| e-texts navigator |
| Wylie |
100b1 ཆོས་ཀྱིས་གནས་པ་དག་དང་། ཡོན་ཏན་གྱིས་ཕྱུག་པ་དག་དང་། སེམས་ལ་དབང་དང་ལྡན་པར་གྱུར་པ་རྣམས་བདེ་བ་ལ་རེག་པ་དང་། རྣམ་པར་ཐོ་འཚམ་པ་མེད་པར་བྱ་བའི་ཕྱིར་དང་། ངའི་བསྟན་པ་རབ་ཏུ་མི་འཇིག་པར
100b2 བྱ་བའི་ཕྱིར་དང་། བྱང་གྲོལ་གྱི་བདེ་བ་ཡོངས་སུ་རྫོགས་པར་བྱ་བའི་ཕྱིར་ས་ཆེན་པོ་འདི་ཡོངས་སུ་སྤྱད་པར་བྱས་པ་ཡིན་ནོ། །དོན་དེ་ཉིད་བྱིན་གྱིས་བརླབ་པར་བྱ་བའི་ཕྱིར་དེ་ལྟར་ན་བྱང་ཆུབ་སེམས་དཔའ་སེམས་དཔའ
100b3 ཆེན་པོ་རྣམས་བསམ་གཏན་གྱི་ཡུལ་དག་གིས་རྣམ་པར་རྩེ་བར་བྱེད་དོ། །ས་ཕྱོགས་གང་དང་གང་ན་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་འཁོད་ཅིང་བསམ་གཏན་གྱི་ཡུལ་དག་གིས་རྣམ་པར་རྩེན
100b4 པར་བྱེད་པ་དེ་དང་དེར། ད་ལྟར་དང་མ་འོངས་པའི་དུས་ན་ཡང་ཁ་ཅིག་ཏུ་ལ་ལར་ང་འདས་ནས་སེམས་ཅན་འཁོར་བའི་འཇིགས་པས་སྐྲག་པར་བྱེད་ཅིང་མྱ་ངན་ལས་འདས་པ་འདོད་པ་དག་སྐུ་གདུང་གི་མཆོད་རྟེན་དག་བྱེད་དུ
100b5 འཇུག་པར་འགྱུར་ཞིང་། སངས་རྒྱས་ཀྱི་བཞུགས་ཁང་དག་གམ། སངས་རྒྱས་ཀྱི་སྐུ་གཟུགས་དག་གམ། ཆོས་ཀྱི་བཞུགས་ཁང་དག་བྱེད་པར་འགྱུར་རོ། །ཡང་ན་དེར་གླེགས་བམ་དུ་བྲི་བ་བྱས་ནས་ངའི་ཆོས་ཀྱི་སྐུ་ཡང
100b6 འཆང་བར་འགྱུར་རོ། །དེར་ཡང་མཆོད་པ་རྣམ་པ་སྣ་ཚོགས་དག་ཀྱང་བྱེད་པར་འགྱུར་ཞིང་། དེར་རིན་པོ་ཆེ་རྣམ་པ་སྣ་ཚོགས་དག་ཀྱང་འབུལ་བར་འགྱུར་ཏེ། འདི་ལྟ་སྟེ། གསེར་དང་། དངུལ་དང་། བཻ་དཱུརྱ་དང་། ཤེལ་དང་།
100b7 མུ་ཏིག་དམར་པོ་དང་། རྡོའི་སྙིང་པོ་དང་། སྤུག་དང་། ནོར་བུ་དང་། མུ་ཏིག་དང་། དབྱིག་དང་། དུང་དང་། མན་ཤེལ་དང་། བྱི་རུ་ལ་སོགས་པ་དང་། དར་ཡུག་དང་། དྲིལ་བུ་དང་། ཟ་བུག་དང་། གསོ་རས་བཟང་པོ་དང་།
100b8 ཡུལ་ཀ་ཤིའི་རས་བཟང་པོ་དང་། དབུ་རྟེན་ནང་ཚངས་ཅན་དང་། གདིང་བ་དང་། གདུགས་དང་། རྒྱལ་མཚན་དང་། བ་དན་དང་། ཆོས་གོས་དང་། མགུར་གྱི་རྒྱན་དང་། སྤོས་དང་། མེ་ཏོག་དང་། བདུག་པ་དང་། རོལ་མོའི
iiif viewer powered by OpenSeadragon
