| e-texts navigator |
| Wylie |
149b1 མིས་བླ་མར་བཀུར་བ་དང་། མི་མ་ཡིན་པས་བླ་མར་བཀུར་བ་དང་། བག་ཡོད་པའི་རྒྱུ་སྐྱེ་བ་དང་། འདོད་པའི་འདོད་ཆགས་རྣམ་པར་སྤོང་བ་ཉིད་དང་། ཡིད་འབྱུང་བ་མང་བ་ཉིད་དང་། འཇིགས་པ་དང་སྐྲག་པ་བཟོད་པ་ཉིད་དང་། གསོན
149b2 པས་རྒྱགས་པ་སྤོང་བ་ཉིད་དང་། ལུས་ཀྱི་རང་བཞིན་ལ་ཡང་དང་ཡང་དུ་སོ་སོར་རྟོག་པ་ཉིད་དང་། སྐྱེས་བུ་དམ་པའི་སྤྱོད་པ་ཉིད་དང་། ཡོ་བྱད་བསྙུངས་པའི་ཚུལ་ཅན་ཏེ། དེ་ལྟ་བུ་ལ་སོགས་པ་ནི་དུར་ཁྲོད་པ་ཉིད་ཀྱི་ཡོན་ཏན་དག་ཡིན
149b3 ནོ། །དུར་ཁྲོད་ཇི་ལྟ་བུར་ནི་གནས་པར་བྱ། དུར་ཁྲོད་པ་ནི་གང་ཡིན། གང་གིས་ནི་དུར་ཁྲོད་པ་ཉིད་འཇིག་ཅེ་ན། དང་པོར་ནི་རྟག་ཏུ་སྲེག་པ་དང་། དུ་བ་དང་། འབར་བ་དང་། དུ་བ་ཡོད་པ་དེ་ལྟ་བུའི་དུར་ཁྲོད་དུ་གནས་པར་བྱ་ལ།
149b4 དེ་ནས་ནི་དུར་ཁྲོད་གཞན་གང་ཡང་རུང་བར་གནས་པར་བྱའོ། །དུར་ཁྲོད་པས་དུར་ཁྲོད་དུ་སྤྱིལ་བུ་དང་། ཁང་པ་མི་བྱ། རླུང་ཡས་ལྡང་བ་དང་། མས་ལྡང་བར་གནས་པར་མི་བྱ། ཁུམ་འཕྲིག་ཅན་དུ་གནས་པར་མི་བྱ། ཉ་ཤ་དང་།
149b5 ཤ་དང་། འོ་མ་དང་། ཏིལ་གྱི་ཆུར་བེད་དང་། མོན་སྲན་གྲེའུ་ཡི་བཟའ་བ་བསྟེན་པར་མི་བྱ། ལྷུང་བཟེད་སྦྱིན་པར་མི་བྱ། ཁྱིམ་དུ་འདུག་པར་མི་བྱ། སྐྱེ་བོ་མང་པོའི་ཚོགས་ལྷགས་ན་ཁྲིའུ་དང་། ཆོས་གོས་དང་། རིལ་བ་བླངས་ཏེ་སོང
149b6 ན་སྲེག་པ་ནས་ཧ་ཅང་ཡང་མི་རིང་བ། རྡོ་རྒྱང་གིས་སླེབ་ཙམ་གྱི་ནང་དུ་དུར་ཁྲོད་དུ་གནས་པར་བྱ་ཞིང་སྐྱ་རེང་ཤར་ནས་ཁྲེའུ་དང་། ཆོས་གོས་དང་། རིལ་བ་བླངས་ནས་སླར་འགྲོ་བར་བྱ་བ་འདི་ནི་འདིའི་སྤྱོད་པ་མ་ཡིན་ནོ། །དུར
149b7 ཁྲོད་པ་ནི་གཞན་དུ་གནས་པ་སྤངས་པ་ཡིན་ནོ། །གཞན་དུ་གནས་པ་ཁས་ལེན་པས་ནི་དུར་ཁྲོད་པ་ཉིད་འཇིག་གོ། །གཞི་ཇི་བཞིན་པ་ཉིད་ཇི་ལྟར་ཡང་དག་པར་ལེན་ཞེ་ན། བརྐམ་ཆགས་ཀྱི་གནས་མལ་ལ་ཕན་ཚུན་ལྡང་བ་ཕ
149b8 རོལ་ལ་གནོད་པ་བྱེད་པའི་ཉེས་དམིགས་ཀྱང་མཐོང་། གཞི་ཇི་བཞིན་པ་ཉིད་ཀྱི་ཡོན་ཏན་དག་ཀྱང་མཐོང་ནས་འདི་སྐད་ཅེས་དེང་སླན་ཆད་བརྐམ་ཆགས་ཀྱི་གནས་མལ་སྤོང་སྟེ། གཞི་ཇི་བཞིན་པ་ཉིད་ཡང་དག་པར་ལེན་ཏོ་ཞེས
iiif viewer powered by OpenSeadragon
