| e-texts navigator |
| Wylie |
49a1 བོ་ལ། །ཟང་ཟིང་མེད་པར་རྟག་ཏུ་ཆོས་སྦྱིན་ཞིང་། །ལྷག་པའི་བསམ་པ་ཡིས་ནི་སྙིང་བརྩེ་བ། །དེ་བཞིན་མཁས་པས་སྤྱོད་པའི་ལམ་བཞི་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ལ
49a2 སྦྱོར་བར་བྱས་པས་ནི་དགོན་པ་ལ་བསྟེན་པར་བྱ། ཆོས་ཉན་དུ་འགྲོ་བར་བྱ། གོས་གཙང་མ་དག་བཅང་བར་བྱ། གཅིག་པུ་གནས་པར་བྱ། སྤྱོད་ལམ་བཞིས་གནས་པར་བྱ། ཆོས་སྨྲ་བ་རྣམས་ལ་སྣ་ཚོགས་སྦྱིན་པ་བསྒྲུབ་པའི
49a3 བསམ་པ་ལ་སྦྱོར་བ་དང་མོས་པར་བྱ། དཀོན་མཆོག་གསུམ་ལ་གུས་པ་དང་བཅས་པར་བྱ། གཞན་གྱི་དབང་དུ་མི་འགྱུར་བར་བྱ། ཡོངས་སུ་མི་སྐྱོ་བ་དང་། རྟག་ཏུ་བརྩོན་འགྲུས་བརྩམས་པ་དང་། གཡོ་མེད་པ་དང་། སངས
49a4 རྒྱས་རྗེས་སུ་དྲན་པ་དང་མ་བྲལ་བ་དང་། མི་དམིགས་པ་དང་། མཚན་མ་མེད་པ་ལེགས་པར་བསྒོམ་པ་དང་། ཇི་སྐད་སྨྲས་པ་དེ་བཞིན་དུ་བྱེད་པར་བྱ། སངས་རྒྱས་ལ་གསོལ་བ་གདབ་པར་མོས་པར་བྱ། ཉེས་པ་བཤགས་པ་དང་།
49a5 རྗེས་སུ་ཡི་རང་བ་དང་། ཡོངས་སུ་བསྔོ་བ་ལ་མཁས་པར་བྱ། མ་བརྟགས་པའི་སྤྱོད་ལམ་དུ་མི་བྱ། མི་སྐྲག་པ་དང་། སྟོན་པ་དང་། བླ་མ་ལ་གནས་བཅའ་བས་གནས་པར་བྱའོ། །འཐུན་པར་འཛིན་པར་བྱའོ། །ཆོས
49a6 དེ་དག་ལ་ཡོངས་སུ་མི་སྐྱོ་བས་བསྟེན་པར་བྱའོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་སྲོག་ཆགས་སུམ་ཁྲི་ནི་སྔོན་སེམས་མ་བསྐྱེད་པ་ལས་བྱང་ཆུབ་ཏུ་སེམས་སྐྱེས་སོ། །སྲོག་ཆགས་ལྔ་སྟོང་ནི་ཆོས
49a7 རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །བྱང་ཆུབ་སེམས་དཔའ་སུམ་ཁྲི་ནི་མི་སྐྱེ་བའི་ཆོས་ལ་བཟོད་པ་སྐྱེས་སོ། །ཆོས་ཀྱི་རྣམ་གྲངས་འདི་ཐོས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོ
49a8 གཅེས་སྤྲས་བྱེད་པའོ། །གང་གིས་བསྐལ་པ་གང་གཱའི་ཀླུང་གི་བྱེ་མ་སྙེད་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་བཀང་ནས་དཀོན་མཆོག་གསུམ་ལ་སྦྱིན་པ་བྱིན་པར་བྱེད་ལ་གང་ཞིག་ཆོས་ཀྱི་རྣམ
iiif viewer powered by OpenSeadragon
