| e-texts navigator |
| Wylie |
293b1 བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་བཀའ་སྩལ་ཏོ། །དགོན་པ་དང་ནི་ཤིང་དྲུང་དང་། །ཁྱིམ་སྟོང་དག་ཏུ་འཇིག་རྟེན་གཙོ། །རྣམ་པར་འདྲེན་པ་རྫོགས
293b2 སངས་རྒྱས། །རྗེས་སུ་དྲན་གྱིས་དགེ་སློང་དག་།གལ་ཏེ་རྣམ་འདྲེན་འཇིག་རྟེན་གཙོ། །རྫོགས་སངས་རྒྱས་པ་མི་དྲན་ན། །འདོད་ཆགས་བྲལ་བ་རྣམས་ཀྱི་མཆོག་།ཆོས་དེ་རྗེས་སུ་དྲན་པར་གྱིས། །གལ
293b3 ཏེ་འདོད་ཆགས་བྲལ་བའི་མཆོག་། ཆོས་དེ་རྗེས་སུ་མི་དྲན་ན། །དགེ་འདུན་བླ་མེད་བསོད་ནམས་ཞིང་། །དེ་ནི་རྗེས་སུ་དྲན་པར་གྱིས། །སངས་རྒྱས་ཆོས་དང་དགེ་འདུན་རྣམས། །དེ་ལྟར་རྗེས་སུ་དྲན་བྱས་ན། །
293b4 འཇིགས་དང་བག་ཚ་སྤུ་ལྡང་བ། །མེད་པར་འགྱུར་རོ་དགེ་སློང་དག་།འཇིགས་པས་སྐྲག་པའི་མི་མང་པོ། །རི་དང་ནགས་ཚལ་རྣམས་དག་དང་། །ཀུན་དགའ་མཆོད་པའི་ལྗོན་ཤིང་ལ། །སྐྱབས་སུ་འགྲོ་བར
293b5 གང་བྱེད་པ། །དེ་ནི་སྐྱབས་གཙོ་མ་ཡིན་ཞིང་། །དེ་ནི་སྐྱབས་མཆོག་མ་ཡིན་ཏེ། །སྐྱབས་དེ་དག་ལ་རྟེན་བྱེད་པ། །སྡུག་བསྔལ་ཀུན་ལས་གྲོལ་མི་འགྱུར། །གང་དག་སངས་རྒྱས་ཆོས་དང་ནི། །དགེ་འདུན་དག་ལ
293b6 སྐྱབས་སོང་བ། །སྡུག་བསྔལ་སྡུག་བསྔལ་ཀུན་འབྱུང་དང་། །སྡུག་བསྔལ་ཡང་དག་འགགས་པ་དང་། །བདེ་ཞིང་མྱ་ངན་འདས་འགྲོ་བའི། །འཕགས་ལམ་ཡན་ལག་བརྒྱད་པ་ཡི། །འཕགས་པའི་བདེན་པ
293b7 བཞི་པོ་དག་། ཤེས་རབ་ཀྱིས་ནི་ལེགས་མཐོང་འགྱུར། །དེ་ནི་སྐྱབས་ཀྱི་གཙོ་བོ་དང་། །དེ་ནི་སྐྱབས་ཀྱི་མཆོག་ཡིན་ཏེ། །སྐྱབས་དེ་དག་ལ་བརྟེན་བྱས་ན། །སྡུག་བསྔལ་ཀུན་ལས་གྲོལ་བར་འགྱུར། །བཅོམ་ལྡན་འདས
293b8 ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །མདོ་ཆེན་པོ་རྒྱལ་མཚན་དམ་པ་ཞེས་བྱ་བ་རྫོགས་སོ།། །།
iiif viewer powered by OpenSeadragon
