| e-texts navigator |
| Wylie |
157a1 སྤྱོད་པ་ཡིས། །ངུ་འབོད་དག་ཏུ་སྐྱེ་བར་འགྱུར། །ཡིད་གཅུགས་ཉམས་པའི་མི་དག་ནི། །བ་སྤུ་སློང་ཞིང་འབར་བ་ཡིས། །བསྐོར་བའི་ཁྱིམ་གྱི་ནང་ཆུད་ནས། །ངུ་འབོད་ཆེན་པོར་སྲེག་པར་འགྱུར། །གཏམས་པ་བརྣོགས
157a2 པའི་མི་དག་ནི། །རལ་གྲི་ཡིས་ནི་ལུས་གཏུབ་ཅིང་། །བྱ་རྒོད་བྱ་རོག་འུག་པ་ཁྱིས། །འགུལ་བཞིན་དུ་ནི་ཟ་བར་འགྱུར། །དགེ་སློང་དག་མི་རྣམས་ཀྱི་ལོ་སྟོང་དྲུག་བརྒྱ་གང་ཡིན་པ་དེ་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ཉིན་ཞག
157a3 གཅིག་གོ། །ཉིན་ཞག་དེ་སུམ་བཅུ་ལ་ཟླ་བ་གཅིག་།ཟླ་བ་བཅུ་གཉིས་ལ་ལོ་གཅིག་སྟེ། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ཚེའི་ཚད་ནི་ལོ་དེ་ལྟ་བུར་རྩིས་པའི་ལྷའི་ལོ་ཁྲི་དྲུག་སྟོང་ཐུབ་པོ། །དེ་མིའི་ལྟར་རྩིས་ན་ལོ་ས་ཡ
157a4 ཕྲག་དྲུག་དང་། ལོ་བྱེ་བ་ཕྲག་དགུ་བརྒྱ་ཉི་ཤུ་རྩ་གཅིག་ཡོད་དེ། བར་མ་དོར་འཆི་བ་ནི་ཡོད་དོ། །དེ་ནི་སེམས་ཅན་དམྱལ་བ་ཆེན་པོ་ཚ་བའི་ཉིན་ཞག་གཅིག་གོ། །ཉིན་ཞག་དེ་སུམ་བཅུ་ལ་ཟླ་བ་གཅིག་།ཟླ་བ་བཅུ་གཉིས་ལ་ལོ་གཅིག
157a5 སྟེ། སེམས་ཅན་དམྱལ་བ་ཆེན་པོ་ཚ་བའི་སེམས་ཅན་དམྱལ་བ་རྣམས་ཀྱི་ཚེའི་ཚད་ནི་ལོ་དེ་ལྟ་བུར་རྩིས་པའི་ལོ་ཁྲི་དྲུག་སྟོང་ཡོད་དོ། །དེ་མིའི་ལྟར་རྩིས་ན་ལོ་བྱེ་བ་ས་ཡ་ཕྲག་བརྒྱད་དང་། བཞི་འབུམ་དང་། ལོ་བྱེ་བ་ཕྲག་ཁྲི་དྲུག
157a6 སྟོང་ལྔ་བརྒྱ་སུམ་བཅུ་ཡོད་དེ་བར་མ་དོར་འཆི་བ་ནི་ཡོད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། དགེ་སློང་བྲམ་ཟེ་དགེ་བ་དང་། །དེ་བཞིན་དུ་ནི་ཕ་མ་ལ། །གང་ཞིག་རྟག་ཏུ་རྡུང་བྱེད་པ། །དེ་ནི་ཚ
157a7 བར་སྐྱེ་བར་འགྱུར། །འདིར་ནི་གང་ཞིག་གདུང་བ་ཡིས། །སྐྱེ་བོ་མང་པོ་གདུང་བྱེད་པ། །ལས་དེ་དག་གིས་ཚ་བ་ཡི། །དམྱལ་བ་རྣམས་སུ་སྐྱེ་བར་འགྱུར། །དགེ་སློང་དག་ཁྱེད་ཆུ་བུར་ཅན་དུ་སྐྱེས་པའི་སེམས་ཅན་རྣམས་ཀྱི་ཚེའི་མཐའ
157a8 ཉན་པར་འདོད་དམ། བཅོམ་ལྡན་འདས་དེའི་དུས་ལ་བབ་ལགས་སོ། །བདེ་བར་གཤེགས་པ་དེའི་དུས་ལ་བབ་ལགས་སོ། །བཅོམ་ལྡན་འདས་ལས་དགེ་སློང་དག་གིས་གང་ཆུ་བུར་ཅན་དུ་སྐྱེས་པའི་སེམས་ཅན་རྣམས་ཀྱི
iiif viewer powered by OpenSeadragon
