| e-texts navigator |
| Wylie |
212a1 གཟུགས་བརྙན་བགྱིད་པ་ལ་ཕན་ཡོན་ཇི་ཙམ་ཞིག་མཆིས་པ་བདག་ཅག་གིས་མ་མཚལ་ན། དེའི་ཚེ་དེ་དག་ལ་བདག་ཅག་གིས་ཇི་ལྟར་ཆོས་དང་འཐུན་པར་ལན་གདབ་པར་བགྱི། གང་དོན་དེ་དག་ཉིད་ནི་བཅོམ་ལྡན་འདས
212a2 དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་མཁྱེན་པ། ཐམས་ཅད་གཟིགས་པ། ཐེ་ཚོམ་ཐམས་ཅད་གཅོད་པར་མཛད་པ། སྟོན་པ་དེ་ལ་བདག་ཅག་གིས་ཞུ་བར་བགྱིའོ། །འོན་ཏང
212a3 བཅོམ་ལྡན་འདས་དེ་བདག་ཅག་ལ་ལུང་སྟོན་པར་མཛད་དེ། བདག་ཅག་གིས་དེ་བཞིན་བཟུང་ནས་བྲམ་ཟེ་དང་། ཁྱིམ་བདག་དད་པ་ཅན་རྣམས་ལ་རྒྱ་ཆེར་ཕྱེ་སྟེ་ལན་གདབ་པར་བགྱིའོ་སྙམ་བགྱིད་དོ། །བཙུན་པ་བཅོམ་ལྡན
212a4 འདས་དོན་དེ་དག་ཉིད་བདག་ཅག་ཞུ་ཞིང་མཆིས་ན། བཙུན་པ་བཅོམ་ལྡན་འདས་དེ་བཞིན་གཤེགས་པའི་གཟུགས་བརྙན་བགྱིད་པའི་གང་ཟག་སྦྱིན་པ་པོ་ལ་ཕན་ཡོན་ཇི་ཙམ་ཞིག་མཆིས་པར་རིག་པར་བགྱི། བཀའ་སྩལ་པ།
212a5 དགེ་སློང་དག་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་སྙིང་བརྩེ་བ་དང་ལྷ་དང་མི་རྣམས་ལ་ཕན་པ་དང་བདེ་བའི་ཕྱིར་ཞུས་ཏེ། ཁྱེད་གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས
212a6 རྒྱས་ལ་དོན་དེ་ཉིད་ཞུ་བར་སེམས་པ་ལེགས་སོ་ལེགས་སོ། །དགེ་སློང་། དག་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བསྟན་པར་བྱའོ། །དགེ་སློང་དག་དེ་བཞིན་གཤེགས་པའི་གཟུགས་བརྙན་བྱེད་པའི
212a7 གང་ཟག་སྦྱིན་པ་པོ་ལ་ཕན་ཡོན་འདི་ལྔ་ཡོད་དེ། ལྔ་གང་ཞེ་ན། གཞལ་མེད་ཁང་ཆེན་པོར་གནས་པ་དང་། བོང་སྟེང་བཟང་པོར་གྲགས་པ་དང་། སྤྲོ་བ་མང་བ་དང་ཚེ་རིང་བ་དང་གྲགས་པ་དང་ལྡན་པ་དང་། བདེ་བ་མང་བ་སྟེ།
212a8 དགེ་སློང་དག་འདི་ནི་དེ་བཞིན་གཤེགས་པའི་གཟུགས་བརྙན་བྱེད་པའི་གང་ཟག་སྦྱིན་པ་པོའི་ཕན་ཡོན་དང་པོ་ཡིན་ནོ། །གཞན་ཡང་ཕྱུག་པོ་དང་ནོར་མང་བ་དང་ལོངས་སྤྱོད་ཆེ་བ་དང་། ནོར་རྫས་དང་། ཡོ་བྱད་མང་བ་དང་བདག་དབང
iiif viewer powered by OpenSeadragon
