| e-texts navigator |
| Wylie |
241a1 @#། །རྒྱ་གར་སྐད་དུ། ཡོ་གི་ནཱི་སན་ཙཨཱརྱ། བོད་སྐད་དུ། རྣལ་འབྱོར་མའི་ཀུན་དུ་སྤྱོད་པ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གང་གི་དྲིན་གྱིས་བདེ་ཆེན་གནས། །སྐད་ཅིག
241a2 གིས་ནི་ཐོབ་གྱུར་བ། །བླ་མ་རིན་ཆེན་ལྟ་བུ་ཡི། །རྡོ་རྗེ་ཅན་ཞབས་པད་ལ་འདུད། །དེ་ནས་ཡང་དག་བཤད་བྱ་བ། །ཀུན་དུ་སྤྱོད་པའི་ཆོ་ག་མཆོག་།འཁོར་ལོ་གསུམ་བདག་འདི་སྒོམ་པ། །རྣལ་འབྱོར་ལམ་ལ་གནས་པ
241a3 ཡིན། །ལུགས་འབྱུང་ལུགས་ལས་བཟློག་པར་ནི། །རྒྱུད་དུ་སྦས་པར་གནས་གང་དེ། །བསྟན་པ་རུ་ནི་ཇི་སྐད་གསུངས། །བཤད་པ་ཡང་ནི་དེ་བཞིན་ནོ། །སོ་སོར་བསྟན་པ་མ་ལུས་ཉིད། །བརྡ་ཡི་ཆོ་ག་རྒྱས་པ
241a4 ཡིན། །གང་གིས་ཤེས་པ་ཙམ་གྱིས་ནི། །སྒྲུབ་པ་པོ་ཡིས་གྲུབ་ཐོབ་པ། །སུམ་བཅུ་རྩ་བདུན་ཚུལ་གྱིས་ནི། །བྱང་ཆུབ་ཕྱོགས་ལ་གནས་པ་ཡིན། །འཇིག་རྟེན་དུ་ནི་བསྒོམ་བྱར་བཤད། །ཧེ་རུ་ཀ་དཔལ་འགྲོ་བའི་མཆོག་།
241a5 དེ་ལ་ཐོག་མར་རྣལ་འབྱོར་གྱི་དབང་ཕྱུག་གིས་ཕུང་པོ་ལྔ་ལ་ལྷའི་ང་རྒྱལ་བསྐྱེད་པར་བྱ་སྟེ། གཟུགས་ཀྱི་ཕུང་པོ་ལ་ནི་རྣམ་པར་སྣང་མཛད་དོ། །ཚོར་བའི་ཕུང་པོ་ལ་ནི་རྡོ་རྗེ་ཉི་མའོ། །འདུ་ཤེས་ཀྱི་ཕུང་པོ་ལ་ནི་པད་མ
241a6 གར་གྱི་དབང་ཕྱུག་གོ། །འདུ་བྱེད་ཀྱི་ཕུང་པོ་ལ་ནི་རྡོ་རྗེ་རྒྱལ་པོའོ། །རྣམ་པར་ཤེས་པའི་ཕུང་པོ་ལ་ནི་རྡོ་རྗེ་སེམས་དཔའ་སྟེ། དེ་བཞིན་གཤེགས་པ་ཐམས་ཅད་ཀྱི་བདག་ཉིད་ནི་ཤྲཱི་ཧེ་རུ་ཀ་རྡོ་རྗེའོ། །མིག་གཉིས་ལ་ནི
241a7 གཏི་མུག་རྡོ་རྗེའོ། །རྣ་བ་གཉིས་ལ་ནི་ཞེ་སྡང་རྡོ་རྗེའོ། །སྣ་དག་ལ་ནི་ཕྲག་དོག་རྡོ་རྗེའོ། །ལྕེ་ལ་ནི་འདོད་ཆགས་རྡོ་རྗེའོ། །ལུས་ལ་ནི་སེར་སྣ་རྡོ་རྗེའོ། །སྐྱེ་མཆེད་ཐམས་ཅད་ལ་ནི་དབང་ཕྱུག་རྡོ་རྗེའི་དབྱིངས་སོ། །
241a8 སའི་ཁམས་ལ་ནི་ལྟུང་བྱེད་མའོ། །ཆུའི་ཁམས་ལ་ནི་གསོད་བྱེད་མའོ། །མེའི་ཁམས་ལ་ནི་འགུགས་མའོ། །རླུང་གི་ཁམས་ལ་ནི་གར་དབང་མའོ། །ནམ་མཁའི་ཁམས་ལ་ནི་པད་མའི་དྲ་བ་མོ་སྟེ། དེ་ལྟར
iiif viewer powered by OpenSeadragon
