| e-texts navigator |
| Wylie |
303a1 ང་ནི་ཞི་བའོ། །ང་ནི་མྱ་ངན་ལས་འདས་པའོ། །ང་ནི་སྲེད་པ་མེད་པའོ། །ང་ནི་ཉེ་བར་ལེན་པ་མེད་པ་སྟེ། ང་ལ་སྔོན་བདག་ཡོད་པར་གྱུར་པ་དེ་ནི་ད་ལྟར་ང་ལ་མེད་དོ་ཞེས་ཟེར་བ་དེ་ལ་ཉེ་བར་ལེན་པ་ཡོད་པ་ཁོ་ནར་སྣང་སྟེ
303a2 དགེ་སློང་དག་དེ་ཡང་རགས་པ། འདུས་བྱས་པ། བསམས་པ། རྟེན་ཅིང་འབྲེལ་པར་འབྱུང་བ་ཡིན་ཏེ། འདི་ལྟར་འདུ་བྱེད་རྣམས་ཡོད་ན་འདུ་བྱེད་རྣམས་ཀྱི་འགོག་པ་ཡང་ཡོད་པས་ན། དེ་བཞིན་གཤེགས་པས་དེ་ཡོད་པར་ཐུགས
303a3 སུ་ཆུད་ནས་དེ་ལས་ཕྱིར་ལོག་ཅིང་དེ་ལ་ཞི་བར་གཟིགས། ངེས་པར་འབྱུང་བར་གཟིགས་ཤིང་བཞུགས་ཏེ། དགེ་སློང་དག་ཚེ་འདི་ཉིད་ལ་མྱ་ངན་ལས་འདའ་བར་སྨྲ་བ་དག་ཚེ་འདི་ཉིད་ལ་མྱ་ངན་ལས་འདའ་བར་མངོན་པར་རྗོད་པ
303a4 མངོན་པར་རྗོད་པར་བྱེད་པ་དེ་སྙེད་ཡོད་དོ། །དགེ་སློང་དག་གཞན་ཡང་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ངས་རང་གི་མངོན་པར་ཤེས་པས་མངོན་པར་རྫོགས་པར་སངས་རྒྱས་ཏེ་བཤད་པ་གོ་འཕང་དམ་པ་གཞན
303a5 ཡང་ཡོད་དོ། །དགེ་སློང་དག་སྐྱེས་བུ་འདུལ་བའི་ཁ་ལོ་སྒྱུར་བའི་བླ་ན་མེད་པ་ངས་རང་གི་མངོན་པར་ཤེས་པས་མངོན་པར་རྫོགས་པར་སངས་རྒྱས་ཏེ་བཤད་པ་གོ་འཕང་དམ་པ་གཞན་དེ་གང་ཞེ་ན། དགེ་སློང་དག་འདི་ལྟ་སྟེ།
303a6 ཟག་པ་རྣམས་ཟད་པས་ཟག་པ་མེད་ཅིང་མངོན་པར་འདུས་མ་བྱས་པའི་རྣམ་པར་གྲོལ་བ་སྟེ། དགེ་སློང་དག་དེ་ནི་སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ་ངས་རང་གི་མངོན་པར་ཤེས་པས་མངོན་པར་ཤེས་པ་མངོན་པར
303a7 རྫོགས་པར་སངས་རྒྱས་ཏེ་བཤད་པ་གོ་འཕང་དམ་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བར་སྡོམ་ནི།
303a8 འདུ་ཤེས་ཐ་དད་གཟུགས་ཅན་དང་། །ཆད་དང་རྟག་པར་ལྟ་བ་དང་། །གྲིབ་དང་ཆུ་དང་མཁར་བ་དང་། །སྐྱེས་བུ་གདུལ་བྱ་ཐ་མ་ཡིན། །མདོ་ཆེན་པོ་ལྔ་གསུམ་པ་ཞེས་བྱ་བ་རྫོགས་སོ།། །།
iiif viewer powered by OpenSeadragon
