ
67b7 ཞེས་བརྗོད། །འཇིག་རྟེན་ཐ་མལ་རྣམ་རྟོག་གི། །གཟུང་འཛིན་གང་ཡང་མི་གནས་པའི། །ཕྱིར་ན་ཀ་ཞེས་གསུངས་པའོ། །ཐབས་དང་ཤེས་རབ་ཟུང་འཇུག་པས། །གཟུང་འཛིན་གཉིས་བགགས་གཉིས་སུ་མེད། །དེ་ཡི་ཕྱིར་ན་ཤྲཱི་རུ་བརྗོད། །
67b8 བསྐྱེད་པའི་རིམ་པ་ཧེ་རུ་ཀ་། ཕག་མོ་ལ་གནས་ཚོགས་དང་ལྡན། །ཟག་མེད་རྒྱུ་རྐྱེན་ཀུན་དང་ལྡན། །ཐབས་དང་ཤེས་རབ་གཉིས་ཀྱི་ཚུལ། །དེ་ནས་གསང་དབང་ཧེ་རུ་ཀ་། ཉི་ཟླ་ཕྱག་མཚན་ཡིག་འབྲུའི་ཚོགས། །བསྐྱེད་རིམ་རྒྱུ་རྐྱེན་ཀུན
iiif viewer powered by OpenSeadragon
