| e-texts navigator |
| Wylie |
134a1 གཞན་ཞིག་ན་རྒྱལ་པོ་སེང་གེ་འགྲམ་ཤི་ནས། སེར་སྐྱའི་གཞི་ན་རྒྱལ་པོ་ཟས་གཙང་རྒྱལ་སྲིད་བྱེད་དུ་བཅུག་སྟེ། འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་། མི་མང་པོས་གང་བ། འཐབ་པ
134a2 དང་། ཐབ་མོ་དང་། རྩོད་པ་དང་། འགྱེད་པ་དང་། ཆོམ་རྐུན་མེད་ཅིང་། ནད་རབ་ཏུ་ཞི་བར་གྱུར་པ། འབྲས་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་ན། བུ་གཅིག་པ་ལ་སྡུག་པ་བཞིན་དུ་རྒྱལ་སྲིད་སྐྱོང
134a3 བར་བྱེད་དོ། །དེ་དུས་གཞན་ཞིག་ན་བཙུན་མོ་སྒྱུ་འཕྲུལ་ཆེན་པོ་དང་ལྷན་ཅིག་སྟེང་གི་ཁང་བཟངས་ཀྱི་གཞི་སྐྱེས་པ་མེད་པར་དོང་ནས། རོལ་མོས་རྩེ་བར་བྱེད། དགའ་བར་བྱེད། དགའ་དགུར་སྤྱོད་པར་བྱེད་དོ། །འདི་ནི་ཆོས་ཉིད་ཡིན་ཏེ།
134a4 བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ན་འཇིག་རྟེན་ལ་གཟིགས་པ་ལྔས་གཟིགས་པར་མཛད་དོ། །རིགས་ལ་གཟིགས་པ་དང་། ཡུལ་ལ་གཟིགས་པ་དང་། དུས་ལ་གཟིགས་པ་དང་། རྒྱུད་ལ་གཟིགས་པ
134a5 དང་། བུད་མེད་ལ་གཟིགས་པ་སྟེ། རྒྱ་ཆེར་མདོ་སྔ་མ་དང་སྦྱར་རོ། །མངོན་པར་འབྱུང་བའི་མདོ་རྫོགས་སོ།། །། རྒྱ་གར་གྱི་མཁན་པོ་ཨཱ་ཙརྱ་དྷརྨ་ཤྲཱི་བྷ་དྲ་དང་། ཞུ་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །
134a6 @##། །རྒྱ་གར་སྐད་དུ། བྷིཀྵུ་པྲ་རེ་ཛུ་སཱུ་ཏྲ་ནཱ་མ། བོད་སྐད་དུ། དགེ་སློང་ལ་རབ་ཏུ་གཅེས་པའི་མདོ་ཞེས་བྱ་བ། ཐམས་ཅད་མཁྱེན་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས
134a7 མཉན་ཡོད་ཀྱི་གྲོང་ཁྱེར་ཆེན་པོ་པད་མ་རྒྱས་པ་ཞེས་བྱ་བའི་གཙུག་ལག་ཁང་ན་བཞུགས་ཏེ། དེ་ནས་དགེ་སློང་གི་དགེ་འདུན་འཁོར་སྟོང་ཕྲག་ཕྱེད་དང་བཅུ་གསུམ་དང་ཐབས་གཅིག་གོ། །དེ་ནས་དེའི་ཚེ་བཅོམ་ལྡན་འདས་ཀྱི་འཁོར་འདུས
134a8 པ་དེའི་ནང་ན་འཕགས་པ་ཉེ་བར་འཁོར་ཞེས་བྱ་བ་དབང་པོ་དུལ་བ། ཐོས་པ་དང་ལྡན་པ། ཤེས་རབ་ཟབ་པ། བཅོམ་ལྡན་འདས་ཀྱིས་ལེགས་པར་གསུངས་པའི་ཆོས་འདུལ་བ་ལ་ལྷག་པར་མོས་ཤིང་མཆོག་ཏུ་འཛིན་པར་གནས་པ་རང
iiif viewer powered by OpenSeadragon
