| e-texts navigator |
| Wylie |
298a1 འདི་ལྟར་བདག་ཅག་ཕྱི་མ་ལ་འདི་ལྟ་བུ་དང་འདི་ལྟ་བུར་འགྱུར་བར་བྱའོ་ཞེས་ལེགས་སུ་སྨོན་པ་ཁོ་ན་མངོན་པར་རྗོད་པ་མངོན་པར་རྗོད་པར་བྱེད་དེ། དེ་དག་གིས་སྨྲས་པ། དེ་ནི་ཚོང་པ་ལྟ་བུར་འགྱུར་རོ་སྙམ་དུ་སེམས
298a2 པ་དང་། དེ་དག་འདི་སྙམ་དུ་ཡང་སེམས་ཏེ། ཇི་སྲིད་དུ་བདག་འདི་གཟུགས་ཅན་རགས་པ། འབྱུང་བ་ཆེན་པོ་བཞིའི་རྒྱུ་ལས་བྱུང་ཞིང་གསོན་ལ་འདུག་སྟེ། འཚོ་ཞིང་སྡོད་པར་འགྱུར་བ་དེ་སྲིད་དུ་ནད་དང་བཅས། འབྲས་དང་བཅས།
298a3 ཟུག་རྔུ་དང་བཅས། རིམས་དང་བཅས། ཡོངས་སུ་གདུང་བ་དང་བཅས་པ་ཡིན་གྱི། ཇི་ཙམ་དུ་བདག་འདི་ཤི་ཕན་ཅད་བདག་ཆད་ཅིང་ཞིག་ལ་མི་འབྱུང་བ་དེ་ཙམ་དུ་བདག་འདི་ཡང་དག་པར་ཤིན་དུ་ལེགས་པར་ཆད་པ་ཡིན
298a4 ནོ། །ཇི་སྲིད་དུ་འདོད་པ་ན་སྤྱོད་པའི་ལྷ་དང་། གཟུགས་ན་སྤྱོད་པའི་ལྷ་དང་། གཟུགས་མེད་པ་ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོ། གཟུགས་མེད་པ་རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་འགྲོ། གཟུགས
298a5 མེད་པ་ཅི་ཡང་མེད་པའི་སྐྱེ་མཆེད་དུ་ཉེ་བར་འགྲོ། གཟུགས་མེད་པ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་ཞིང་གསོན་ལ་འདུག་སྟེ། འཚོ་ཞིང་སྡོད་པར་འགྱུར་བ་དེ་སྲིད་དུ་ནད་དང་བཅས། འབྲས
298a6 དང་བཅས། ཟུག་རྔུ་དང་བཅས། རིམས་དང་བཅས། ཡོངས་སུ་གདུང་བ་དང་བཅས་པ་ཡིན་གྱི། ཇི་ཙམ་དུ་བདག་འདི་ཤི་ཕན་ཅད་བདག་ཆད་ཅིང་ཞིག་ལ་མི་འབྱུང་བ་དེ་ཙམ་དུ་བདག་འདི་ཡང་དག་པར་ཤིན་དུ་ལེགས་པར
298a7 ཆད་པ་ཡིན་ནོ་སྙམ་དུ་སེམས་པ་དེ་དག་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དགེ་སློང་དག་དགེ་སྦྱོང་དང་བྲམ་ཟེ་ཤེས་པ་དང་ལྡན་པ། ཆད་པར་སྨྲ་བ། སེམས་ཅན་ཡོད་པ་ལ་ཆད་པ་དང་། འཇིག་པ་དང་།
298a8 མེད་པར་འདོགས་པར་བྱེད་པ་དེ་དག་ལ་ནི་མི་ཤེས་པའི་ཕུང་པོའི་ལྷག་མ་ཡོད་དོ། །ཇི་ཙམ་དུ་མི་ཤེས་པའི་ཕུང་པོའི་ལྷག་མ་ཡོད་པ་དེ་ཙམ་དུ་འཇིག་ཚོགས་ཀྱིས་འཇིག་པ་ཡོད་པས་འཇིག་ཚོགས་ཀྱིས་འཇིགས་ཤིང་སྐྲག་སྟེ།
iiif viewer powered by OpenSeadragon
