| e-texts navigator |
| Wylie |
97b1 བ་བཏུད་ནས། བཅོམ་ལྡན་འདས་ལ་ཚིགས་སུ་བཅད་པ་བརྗོད་པ་འདིས་ཆོས་བཤད་པར་གསོལ་བ་བཏབ་བོ། །རིང་དུ་གཤེགས་ཤིང་མྱུར་བའི་རྒྱུན་དང་ལྡན། །ཟད་པ་ལྷུར་མཛད་མི་གཡོ་འོད་གསལ་བ། །རྟོགས་པ
97b2 ཐམས་ཅད་སྐྱེད་པར་མཛད་པ་པོ། །ཁྱོད་གསུང་རབ་ཞི་རྒྱུ་སྐར་ཚུལ་མཁྱེན་མཁས། །དབུགས་རྔུབ་པ་དང་འབྱུང་བ་དྲན་པ་མཁྱེན། །ཚངས་པའི་གནས་པ་བཞི་པོ་དག་དང་ལྡན། །སྲིད་པ་གསུམ་པོ་ཇི་ལྟར་དག་འགྱུར་བར། །
97b3 སེམས་ཅན་འགྲོ་བ་སྤོང་བར་མཛད་པ་པོ། །ཚུལ་གཅིག་ལྡན་པ་ཉིད་ཀྱི་མཁྱེན་མངའ་བ། །ལྷ་མི་རྣམ་པ་མང་པོ་ཁྲི་དག་ཀྱང་། །སོམ་ཉི་རྒལ་མཛད་དགེ་བརྙེས་ཆུ་བོ་རྒལ། །བདེ་འགྲོའི་མཁྱེན་པ་མྱུར་དང་ལྡན་པ་པོ། །
97b4 བྱང་ཆུབ་སྤྱོད་དང་སངས་རྒྱས་ཆོས་མངོན་སུམ། །སེམས་གཡོ་སེམས་ཅན་ཁ་ཅིག་འདོད་ཀླུང་ལྷུང་། །མུན་པས་ཁེབས་ཤིང་མིག་དང་མི་ལྡན་པའི། །སྡུག་བསྔལ་ཐམས་ཅད་བཅོམ་པར་གྱུར་ལགས་པ། །མ
97b5 ཐོས་དགེ་བྲལ་སློབ་དཔོན་མཁས་ལྡན་པའི། །སྐྱེ་བོ་བྲལ་ལ་མི་དབང་ཐུགས་རྗེ་སྐྱེད། །མཉམ་པའི་ཆོས་ཉན་སྐྱེ་བའི་ཕ་རོལ་མཆི། །སྲིད་པ་གཅོད་པ་བཤད་པར་མཛད་དུ་གསོལ། །སྐྱེ་ཀླུང་ཕ་རོལ་གཤེགས་ཐུབ་ཐུགས
97b6 རྗེས་གསུངས། །བློ་འཆལ་སྐྱེ་མང་སྲེད་པའི་དྲ་བའི་ལམ། །དེ་དག་ཐམས་ཅད་ཉོན་མོངས་རྩ་བ་ཅན། །དེར་ནི་སེམས་ཅན་འཁྱམས་འགྱུར་གཅད་དུ་གསོལ། །གང་དུ་སྡུག་བསྔལ་རབ་ཞི་དབང་དྲུག་དང་། །ཡིད
97b7 ཀྱང་ཞི་འགྱུར་སྲེད་སྐྱོན་རྒྱལ་བ་གསུངས། །སྲེད་པ་བྲལ་བ་སྲེད་རྒྱུ་མི་མངའ་བ། །སེམས་ཅན་གདུང་བ་དཔལ་ཀུན་བྲལ་གྱུར་པ། །དེ་སླད་ཐུབ་པ་ཐུགས་བརྩེ་བ་ཡི་རྒྱུས། །སྲེད་པ་ཡི་ནི་ཆུ་ཀླུང་སྐེམས་མཛད་པ། །
97b8 མྱུར་དུ་བདེ་ཞིང་འཆི་བ་མ་མཆིས་པའི། །ཆོས་ཀྱང་སྲེད་པ་གཅོད་པ་བཤད་པར་གསོལ། །དེ་ནས་བཅོམ་ལྡན་འདས་ཀྱིས་ཚངས་པ་པད་མ་འབར་བའི་དཔལ་ལ་འདི་སྐད་ཅེས་བཀའ་སྩལ་ཏོ། །གང་དག་སྔོན་ཆད་ཕ་རོལ་ཕྱིན། །
iiif viewer powered by OpenSeadragon
