| e-texts navigator |
| Wylie |
198b1 རྗེས་སུ་དྲན་ནོ། །གཉིས་དང་གསུམ་དང་བཞི་ནས་སྐྱེ་བ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་རྗེས་སུ་དྲན་ནོ་ཞེས་རྒྱ་ཆེར་སྦྱར་རོ། །ལྷའི་མིག་རྣམ་པར་དག་པ་མི་ལས་འདས་པས་སེམས་སྐྱེ་བ་དང་། ལུས་དང་ངག་དང་ཡིད་ཀྱིས་ལེགས་པར
198b2 སྤྱད་པ་དང་། ཉེས་པར་སྤྱད་པ་དག་གིས་བདེ་འགྲོ་དང་། ངན་འགྲོ་རྣམས་སུ་སྐྱེ་བ་དག་གི་སེམས་ཅན་གཟིགས་སོ་ཞེས་རྒྱ་ཆེར་སྦྱར་རོ། །ཡང་དག་པའི་ཤེས་རབ་ཀྱི་ཟག་པ་རྣམས་ཟད་ནས་ཟག་པ་ལས་སེམས་རྣམ་པར་གྲོལ་བ་ཡང་དག
198b3 པ་ཇི་ལྟ་བ་བཞིན་རབ་ཏུ་མཁྱེན་ཏེ། དགེ་སློང་དག་འདི་དག་ནི་དེ་བཞིན་གཤེགས་པའི་སྟོབས་བཅུའོ། །དེ་ལ་དེ་བཞིན་གཤེགས་པའི་མི་འཇིགས་པ་བཞི་གང་ཞེ་ན། འདི་ལ་བཅོམ་ལྡན་འདས་ཀྱིས་ཡང་དག་པར་རྫོགས་པའི་སངས་རྒྱས
198b4 སོ་ཞེས་བདག་ཉིད་ཞལ་གྱིས་འཆེ་བ་ལ་འདིར་ལྷ་དང་བཅས་པ་དང་བདུད་དང་བཅས་པ་དང་ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེར་བཅས་པ་དང་། ལྷ་དང་མི་དང་ལྷ་མ་ཡིན་དུ་བཅས་པའི་སྐྱེ་དགུ་ལས་གང་གིས་ཀྱང་ཁྱོད
198b5 ཀྱིས་ཆོས་འདི་དག་མངོན་པར་རྫོགས་པར་སངས་མ་རྒྱས་སོ་ཞེས་དེ་ལ་རྒོལ་བའི་མཚན་མ་དེ་ཡང་དག་པར་རྗེས་སུ་མི་མཐོང་ངོ་། །དེ་བཞིན་གཤེགས་པས་མཚན་མ་ཡང་དག་པར་རྗེས་སུ་མི་མཐོང་བས་བདེ་བ་ཐོབ་ཅིང་མི
198b6 འཇིགས་པ་ཐོབ་པར་གནས་ཤིང་ཁྱུ་མཆོག་གི་གནས་སུ་དམ་བཅས་ཏེ། འཁོར་གྱི་ནང་དུ་སོང་ནས་སེང་གེའི་སྒྲ་ཡང་དག་པར་སྒྲོག་ཅིང་དགེ་སྦྱོང་ངམ། བྲམ་ཟེ་འམ་སུས་ཀྱང་ཆོས་དང་འཐུན་པར་འཇིག་རྟེན་དུ་མ་བསྐོར་བའི་ཚངས
198b7 པའི་འཁོར་ལོ་རབ་ཏུ་སྐོར་བ་དང་། ཡང་གང་དག་དེ་བཞིན་གཤེགས་པས་བར་དུ་གཅོད་པའི་ཆོས་སུ་གསུངས་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་རོ་ཞེས་འདིར་དེ་ལ་ཞེས་བྱ་བར་རྒྱས་པར་སྦྱར་བ་དང་། གང་ཡང་འདིས
198b8 འཕགས་པ་ངེས་པར་འབྱུང་བའི་ལམ་བསྟེན་པ་དེ་དག་བསྟན་པ་དེ་བསྟེན་ཀྱང་སྡུག་བསྔལ་ཡང་དག་པར་ཟད་པར་བྱ་བའི་ཕྱིར་ངེས་པར་འབྱུང་བ་མ་ཡིན་ནོ་ཞེས་གང་ཡང་འདིར་དེ་ལ་ཞེས་བྱ་བར་རྒྱས་པར་སྦྱར་བ་དང་། ང་ཟག་པ
iiif viewer powered by OpenSeadragon
